Eclesiastés 4 - DIOSPA QHELQACHISQAN DEUTEROCANONICAL

¹ Kay pachapi tukuy imaymana sarunchasqata rikorqani. Jinallataj sarunchasqa kajkunaj waqasqankuta rikorqani, nitaj pipis paykunata sonqochaykurej karqachu. Pikunachus sarunchajkunarí may atiyniyoj karqanku, nitaj pipis paykunaman sayaykoj karqachu.

² Chayrayku noqa nerqani: Wañupojkunaqa astawan kusisqa kanku, kawsashajkunamanta nisqaqa, nispa.

³ Chaywanpis manaraj paqarejkunaqa chay iskaymanta nisqaqa astawan kusisqaraj kanku, imaraykuchus paykunaqa manaraj kay pachapi millay ruwaykunata rikunkurajchu.

⁴ Chantá rikullanitaj anchata llank'ana, jinataj imata ruwasqanpipis allin risqanqa runata envidiawan jap'inachisqanta. Chaypis qhasi manakajlla, wayra jap'iyta munay jinalla kasqanta repararqani.

⁵ Runaqa ninku: Wampu runaqa mana llank'ayta munasqanrayku yarqhaymanta wañun, nispa.

⁶ Noqataj nini: Iskay phanita llank'anamantaqa uj phanita samarina aswan allin. Sinch'ita mana samarispa llank'anaqa qhasi manakajlla, chayqa wayra jap'iyta munay jinalla kasqanta repararqani, nispa.

⁷ Ujtawan qhawarispataj, kay pachapi kaytawan qhasi manakajlla kasqanta rikorqani.

⁸ Mana piniyoj runata rikorqani, mana kawsaqeyojta, nitaj wawayojta, nillataj wawqenkunapis karqachu. Chaywanpis payqa ni jayk'aj ruwasqanmanta samarikorqachu. Qhapajyayta munaspallapuni, mana sayk'orqachu, nitaj tapurikorqachu: Pipajtaj kay jinata llank'ashaniri, mana mikhusqa, nitaj ujyasqari? nispa. Chaypis qhasi manakajlla, jatun llakiytaj kasqanta repararqani.

Ujchasqa kaspaqa imatapis ruwayta atinchej

⁹ Astawan walej iskay ukhu kay sapalla kanamanta nisqaqa, imaraykuchus iskayninkumanta llank'aspa, astawan tarinku.

¹⁰ Sichus uj urman chayqa, ujnin kaj aysarin. Sichus uj sapallan kashaspa urman chayrí, mana pipis aysarej kanchu.

¹¹ Jinallataj iskay ukhuchus puñunkuman chayqa, purajmanta q'oñichinakuyta atinku. Imaynatataj sapallan q'oñikuyta atinmanri?

¹² Pipis ch'ulla kaspaqa, atipachikuyta atin. Iskay ukhutajrí mana atipachikonqankuchu. Kinsanchasqa q'aytoqa mana p'itikullanchu.

Yachayqa mana machuyayllapichu kashan

¹³ Wajcha yachayniyoj waynaqa aswan walej wampu machu kuraj kamachejmanta nisqaqa, pichus manaña yuyaychasqatapis jap'ikunchu, chaymanta nisqaqa.

¹⁴ Chay waynaqa astawan walej kamachinanpaj, carcelmanta llojsimorqa chaypis, chayrí kay suyupi wajcha paqarikorqa chaypis.

¹⁵ Kay pachapi wampu kuraj kamachejpa cuentanmanta yaykoj wajcha waynawan tukuy runata purishajta rikorqani.

¹⁶ Chay waynatataj ashkha mana yupay atina runa qhaterqanku. Chaywanpis qhepaman jamojkunaqa paywan amichikonqanku. Chaypis qhasi manakajlla, wayra jap'iyta munay jinalla kasqanta repararqani.