Apocalipsis 7 - DIOSPA QHELQACHISQAN DEUTEROCANONICAL

144.000 sellasqa kajkuna

¹ Chay qhepata noqa tawa angelkunata rikorqani, chay angelkunataj kay pachaj tawantin k'uchupi sayasharqanku. Paykuna kay pachapi tawantin ladomanta phukumoj wayrata jark'asharqanku, ama jallp'a pataman wayramunanpaj, nitaj mama qocha pataman, nillataj ima sach'a patamanpis.

² Jinallataj waj angelta rikorqani inti llojsimuynejmanta wicharimojta. Chay angeltaj kawsaj Diospa sellon aparisqa kasharqa. Paytaj chay tawa angelkunaman sinch'ita qhaparerqa, pikunachus mama qochata, chantá jallp'atawan ñak'arichinankupaj atiyta jap'isharqanku, chaykunaman.

³ Chay angeltaj paykunata nerqa: Amaraj imanaychejchu jallp'ata, nitaj mama qochata, nitaj sach'akunatapis, Diosninchejpa kamachinkunata mat'inkupi sellanaykukama, nispa.

⁴ Chantá noqa mashkhachus chay sellasqakuna kasqankuta uyarerqani: Israelpa tukuy jatun ayllunkunamanta 144.000 sellasqa karqanku:

⁵ Judá jatun ayllumanta 12.000, Rubén jatun ayllumanta 12.000, Gad jatun ayllumanta 12.000,

⁶ Aser jatun ayllumanta 12.000, Neftalí jatun ayllumanta 12.000, Manasés jatun ayllumantataj 12.000 sellasqa karqanku.

⁷ Jinallataj Simeón jatun ayllumanta 12.000, Leví jatun ayllumanta 12.000, Isacar jatun ayllumanta 12.000,

⁸ Zabulón jatun ayllumanta 12.000, José jatun ayllumanta 12.000, chantá Benjamín jatun ayllumanta ima 12.000 sellasqa karqanku.

Ashkha runa yuraj p'achawan p'achallisqa

⁹ Jinallataj chay qhepata may chhika runata rikorqani, yupay mana atinata tukuy suyumanta, tukuy ayllumanta, tukuy imaymana rijch'aj runamanta, tukuy parlaykunamantawan. Paykuna kamachina tiyanaj ñawpaqenpi, chantá Corderoj ñawpaqenpi ima kasharqanku, yuraj p'achawan p'achallisqa, makinkupitaj palma jap'irisqa.

¹⁰ Paykunaqa sinch'ita qhaparispa, nerqanku: Kamachina tiyanapi tiyashaj Diosninchej, chantá Cordero ima qhespichiwanchej, nispa.

¹¹ Chantá tukuy angelkuna kamachina tiyanaj muyuyninpi sayasharqanku, kurajkunaj, chantá tawa kawsajkunaj muyuyninpi ima. Jinallataj kamachina tiyanaj ñawpaqenpi pampakama k'umuykuspa, Diosta yupaycharqanku.

¹² Paykunataj nerqanku: Ajina kachun. Diosninchej wiñay wiñaypaj yupaychasqa, jatunchasqa, maypaj qhawasqataj kachun. Chantá payman tukuy imamanta pachis nina, imaraykuchus payqa tukuy atiyniyoj, tukuy yachayniyoj, may kallpayoj ima. Ajina kachun, nispa.

¹³ Chaymanta kuraj kaj runakunamanta ujnin tapuwarqa: Chay yuraj p'achawan p'achallisqa kajkuna, pikunataj kankuri? Maymantataj jamunkuri? nispa.

¹⁴ Noqataj payman kuticherqani: Wiraqochi, chaytaqa qan yachanki, nispa. Paytaj niwarqa: Kaykunaqa chay jatun ñak'ariypi wañojkuna kanku. Paykunaqa Corderoj yawarninpi t'ajsaspa, p'achankuta yurajyacherqanku.

¹⁵ Chayrayku Diospa kamachinan tiyanaj ñawpaqenpi kashanku, tuta p'unchaytaj Templonpi payta yupaychanku. Chantá kamachina tiyananpi tiyashaj Dios paykunata waqaychanqa.

¹⁶ Paykuna manaña yarqhachikonqankuchu, nitaj yakumanta ch'akichikonqankuchu. Nillataj intipis paykunata imananqachu, nitaj ruphaypis kankanqachu.

¹⁷ Kamachina tiyanapi tiyashaj Corderoqa paykunata michenqa, kawsayta qoj yaku juturinkunamantaj pusanqa. Diostaj paykunaj ñawinkumanta waqasqankuta pichanqa, nispa.