Apocalipsis 6 - DIOSPA QHELQACHISQAN DEUTEROCANONICAL

Sellokuna llik'isqa

¹ Chay qhepata qhawashajtillay, Corderoqa ñawpaj kaj sellota llik'erqa. Chantá noqa tawa kawsajkunamanta ujninta nejta uyarerqani, qhon qhonpis kanman jina jatunmanta parlajta: Chimpamuy, nispa.

² Chantá chaypi uj yuraj caballota rikorqani. Chay caballopi lloq'asqa kajtaj flechanapaj uj arcota jap'isharqa. Paymantaj uj pilluta churarqanku. Jinataj caballopi lloq'asqa maqanakuspa atipananpaj llojserqa, atipanallanpajpunitaj.

³ Jayk'ajchus Cordero iskay kaj sellota llik'erqa chaypacha, noqa iskay kaj kawsajta uyarerqani: Chimpamuy, nispa nejta.

⁴ Chantá uj puka caballota llojsimojta rikorqani. Chay caballopi lloq'asqa kajmantaj jatun espadata qorqanku, jinataj atiyta ima kay pachamanta allillanta kawsakuyta qhechunanpaj. Chayrayku kay pachapi tukuynejpi maqanaku chantá wañuchinaku ima karqa.

⁵ Maypachachus kinsa kaj sellota Cordero llik'ejtin, noqa kinsa kaj kawsajta nejta uyarerqani: Chimpamuy, nispa. Chantá uj yana caballota rikorqani. Caballopi lloq'asqa kajtaj makinpi uj balanzata jap'isharqa.

⁶ Chantá tawa kawsajkunaj chawpinmanta ujninku nerqa: Iskay libra trigo uj jornal pagopaj, sojta libra cebadataj uj jornal pagollapaj kanqa. Aceiteta, vinotawan imarí ama imanankichu, nispa.

⁷ Jayk'ajchus tawa kaj sellota Cordero llik'erqa chaypacha, tawa kaj kawsajta nejta uyarerqani: Chimpamuy, nispa.

⁸ Chantá uj q'ellu caballota rikorqani. Chay caballopi lloq'asqa kajpata sutin Wañuy karqa, paypa qhepantataj Ukhu Pacha nisqa risharqa. Paykunamantaj atiyta qorqanku, kay pachamanta khuskanpa khuskannin runakunata wañuchinankupaj espadawan, yarqhaywan, onqoykunawan, chantá k'ita animalkunawan ima.

⁹ Maypachachus Cordero phishqa kaj sellota llik'erqa chaypacha, altar urapi rikorqani, pikunachus Diospa nisqanta cheqanta willasqankurayku wañuchisqa karqanku, chaykunata.

¹⁰ Chantá paykuna jatunmanta qhaparispa, nerqanku: Tukuyta Kamachej Jesús, may llimphu kaj, cheqa kajtaj, jayk'ajkamataj kay pachapi tiyakojkunata mana juzgankichu, nitaj wañuchiwasqaykumanta vengakunkichuri? nispa.

¹¹ Chantá yuraj p'achata sapa ujninkuman qorqanku. Paykunatataj nerqanku: Pisi tiempotawan suyariychej, imajtinchus Jesusta qhatej masiykichejkunamanta pikunachus wañunanku kashan, chaykuna manaraj qankuna jina wañuchisqachu kanku, nispa.

¹² Jayk'ajchus sojta kaj sellota Cordero llik'erqa chaypacha, rikorqani manchay jallp'a ikhakuyta. Inteqa yana tela jina yanayarqa, killataj yawar jina pukaman tukorqa.

¹³ Chantá janajmanta ch'askakuna kay pachaman urmaramorqanku, imaynatachus higo sach'ata wayra thalaspa, higo poqoyta urmarachin, ajinata.

¹⁴ Janajpis papel jina k'uyukuspa, chinkariporqa. Tukuy orqokunataj, mama qochapi churukunapis kasqankumanta kuyurichisqa karqanku.

¹⁵ Jinaqa kay pachapi kuraj kamachejkuna, kurajkuna, soldadokunata kamachejkuna ima qaqa jusk'upi, chantá orqo jusk'upi ima pakaykukorqanku. Jinallataj qhapajkuna, atiyniyojkuna, wata runakuna, mana wata runakunapis pakaykukullarqankutaj.

¹⁶ Chantá orqokunata, qaqatapis qhaparikorqanku: Pataykuman urmaykamuspa, pakaykuwayku jaqay kamachina tiyanapi tiyashaj Cordero ama rikunawaykupaj. Jinataj Corderoj k'araj phiñakuyninmanta pakallawaykutaj,

¹⁷ imaraykuchus Cordero jasut'inan p'unchay chayamunña, manataj pipis awantayta atenqachu, nispa.