Apocalipsis 21 - DIOSPA QHELQACHISQAN DEUTEROCANONICAL

Dios mosoj janajta, mosoj kay pachatawan ruwan

¹ Chaymantataj noqaqa mosoj janajta, mosoj kay pachatawan rikorqani, imaraykuchus ñawpaj kaj janaj, chantá ñawpaj kaj kay pachapis tukukaporqanku. Mama qochapis manaña karqañachu.

² Rikullarqanitaj Diospa wakichisqan llimphu kaj llajta mosoj Jerusalenta. Chay llajtaqa janaj pachamanta urayk'amusharqa casarakoj sipas jina parlakusqan qhariwan casarakunanpaj k'achanchasqata.

³ Jinapi kamachina tiyanamanta jatunmanta qhaparejta uyarerqani: Kunan Diosqa ayllun chawpipi kanqa, paykunawan khuskataj tiyakullanqapuni. Paykuna Diospa ayllun kanqanku, Diostaj Diosninku kanqa.

⁴ Payqa tukuy waqayta ñawinkumanta pichanqa, manañataj wañuy kanqachu, nitaj waqanapis, nitaj ayqonapis, nillataj nanaypis, imaraykuchus imachus ñawpajta karqanku, chaykunaqa manaña kanqachu, nispa.

⁵ Chantá kamachina tiyanapi tiyasqa kaj nerqa: Noqa tukuy imata mosojyachini, nispa. Nillarqataj: Kayta qhelqay, imaraykuchus kay simi nisqaqa maychus kajpuni, cheqataj, nispa.

⁶ Nillawarqataj: Noqa Tukuy Imaj Qallariynin, Tukukuynintaj kani. Tukuy ima ruwasqaña. Noqataj ch'akichikojmanqa kawsachej yaku juturimanta yakuta qhasilla ujyachisaj.

⁷ Pichus mana allin kajta atipaj, jinataj noqallapipuni atinikuspa kajqa tukuy imata chayaqeta jina jap'enqa. Noqa Diosnin kasaj, paytaj waway kanqa.

⁸ Manchalikunarí, Diospi mana atinikuyta munajkuna, millay kajkuna, runa wañuchejkuna, khuchichakojkuna, layqakuna, lanti yupaychajkuna, chantá tukuy llullakojkuna ima azufrewan lawrashaj nina qochaman wijch'uykusqa kanqanku. Chaymá iskay kaj wañoyqa.

Mosoj Jerusalén llajta

⁹ Chantá chay qhepata qanchis angelkunamanta, pikunachus qhepata jamoj manchay ñak'ariykunawan junt'asqa vasokunata jap'isharqanku, chaykunamanta ujnin jamuwarqa. Niwarqataj: Chimpamuy, noqataj rikuchisqayki casarakunanpaj parlasqa sipasta, Corderoj warminta, nispa.

¹⁰ Chantá angelqa Santo Espíritoj atiyninpi uj manchay jatun orqoman pusawarqa, chantá Diospa ajllakusqan Jerusalén llajtata rikuchiwarqa. Chay llajtaqa janaj pachapi Diospa ñawpaqenmanta urayk'amusharqa.

¹¹ Mosoj Jerusalén llajtaqa Diospa jatun kayninpa k'anchayninwan lliphipisharqa, lliphipisqantaj sumaj k'achitu jaspe nisqa rumiman rijch'akorqa. Chaytaj cristal jina sut'i karqa.

¹² Chay llajtaqa jatun perqawan muyuykusqa karqa, chunka iskayniyoj punkuyojtaj. Sapa punkupi uj ángel kasharqa, jinataj sapa punkupi Israelpa chunka iskayniyoj churinkunaj sutinku qhelqasqa karqa.

¹³ Inti llojsimuynejman kinsa punku karqa, wichaynejman kinsa, uranejman kinsa, inti yaykuynejmantaj kinsa punku karqa.

¹⁴ Llajtaj perqantaj chunka iskayniyoj cimientoyoj karqa. Chaykuna patapi chunka iskayniyoj suti qhelqasqa karqa, Corderoj chunka iskayniyoj kuraj kachankunajta.

¹⁵ Noqawan parlaj angelqa qorimanta varayoj karqa, chaywan llajtata, punkunkukunata, chantá perqantawan midinanpaj.

¹⁶ Llajtaqa tawa esquinayoj karqa, anchonman, sayt'unmanpis chhikachajkama karqa. Chay angeltaj llajtata varawan miderqa, midisqanman jinataj 432 legua jina karqa. Sayt'unman, sayayninman, anchonman ima chhikachajkama karqa.

¹⁷ Perqantapis midillarqataj, chaytaj sojta chunka tawayoj metro, pusaj chunka centimetroyoj karqa, angelqa runa midiyta yachasqanman jina miderqa.

¹⁸ Chay llajtaj perqanqa jaspe nisqa rumimanta karqa. Llajtapis sumaj qorimanta karqa, cristal jina lliphipirishaj.

¹⁹ Llajtaj cimientonqa imaymana k'achituta lliphipishaj rumikunawan k'achanchasqa karqa. Ñawpaj kaj cimientoqa jaspemanta karqa, qhepan kajtaj safiromanta. Chaypa qhepan kajtaj agatamanta karqa, chaypa qhepan kajtaj esmeraldamanta.

²⁰ Phishqa kajqa onicemanta karqa, qhepan kajtaj rubimanta, chaypa qhepan kajtaj crisolitomanta, chaypa qhepan kajtaj berilomanta, chaypa qhepan kajtaj topaciomanta, chaypa qhepan kajtaj crisoprasamanta, chaypa qhepan kajtaj jacintomanta, chaypa qhepan kajtaj amatistamanta.

²¹ Chay chunka iskayniyoj punkukunaqa chunka iskayniyoj perlakuna karqanku, sapa punkutaj uj perlalla karqa. Llajtaj plazantaj sumaj qorimanta karqa, cristal jina lliphipirishaj.

²² Chay llajtapeqa mana ima templotapis rikorqanichu, imaraykuchus llajtaj templonqa Tukuyta Kamachej, Tukuy Atiyniyoj Dios, Corderotaj.

²³ Llajtataqa mana intichu k'anchanan karqa, nitaj killachu, imaraykuchus Diospa jatun kayninpa lliphipiynin k'anchan, chay k'anchajtaj Cordero.

²⁴ Chaypacha tukuy suyupi tiyakojkunaqa Diospa k'anchayninpi purenqanku, kay pachapi kuraj kamachejkunataj qhapaj kapuyninkuta chay llajtaman apamuspa, Diosman jaywanqanku.

²⁵ Jinallataj chay llajtaj punkunkuna sapa p'unchay kicharisqallapuni kanqanku, imaraykuchus manaña tuta kanqachu.

²⁶ Chaymantaj tukuy suyumanta runakuna tukuy imankuta apamonqanku Diosta jatunchanankupaj.

²⁷ Chaymanqa mana ni ima ch'ichi kajpis yaykonqachu, nitaj millayta ruwajkuna, ni llullakojkunapis. Manachayqa Corderoj kawsay p'anqanpi listasqa kajkunalla yaykonqanku.