Apocalipsis 18 - DIOSPA QHELQACHISQAN DEUTEROCANONICAL

Babilonia jatun llajta chinkachisqa

¹ Chay qhepata noqa waj angelta rikorqani janaj pachamanta urayk'amushajta. Payqa manchay atiyniyoj karqa, kay pachataj paypa k'anchasqanwan lliphiperqa.

² Paytaj jatunmanta qhaparerqa: Urmanña, Babilonia jatun llajta urmanña. Chay llajtaqa supaykunaj wasinman tukun, tukuy millay espiritukunaj pakakunanman, chantá tukuy imaymana millay ch'ichipaj qhawasqa phawajkunaj thapanman ima.

³ Kay pachapi tukuy suyumanta runakuna chay phisu warmi jina Babilonia llajtawan khuchichakuspa machaykorqanku. Kay pachapi kuraj kamachejkunapis paywan khuchichakullarqankutaj, qhatojkunataj qhapajyarqanku, imajtinchus pay sonqonpa tukuy munasqanta rantikorqa, nispa.

⁴ Chaymantá janaj pachamanta wajpa parlamusqantañataj uyarerqani: Noqajta kajkuna, chay llajtamanta llojsimuychej. Ama chay llajtaj juchallisqanwan chhapukuychejchu, ama paywan khuska jasut'isqa kanaykichejpaj.

⁵ Juchallisqanqa janaj pachaman chayanankama tawqaykukun, Diostaj tukuy millay ruwasqanta mana qonqanchu.

⁶ Payman qopuychej, imaynatachus qankunaman qosorqachej ajinata, ruwasqanman jinataj iskay jinatawan kutichipuychej. Ima vasomantachá qankunaman ujyachisorqachej, chayllamantataj iskay jinatawan payman ujyachiychej.

⁷ Pay runaykacharqa, chhika patapi kaspataj, munasqallanta ruwarqa. Kunantajrí ruwasqanman jina payta ñak'arichiychej, waqachispataj kusikuychej, imaraykuchus payqa sonqonpi nerqa: Noqaqa qoya jina kamachinaypi tiyasqa kashani. Mana warmisapachu kani, nitaj waqanatapis rikusajchu, nispa.

⁸ Ajinata nisqanrayku uj p'unchaylla kay ñak'ariykuna payman jamonqa: Wañuy, waqay, yarqhay ima. Chantá ninawan ruphaykuchisqa kanqa, imaraykuchus Tukuyta Kamachej, Tukuy Atiyniyoj Diosmin payta juzganqa, nispa.

⁹ Kay pachapi kuraj kamachejkuna chay phisu warmiwan khuchichakorqanku, paywantaj chhika patapi kawsaspa, millayta kawsanaman qokorqanku. Chayrayku paykuna ruphaykusqan q'oshñisqanta rikuspa, llakisqa qhaparenqanku, maytataj waqanqanku.

¹⁰ Paypa ñak'arichisqanta rikuspa, mancharenqanku, karullapi sayaspataj, nenqanku: Ay, Babilonia jatun llajta, kay jina jatun llakiyman chayanaykiri. Manaraj imapi Diospa jasut'iynin pataykiman urmaykamusorqa, nispa.

¹¹ Jinallataj kay pachapi kaj chhika qhatojkunapis paymanta waqallanqankutaj, manchaytataj qhaparenqanku, imaraykuchus manaña vendenankupaj apasqankuta rantej kanqañachu.

¹² Qhatunapaj apasqankoqa kaykuna kanku: Qori, qolqe metal, k'achitu rumikuna, walqakuna, sumaj awasqa lino tela, kulli tela, seda tela, puka tela, sumajta q'apaj tukuy imaymana madera, marfil tullu, sumaj madera, broncemanta, fierromanta, chantá mármol sutiyoj rumimanta tukuy ima ruwasqa.

¹³ Jinallataj qhatunankupaj apaj kanku: Canelata, k'achituta q'apashaj jawinata, inciensota, mirrata, sumaj q'apashaj jawinata, vinota, aceiteta, suysusqa jak'uta, trigota, wakata, ovejata, caballota, carretakunata, wata runakunata, waj runakunata ima.

¹⁴ Chay qhatojkunataj urmasqa llajtata nenqanku: Sonqoykej tukuy munasqanqa tukukapunña. Jinallataj sumaj imakunayoj kasqayki, chhika patapi kawsarikusqaykipis chinkapun, manañataj jayk'ajpis chaykunata tarinkiñachu, nispa.

¹⁵ Chay qhatojkunataj, pikunachus chay llajtanejta qhapajyarqanku, chaykuna llajtaj ñak'arisqanta rikuspa, manchayta mancharenqanku. Chantá karullapi sayarikuspa, manchayta waqanqanku, llakikonqankutaj.

¹⁶ Chantá nenqanku: Chay jatun llajta chay jina llakiyman chayananri. Payqa sumaj awasqa linomanta p'achallikoj, jinallataj kulli yanaraw p'achawan, puka p'achawan, qoriwan, k'achituta lliphirishaj rumikunawan, chantá walqakunawan ima k'achanchakoj.

¹⁷ Chaywanpis manaraj imapi chay chhika qhapaj kasqan tukukaporqa, nispa. Chantá barcokunata tukuy purichejkuna, barcopi tukuy rejkuna, yanapakuspa qolqe ganakojkunapis, karullapi sayarikorqanku.

¹⁸ Chantá llajtaj ruphaykusqan q'oshñita rikuspa, qhaparerqanku: Ni mayqen llajta kay jatun llajta jinaqa karqachu, nispa.

¹⁹ Ajinaqa umankuman jallp'ata qhalliykukuspa, qhaparerqanku, jik'un jik'unta waqaspataj, nerqanku: Kay jina llakiyman kay llajta chayananri. Mama qochapi tukuy barcoyoj kajkuna paypa kapuyninwan qhapajyarqayku. Kunantajrí manaraj imapi chinkarparichisqa, nispa.

²⁰ Chaymanta janaj pachapi tukuy tiyakojkuna kusikuychej. Jinallataj qankuna Diospa ajllakusqankuna, Diospa kachankuna, chantá Diosmanta sut'inchajkuna ima kusikullaychejtaj, imaraykuchus Dios qankunarayku justiciata ruwaspa, chay llajtaman tukuy millayta ruwasqanman jina kutichipun, nispa.

²¹ Chantá uj kallpasapa ángel uj jatun molino rumita jina oqharispa, mama qochaman wijch'uykorqa, nerqataj: Ajinallatataj jatun Babilonia llajtaqa sinch'i kallpawan wijch'usqa kanqa, manataj jayk'ajpis ujtawan pipis rikonqañachu.

²² Babilonia llajta, manaña jayk'ajpis calleykikunapi arpaj waqasqan uyarikonqachu, nitaj takejkunaj takisqankupis, nillataj qenata, cornetata ima tocasqankupis. Jinallataj qanpi ni pi llank'ajkuna kanqachu, molinoj muyusqanpis manaña uyarikonqachu.

²³ Manallataj qanpi lamparaj k'anchasqan rikukonqachu, nillataj casarakojkunaj kusikusqankupis uyarikonqañachu, imaraykuchus qhatojniykikunaqa ancha atiyniyoj karqanku, qantaj layqeriyoykiwan tukuy runata q'otiyaspa pantacherqanki.

²⁴ Dios jasut'isunki, imajtinchus Diosmanta sut'inchajkunaj, chantá Diospa ajllakusqankunaj yawarninku, calleykikunata mayu jina purerqa, tukuy kay pachapi wañuchisqa kajkunaj yawarninkuwan khuska, nispa.