Apocalipsis 15 - DIOSPA QHELQACHISQAN DEUTEROCANONICAL

Qanchis angelkuna qanchis onqoykunata jap'ishanku

¹ Chaymanta noqa janajpi ujtawan runaj mana jayk'aj rikusqan t'ukunata rikullarqanitaj. Qanchis angelkuna qanchis qhepa kaj wañuchej onqoykunata jap'isharqanku, imaraykuchus chay onqoykunawan Diospa phiñakuynin thasnusqa kanan karqa.

² Rikullarqanitaj cristalmanta jina uj mama qochata ninawan chajrusqata. Chay cristal mama qochapitaj sayasharqanku, pikunachus ñawpa sierpeta, lantintawan mana yupaycharqankuchu, nitaj marcanwan marcachikorqanku, chaykuna. Tukuyninkutaj Diospa qosqan arpata jap'isharqanku.

³ Jinapi paykuna Diospa kamachin Moisespa takiyninta, chantá Corderoj takiyninta ima takisharqanku: Tukuyta Kamachej, Tukuy Atiyniyoj Dios, ruwasqaykeqa ancha jatun, t'ukunapajtaj. Tukuy imatachus ruwasqaykeqa cheqanmin, cheqataj. Qanqa tukuy suyuta Kamachejmin kanki.

⁴ Tukuyta Kamachej Dios, pitaj mana qanta manchachikusunkimanchuri? Pitaj sutiykita mana jatunchanmanchuri? Qanllamin may llimphu kanki. Tukuy runakuna ñawpaqeykiman jamuspa yupaychasonqanku, imaraykuchus justiciata ruwasqaykeqa sut'inchasqaña, nispa.

⁵ Chaymantataj noqaqa janaj pachapi templota kicharisqata rikorqani, Dioswan Tinkukuna Toldota.

⁶ Chay templomanta qanchis angelkuna llojsimorqanku qanchis onqoykuna jap'irisqa, rit'i jina sumaj yuraj linowan p'achallisqa, qhasqonkutaj qori chumpiwan chumpisqa.

⁷ Chantá chay tawa kawsajkunamanta ujnin kaj chay qanchis angelkunaman qorimanta ruwasqa qanchis vasota jaywarqa. Chay vasokunaqa Diospa phiñakuyninwan junt'asqa karqanku, pichus wiñay wiñaypaj kawsan, chaypata.

⁸ Chaypacha temploman q'oshñi junt'aykorqa. Chay q'oshñeqa Diospa jatun kayninpa lliphipiyninmanta, jinataj jatun atiyninmanta llojsimorqa. Manataj pipis temploman yaykuyta aterqachu, chay qanchis angelkuna makinkupi wañuchej onqoykunata jap'isharqanku, chaykunata jich'ayta tukunankukama.