Apocalipsis 11 - DIOSPA QHELQACHISQAN DEUTEROCANONICAL

Iskay testigokuna

¹ Chantá janaj pachamanta parlamoj uj soqosota varaman rijch'akojta jaywawarqa. Jinaspataj, niwarqa: Sayarispa, kay varawan Diospa Templonta, altarta ima midimuy, chaypi yupaychajkunatataj yupamuy.

² Temploj jawanpi kaj patiotarí ama midinkichu, imaraykuchus chay patiota qoni noqata mana qhatiwajkunaman, paykunataj noqapaj ajllakusqay llajtata kinsa wata khuskanniyojta saronqanku.

³ Noqatajrí iskay testigokunata kachamusaj, qhashqa p'achawan p'achallisqata. Paykunataj 1.260 p'unchayta sut'inchanqanku.

⁴ Chay testigokuna iskay olivo sach'a jina, chantá iskay lamparakuna jina kanku. Paykunataj kay pachata Kamachej Diospa ñawpaqenpi sayashanku.

⁵ Sichus pipis paykunata imanayta munanman chayqa, paykunaj siminkumanta nina llojsimuspa, awqankuta rupharparenqa. Ajinaqa pichus paykunata imanayta munajqa wañuchisqa kanqa.

⁶ Jinallataj chay testigokuna mana parachimunankupaj atiyniyoj kanku, paykuna sut'inchayta tukunankukama. Paykuna atiyniyojllataj kanku yakuta yawarman tukuchinankupaj, kay pachapi kajkunatapis mashkha kutitachá munasqankuta tukuy imaymana onqoywan ñak'arichinankupaj ima.

⁷ Chantá testigokuna willayta tukojtinkuña, ukhu pachamanta wicharimoj chay millay sierpe paykunawan maqanakuspa, atipaykonqa, ajinamantataj paykunata wañurachenqa.

⁸ Chay testigokunaj ayankutaj Jerusalén llajtaj jatun plazanpi wijch'usqa kanqanku, maypichus Tukuyta Kamachej Jesusninku chakatasqa karqa, chaypi. Chay llajtaqa Sodomawan, chantá Egiptowan ima ninakun.

⁹ Chantá tukuy imaymana runa, tukuy ayllumanta, tukuy imaymana parlayniyojkunamanta, chantapis tukuy suyupi tiyakojkuna ima kinsa p'unchay khuskanniyojta testigokunaj ayankuta qhawanqanku, manataj p'ampanankuta munanqankuchu.

¹⁰ Jinapi Diosman mana kutirikojkuna chay testigokuna wañuchisqa kasqankumanta kusirikonqanku. Chantá ujkuna ujkuna waqekunata jaywanarikonqanku, imaraykuchus chay iskay testigokunaqa paykunata mayta ñak'aricherqanku.

¹¹ Chaywanpis kinsa p'unchay khuskanniyoj kashajtin, Diosqa kawsay samayta testigokunaman phukuykonqa, paykunataj sayarenqanku. Tukuy paykunata kawsarejta rikojkunataj manchaytapuni mancharikonqanku.

¹² Chaymanta chay testigokunaqa janaj pachamanta jatunmanta parlamojta uyarenqanku: Kayman wicharimuychej, nispa. Chantá paykuna phuyupi janaj pachaman wicharenqanku. Awqankunapis paykunata wicharishajta rikonqanku.

¹³ Chantá chay kikinpacha manchay jallp'a ikhakuy kanqa, Jerusalén llajta chunkaman t'aqasqamanta ujnin kaj t'aqataj thuñiykukonqa. Jallp'a ikhakusqanraykutaj 7.000 runakuna wañuranqanku, kawsashaj qhepakojkunataj mancharikuspa, janaj pachapi kaj Diosta jatunchanqanku.

¹⁴ Ajinata iskay kaj jatun llakiy tukukapun. Chaywanpis kinsa kaj llakiyñataj usqhayllata qayllamushan.

Qanchis kaj trompeta

¹⁵ Maypachachus qanchis kaj ángel trompetanta waqacherqa chaypacha, janaj pachapi jatunmanta parlasqanku uyarikorqa: Diosninchej, chantá kachamusqan Cristo ima kay pachapi kamachishankuña. Paykunataj wiñay wiñaypaj kamachenqanku, nispa.

¹⁶ Chantá chay iskay chunka tawayoj kuraj runakuna pampakama k'umuykuspa, Diosta yupaycharqanku. Paykuna Diospa ñawpaqenpi kamachinanku tiyanapi tiyasqa kasharqanku.

¹⁷ Nerqankutaj: Tukuyta Kamachej, Tukuy Atiyniyoj Dios, pachis pachis niyku. Qanmin kawsanki, wiñay wiñaymantapachataj kawsallarqankipuni. Kunantaj jatun atiyniykiwan kay pachapi kamachiyta qallarishanki.

¹⁸ Chayrayku tukuy suyumanta runakuna phiñarikorqanku. Chaywanpis qanpa phiñakunayki p'unchay chayamunña. Wañusqakunata juzganayki p'unchaypis chayamullantaj. Jinallataj p'unchay chayamun qan, pikunachus qanmanta sut'inchajkunaman, qanpaj ajllakusqaykikunaman, sutiykita jatunchajkunaman ima ruwasqankuman jina t'inkata qopunaykipaj, mana kasu ruwana kachunku, chayrí maypaj qhawasqa kachunku. Chantá kay pachata phirejkunatapis tukuchinaykipaj p'unchay chayamullantaj, nispa.

¹⁹ Jinallapi janaj pachapi kashaj Diospa templon kicharikorqa, chaypitaj Diospa trato ruwasqan arca rikukorqa. Chaypachallataj lliuj lliujkuna, jatunmanta parlaykuna, qhon qhonkuna, jallp'a ikhakuy, chantá manchay chijchi para ima karqa.