3 Juan 1 - DIOSPA QHELQACHISQAN DEUTEROCANONICAL

Gayomanta allinta parlanku

¹ Noqa iglesiapi kuraj kaj jina kay cartata qhelqaspa may munasqa Gayoman apachini, pitachus cheqa kaj yachachiyman jina munakuni, chayman.

² Munasqa wawqéy, Diosmanta mañapuyki tukuy imapi allin risunanpaj, ukhuykitaj qhalilla kananpaj, imaynachus Dioswan purisqaykipi allin rishasunki, ajinata.

³ Jesusmanta wakin yachachejkuna purisqankumanta kutimuspa, willawarqanku qanqa cheqa kajta mana wasanchaspa purisqaykita. Willallawarqankutaj cheqa kajmanta yachasqaykiman jina purisqaykita. Chayta yachaspataj, maytapuni kusikorqani.

⁴ Noqaqa mayta kusikuni wawaykuna cheqa kajman jina purishasqankuta uyarispa. Chaymin astawan kusichiwan.

⁵ May munasqa wawqéy, pikunachus Jesusmanta yachachispa purinku, chaykunata yanapaspa allinta ruwanki, astawanqa waj llajtamanta chayamojkunata yanapaspa.

⁶ Chay yachachejkunaqa imaynatachus paykunata munakusqaykita iglesiaman willarqanku. Ajinallatapuni paykunapaj ruway imatachus purinankupaj necesitasqankuta churapuspa Diospa munayninman jina.

⁷ Paykuna Jesucristomanta willanankupaj puririmorqanku, manataj Jesucristoman mana kutirikojkunamanta ni imata jap'ikorqankuchu.

⁸ Chayrayku noqanchej chay jina wawqekunata wajyarikunanchej, ajinamanta cheqa kajta yachachinapi paykunata yanapananchejpaj.

Diótrefes mana allin kajtachu ruwan

⁹ Noqa iglesiaman uj cartata apachimorqani. Diotrefestajrí wawqe panakuna ukhupi kamachej kayta munaspa, noqayku kamachisqaykumanta mana ni imata yachayta munanchu.

¹⁰ Chayrayku noqa jamuspa, chay ruwasqanmanta payta k'amiykusaj, llullakuspa noqaykupaj mana allinta parlasqanmanta. Diotrefestaj mana chayllatachu ruwan. Astawanqa chayamoj yachachejkunatapis mana wajyarikuyta munanchu. Wajyarikuyta munajkunatapis wasinkuman yachachejkunata pusanankuta manallataj saqenchu, manachayqa paykunata iglesiamanta wijch'un.

¹¹ Munasqa wawqéy, ama chay jina mana allin kajta ruwayta yachaqakuychu, aswanpis allin kajllata. Cheqan kajta ruwajqa Diosmantamin. Pichus mana allin kajta ruwajrí, Diosta mana Diosninpaj rejsikapunchu.

Demetrio allin kajta ruwan

¹² Wawqenchej Demetriomanta tukuy allinta parlanku, Diosta kasuspa purisqanpis chaymanta yachayta qollantaj. Noqaykupis paymanta jinallatataj parlayku. Qankunataj yachankichej willasqaykoqa ajinapuni kasqanta.

Waj kutikama nispa cartata tukuychan

¹³ Noqa qanta ashkhataraj nisunay tiyan. Chaywanpis mana cartanejta nisuyta munanichu.

¹⁴ Noqaqa usqhayta waturikusoj jamuyta munashani, chaypachataj uyapura parlarikusunchej.

¹⁵ Sonqo tiyaykusqa kawsakuy qanwan kachun. Kaypi kaj kawsaqeykikuna napaykamusunku. Qanpis chaypi kaj kawsaqekunata napaykapullawaykutaj.