2 Timoteo 1 - DIOSPA QHELQACHISQAN DEUTEROCANONICAL

Pablo napaykun

¹ Noqa Pabloqa Dios munasqanrayku Cristo Jesuspa kuraj kachan kani, Dios Cristonejta wiñay kawsayta qonanta nisqanman jina.

² Timoteo, munasqa wawáy, qanman kay cartata qhelqaspa apachimuyki. Qanwan kachun Tata Diosninchejmanta chantá Tukuyta Kamachej Cristo Jesusmantawan qhasilla k'acha yanapayninku, khuyakuyninku, sonqo tiyaykuyninku ima.

Pablo Diosta mana wasanchanata yuyaychan

³ Noqa Diosta pachis nini, pitachus ñawpa tataykuna jina llimphu sonqowan kasuni, chayman, imaraykuchus sapa kuti Dioswan parlarikuspaqa, qanmanta yuyarikunipuni.

⁴ Waqasqaykimanta yuyarikuspa, qanta rikusuyta mayta munani, sonqoy kusiywan junt'asqa kananpaj.

⁵ Yuyarikullanitaj tukuy sonqowan Jesucristopi atinikusqaykimanta. Ñawpajta jatun mamayki Loida, chantá mamayki Eunicewan Jesucristopi atinikorqanku, noqataj allinta yachani qanpis paykuna jinallataj Jesucristopi atinikusqaykita.

⁶ Chayrayku yuyaychayki, ruwanapaj atiyta jap'isqaykita ninata jina lawrarichinaykita, mayqentachus Dios qosorqa makiyta umaykiman churashasojtiy, chayta.

⁷ Ajinata niyki, imaraykuchus Diosqa mana manchachikoj sonqotachu qowarqanchej, manachayqa Espíritun atiyta qowanchej, wajkunata munakunapaj kallpata, sonqonchejpa munasqanwan mana apaykachachikuyta ima.

⁸ Chayrayku qan Tukuyta Kamachej Jesusninchejmanta ujkunaman willayta ama p'enqakuychu, nitaj noqamantapis, Jesusrayku carcelpi wisq'asqa kashajtiypis. Aswanpis Tata Dios kallpata qosusqanman jina wakichikuy, Jesusmanta sumaj willayrayku noqawan khuska ñak'arichisqa kanaykipaj.

⁹ Paymin qhespichiwarqanchej, chantá juchamanta t'aqasqa jina kawsananchejpaj wajyawarqanchej, mana allin kajta ruwasqanchejraykuchu, aswanpis imatachus munasqanta junt'ananrayku, chantá qhasilla k'acha yanapayninrayku ima. Ajinata Diosqa Cristo Jesusnejta chay qhasilla k'acha yanapayninta qowarqanchej, manaraj kay pacha ruwasqa kashajtin.

¹⁰ Kunantajrí chay k'acha kaynenqa qhespichiwajninchej Jesucristo rikhurimusqanrayku rikuchisqa kashan. Payqa wañuypa atiyninta phirispa, sumaj willaynejta wiñay kawsayta qowarqanchej.

¹¹ Diostaj noqata churawarqa, Jesuspa kuraj kachan kaspa, chay sumaj willayta willanaypaj, chantá yachachinaypaj ima.

¹² Chayraykumin kay carcelpi wisq'asqa ñak'arishani. Chaywanpis mana p'enqakunichu, imaraykuchus pipichus atinikusqayta allinta yachani. Yachallanitaj pay atiyniyoj kasqanta chay imatachus qowasqanta jamoj p'unchaykama waqaychananpaj.

¹³ Qanrí, noqamanta cheqan yachachiyta uyarisqaykiman jina puriy. Chaytataj ruway Diospi atinikuspa, chantá wajkunata munakuspa ima, Jesucristoman ujchasqa kasqanchejman jina.

¹⁴ Jinallataj qanman qosqa karqa, chay cheqan yachachiyta allinta qhaway Santo Espíritoj atiyninnejta, pichus noqanchejpi tiyakun, chaynejta.

¹⁵ Ña yachankiña, Asiamanta pikunachus Jesucristota tukuy qhatejkuna saqerpariwasqankuta. Figelopis, Hermogenespis saqerpariwanku.

¹⁶ Chantá Tukuyta Kamachej Diosqa Onesíforoj wasi ayllunmanta khuyarikuchun, imaraykuchus payqa sapa kutilla carcelpi sonqochaspa kallpachawarqa, wisq'asqa kasqaymanta mana p'enqakuspa.

¹⁷ Chantá Roma llajtaman chayamuytawankama, pay mayta mask'awarqa tarinawankama.

¹⁸ Tukuyta Kamachej Jesús jaqay jamoj p'unchaypi khuyakuyninta payman rikuchichun. Qan allinta yachanki Onesiforoqa imaynatachus sumajta yanapawasqanchejta Éfeso llajtapi.