1 Juan 5 - DIOSPA QHELQACHISQAN DEUTEROCANONICAL

Jesuspi atinikuspa mana allin kajta atipana

¹ Tukuy pichus creen Jesusqa Diospa kachamusqan Cristo kasqanta chayqa, payqa Diospa wawan. Jinallataj Tata Diosta munakojqa Tataj wawankunatapis munakullantaj.

² Kay jinamanta Diospa wawankunata munakusqanchejta yachanchej, maypachachus Diosta munakunchej, kamachisqantataj kasunchej chaypacha.

³ Diosta munakusqanchejmanta yachayta qonchej maypachachus kamachisqankunata junt'anchej, chaypacha, kamachisqankunata junt'aytaj atina jinallamin.

⁴ Tukuy pichus Diospa wawan kajqa Diosman mana kutirikojkunaj yuyasqankuman jina kawsayta atipan. Diosman mana kutirikojkunaj yuyasqankuman jina kawsanataqa Jesuspi atinikuspamin atipanchej.

⁵ Pitaj Diosman mana kutirikojkuna yuyasqankuman kawsanata atipan? Pichus Jesusqa Diospa Churin kasqanta jap'ikojlla.

Santo Espiritoqa Diospa Churinmanta sut'inchan

⁶ Jesucristo kay pachaman jamuspa, yakuwan bautizasqa karqa, chantá wañuspataj, yawarninta jich'arqa. Mana yakunejllatachu Jesusqa Diospa Churin kasqanta sut'incharqa, manachayqa yakunejta, chantá yawarnejta ima. Santo Espíritu cheqatapuni parlaj jina kayqa ajinapuni kasqanta sut'inchan.

⁷ Jinapuni kasqanta sut'inchajkunaqa kinsa kanku:

⁸ Santo Espíritu, yaku, chantá Jesús cruzpi wañuspa yawar jich'asqan ima. Chay kinsantinkutaj ujllata parlanku.

⁹ Noqanchejqa runakunaj sut'inchasqankuta cheqapuni kasqanta jap'ikunchej, icharí? Chaywanpis Diospa sut'inchasqanqa aswanraj, imaraykuchus Diosmin chayta nin. Tata Diostaj Jesusqa Churin kasqanta sut'inchan.

¹⁰ Tukuy pichus Diospa Churinpi atinikojqa tukuy sonqo yachan, Tata Diospa Churinmanta sut'inchasqanqa cheqapuni kasqanta. Pichus Tata Diospa sut'inchasqanta mana tukuy sonqo jap'ikojrí Diosta llullata jina rikhurichin, Churinmanta Tata Diospa sut'inchasqanta mana jap'ikusqanrayku.

¹¹ Tata Diospa sut'inchasqanqa kay jinamin: Diosqa wiñay kawsayta qowasqanchej, chay wiñay kawsaytataj Churinpi atinikuspa jap'inchej.

¹² Pichus Diospa Churinman ujchasqa kajqa wiñay kawsayta jap'inña. Pitajchus Diospa Churinman mana ujchasqa kajrí, mana wiñay kawsayniyojchu.

Wiñay kawsayniyoj kasqanchejta yachanchej

¹³ Kay imakunata qhelqamuykichej, pikunachus Diospa Churinpi atinikunkichej, chaykunaman, ajinamanta wiñay kawsayniyoj kasqaykichejta yachanaykichejpaj.

¹⁴ Noqanchej Diospi tukuy sonqo atinikunchej. Chayrayku sichus munasqanman jina imatapis mañakunchej chayqa, yachanchej pay uyarinawanchejta.

¹⁵ Sitajchus mañakusqanchejta Dios uyariwasqanchejta yachanchej chayqa, yachallanchejtaj imatachus mañakusqanchejta jap'isqanchejtaña.

¹⁶ Sichus pipis wawqe pananta mana wañuyman apaj juchata ruwajta rikunman chayqa, Diosmanta paypaj mañapuchun, Diostaj payman kawsayta qonqa. Chayta nini mana wañuyman apaj juchata ruwajkunamanta, imaraykuchus wañuyman apaj jucha tiyallantaj. Chay juchata ruwajpajrí mana ninichu Diosmanta pipis mañapunanta.

¹⁷ Tukuy millay kajta ruwanaqa juchamin. Chaywanpis, mana tukuy juchachu wañuyman apan.

¹⁸ Yachanchej Diospa wawanña kajkunaqa manaña juchallispallapunichu purisqankuta, imaraykuchus Diospa Churin paykunata waqaychan, Kuraj Supaytaj paykunata mana imanaytapis atinñachu.

¹⁹ Yachallanchejtaj noqanchej Diospata kasqanchejta, kay pachapi tukuy millayta ruwaspa purejkunatajrí Kuraj Supaypa makinpi kasqankuta.

²⁰ Yachallanchejtaj Diospa Churin jamuspa yuyayta, yachayta ima qowasqanchejta, cheqa kaj Diosman kutirikunanchejpaj. Kunantaj cheqa kaj Dioswan ujchasqa kawsashanchej, imajtinchus Churin Jesucristowan ujchasqa kawsashanchej. Paymin uj k'ata Diosqa, payllataj wiñay kawsayta qon.

²¹ Wawaykuna, mana cheqa kaj dioskunaman k'umuykunamanta allinta qhawakuychej. Ajina kachun.