1 Juan 4 - DIOSPA QHELQACHISQAN DEUTEROCANONICAL

Mana pejpa yachachisqanta jap'ikunallachu

¹ Munasqa wawqe panakuna, tukuy pikunachus: Diospa Espiritunpa yuyaychasqan kani, nispa ninku, chaykunaj yachachisqankuta ama jap'ikullaychejchu. Manachayqa Diosmantachus kanku, manachus chayta allinta reparaychej, imaraykuchus ashkha mana cheqanta yachachejkuna tukuynejpi purishanku.

² Qankuna Diospa Espiritunpa yuyaychasqan kajtaqa kay jinamanta reparayta atinkichej: Pichus Jesucristo cheqapuni runaman tukuspa kay pachaman jamusqanta sut'ita rimarin chayqa, chay runamin Diospa Espiritunpa yuyaychasqan.

³ Pitajchus nin: Jesucristo kay pachaman mana runaman tukuspachu jamorqa, nispa chayqa, chay runaqa mana Diosmantachu, manachayqa Cristoj contranpi sayarejpa yuyaychasqan. Qankuna Cristoj contranpi sayarej kay pachaman jamunanmanta uyarerqankichejña, kunantaj payqa kay pachapiña.

⁴ Munasqa wawaykuna, qankuna Diospata kankichej, chayraykutaj mana cheqantachu yachachejkunata atipankichejña. Diospa Espíritun, pichus qankunapi kajqa aswan atiyniyoj, pichus kay pachapi kashan, chaymanta nisqaqa.

⁵ Mana cheqantachu yachachejkunaqa Diosman mana kutirikojkunamanta kanku. Chayrayku Diosman mana kutirikojkunaj yuyasqankumanta parlanku, Diosman mana kutirikojkunataj paykunata uyarinku.

⁶ Noqaykurí Diospata kayku. Pichus Diospata kajkunataj uyariwayku. Pichus mana Diospata kajkunatajrí mana uyariwaykuchu. Chay jinamanta reparayta atinchej pichus cheqa kaj Espirituwan kashasqanta, pitajchus q'otiyaj espirituwan kashasqanta.

Ujkuna ujkuna munakuspa kawsakuna

⁷ Munasqa wawqe panakuna, purajmanta munakunanchej tiyan, imaraykuchus munakunaqa Diosmantamin. Pichus runa masinta munakojqa Diospa wawanmin, Dioswantaj k'achata kawsakun.

⁸ Pichus runa masinta mana munakojrí mana Dioswan k'achata kawsakunchu, imaraykuchus Diosqa cheqatapuni tukuyta munakojmin.

⁹ Tata Dios munakuwasqanchejta kay jinamanta rejsichiwarqanchej: Uj k'ata Churinta kay pachaman kachamorqa, paypi atinikuspa wiñay kawsayniyoj kananchejpaj.

¹⁰ Cheqatapuni munakunaqa ajinamin: Mana noqanchejchu Diosta munakorqanchej, manachayqa Diosmin munakuwarqanchej. Chayrayku pay Churinta kachamorqa wañusqannejta juchanchejta pampachananpaj.

¹¹ Munasqa wawqe panakuna, sichus Dios ajinata munakuwarqanchej chayqa, ajinallatataj noqanchejpis ujkuna ujkuna munakunanchej tiyan.

¹² Mana pipis jayk'aj Diosta rikorqachu. Noqanchej purajmanta munakunchej chayrí, Dios noqanchejpi tiyakun, munakuynintaj noqanchejpi imachus ruwananta ruwaspa, imatachus tariyta munasqanta junt'an.

¹³ Noqanchej Dioswan ujchasqa kawsasqanchejta, paytaj noqanchejpi tiyakusqanta ima yachanchej payqa Santo Espiritunta qowasqanchejrayku.

¹⁴ Noqaykutaj Churinta rikorqayku, willaykutaj Tata Diosqa payta kay pachaman kachamusqanta, tukuy runata qhespichinanpaj.

¹⁵ Pillapis sut'ita rimarin Jesús Diospa Churin kasqanta chayqa, chay runaqa Dioswan ujchasqa kashan, Diostaj paypi tiyakun.

¹⁶ Noqanchejqa may jinatachus Dios munakuwasqanchejta yachanchej, munakuwasqanchejpitaj atinikunchej. Diosqa cheqatapuni tukuyta munakojmin. Jinaqa pikunachus munakuspallapuni kawsajkunaqa Dioswan ujchasqa kawsakunku, Diostaj paykunapi kawsakun.

¹⁷ Dioswan kawsakojtinchejtaj, munakuyninchejqa maychus kajta munakunakama wiñan. Chayrayku, juicio p'unchaypi noqanchej mana manchachikuspa Diospa ñawpaqenpi sayayta atisunchej, imaraykuchus Jesús kay pachapi imaynatachus kawsarqa, ajinata kawsanchej.

¹⁸ Chay jinata runa masita munakojtinchej, mana imatapis manchachikuna kanchu, imajtinchus maychus kajta munakunaqa tukuy manchachikuyta wijch'un. Sichus pipis Dios jasut'inanta manchachikun chayqa, chay runaqa maychus kajta munakuyta mana yachanrajchu.

¹⁹ Noqanchejqa ujkuna ujkuna munakunchej, imaraykuchus Diosraj ñawpajta munakuwarqanchej.

²⁰ Sichus pipis ninman: Noqaqa Diosta munakuni, nispa, Jesucristota qhatej masintataj chejnikunman chayqa, payqa llullamin. Sichus pipis rikushasqan runa masinta mana munakunchu chayqa, mana rikusqan Diostapis manallataj munakunchu.

²¹ Diostajrí kay jinata kamachiwarqanchej: Pichus Diosta munakojqa Jesucristota qhatej masintapis munakullachuntaj, nispa.