1 Juan 3 - DIOSPA QHELQACHISQAN DEUTEROCANONICAL

Diospa wawankuna

¹ Reparaychej may jinatapunichus Tata Dios munakuwasqanchejta, Diospa wawankuna nisqa kananchejpaj. Jinapunitaj Diospa wawankuna kanchej. Diosman mana kutirikojkunarí mana Diospa wawankunapajchu rejsiwanchej, Diosta mana allinta rejsisqankurayku.

² Munasqa wawqe panaykuna, noqanchejqa Diospa wawankunaña kanchej. Chaywanpis aswan qhepanejman imaynachus kananchejta Dios mana rikuchiwanchejrajchu. Jinapis Jesucristo rikhurimojtin, pay jina kananchejta yachanchej, imaraykuchus payta imaynachus kasqanta rikusunchej.

³ Pichus Jesucristopi atinikuspa jinapuni kananta suyakojqa pay kikin llimphuchakun, imaynachus Jesucristopis llimphupuni, ajina.

⁴ Pichus juchallikojqa Diospa kamachisqanta p'akin, imaraykuchus juchalleyqa Diospa kamachisqanpa contranpi sayariymin.

⁵ Qankuna yachankichejña, Jesucristoqa juchanchejmanta llimphuchanawanchejpaj jamusqanta. Jesucristorí mana juchallinchu, nipunitaj juchalliyta atinchu.

⁶ Tukuy pichus Jesucristowan allinpi kawsakojqa mana juchallispachu purin. Pichus juchallispallapuni purejrí mana Jesucristoman kutirikunchu, nitaj yachanchu pichus pay kasqanta.

⁷ Munasqa wawaykuna, ama piwanpis q'otiyachikuychejchu. Pichus cheqan kajta ruwajqa cheqan runa kasqanta rejsichikun, imaynachus Jesucristopis cheqan, ajina.

⁸ Pichus juchallispallapuni purejrí Kuraj Supaypata kasqanta rejsichikushan, imaraykuchus Kuraj Supay qallariymantapacha juchallispallapuni purin. Chayrayku Diospa Churenqa Kuraj Supaypa ruwasqanta phirinanpaj jamorqa.

⁹ Diospa wawanña kajqa mana juchallispallapuni purinchu, imaraykuchus paypeqa Diospa kawsaynin kashan. Ajinaqa pichus Diosmanta paqarejqa manaña juchallispallapuni puriyta atinmanchu.

¹⁰ Chayrayku pikunachus Diospa wawan kasqanku sut'i yachakun, pikunatajchus Kuraj Supaypata kasqankupis sut'illataj yachakun: Tukuy pichus mana cheqan kajta ruwaj, nitaj Jesucristota qhatej masintapis munakojqa mana Diospatachu.

Khuyanakuspa kawsakuna

¹¹ Qallariymantapacha qankuna kay willayta uyarerqankichej: Ujkuna ujkuna munakunanchej tiyan, nispa.

¹² Ama Caín jinaqa kanachejchu. Payqa Kuraj Supaypata kasqanrayku, wawqenta wañucherqa. Imaraykutaj Caín wawqenta wañucherqari? Payta wañucherqa, imaraykuchus paypa ruwasqan mana cheqanchu karqa, wawqenpatataj cheqan.

¹³ Wawqe panaykuna, sichus Diosman mana kutirikojkuna chejnisunkichej chayqa, ama t'ukuychejchu.

¹⁴ Sichus wawqe pananchejkunata munakunchej chayqa, yachanchej wañuymanta kawsayman pasasqanchejta. Pichus mana munakojrí wañusqallaraj kashan.

¹⁵ Pichus Jesucristota qhatikoj masinta chejnikojqa runa wañuchi, yachankichejtaj runa wañucheqa mana wiñay kawsayta jap'inanta.

¹⁶ Cheqatapuni munakuy imaynachus kasqantaqa kay jinamanta yachanchej: Jesucristo noqanchejrayku wañunanpaj kawsayninta jaywaykusqanpi. Ajinata noqanchejpis Jesucristota qhatikoj masinchejkunata yanapananchejrayku kawsayninchejta tukuchinanchej tiyan.

¹⁷ Chaywanpis pipis kapuyniyoj kashaspa, sichus Jesucristota qhatikoj masinta pisichikojta rikunman, manataj khuyarinmanchu chayqa, chay runaqa Diosta mana munakusqanta rejsichishan.

¹⁸ Munasqa wawaykuna, munakusqanchejqa ama nisqallachu kachun. Aswanpis cheqatapuni munakusqanchejta ruwasqanchejwan yachayta qonachej.

¹⁹ Chay jinamanta Diospata kasqanchejta yachanchej, ajinamantataj Diospa ñawpaqenpi mana imata manchachikuspa sayasunchej.

²⁰ Sonqonchejchus imallamantapis juchachawasunman chayqa, Diosqa sonqonchejmantapis aswanrajmin, jinataj pay tukuy imata yachan.

²¹ Munasqa wawqe panaykuna, sichus sonqonchej mana juchachawanchejchu chayrí, tukuy sonqo Diosman qayllaykuyta atinchej.

²² Jinallataj Diosqa tukuy mañakusqanchejta qowasunchej, imaraykuchus kamachisqanta kasunchej, jinataj imachus payta kusichin, chaytapis ruwanchej.

²³ Kaymin Diospa kamachisqanqa: Diospa Churin Jesucristopi atinikunanchej, kamachiwasqanchejman jinataj ujkuna ujkuna munakunanchej.

²⁴ Pikunachus Diospa kamachisqanta kasojkunaqa Dioswan k'acha kawsakuypi kashanku, Diospis paykunawan kawsakushallantaj. Noqanchejpis Dios noqanchejwan kawsakushasqanta yachallanchejtaj, imaraykuchus qowasqanchej Santo Espíritu noqanchejpi tiyakun, chayrayku.