तितस 2 - डोटेलिबिस्वासिलाइ सिकाउनइ पड्डया सत्य सिछ्या 1 तुइले भन्या साँचा सिछ्यामि भया कुरा सिकाउन्या अर्। 2 बुढा मान्सलाइ सान्त, गम्भिर, बिस्वासि, पिरिम रे सहन्या सक्तिमि पाको हुन् पडन्छ भुनिबर सिका। 3 तसेरि बुडि स्वाइनि मान्सले आदर पाउन्या लाइकोको ब्यबहार अद्दु पड्न्छ अरउलाइ दोस नलगाउन्या, रक्सि खाइबर नमात्तिन्या हुन पडन्छ भुनिबर सिका। तिनुले ज्या असल छ तेइ कुरा सिकाउनु पड्डछ। 4 तसो भया हुनाले तिनुले ज्वान स्वाइनि मान्सलाइ आफना बइकान रे चेला-चेलिलाइ पिरिम अद्द तालिम दिन सक्द्या छन्। 5 रे तिनु समझदार, बइकानका अधिनमि बस्या, आफना मउकपिलाको रेखदेख अद्द्या, दयालु हुनाइलाइ तालिम दिउन्, ताकि परमेस्वरका बचनको निन्दा हुन नपाउ। 6 तसोइ अरि ज्वान मान्सलाइ लइ आफुइलाइ बसमि राख्दसक्द्या हुनाइलाइ अर्ति दे। 7 तु आफुइ लइ सप्पइ कुरामि असल नमुना भइबर धेका। रे तेरा सिछ्यामि इमान्दारिता, गम्भिरता, 8 रे कसइले खिसि अद्द नपाउन्या ठिक बोलि हउ, ताकि हामरा बिरुद्मि खराबि कुरा केइ लइ नपाइबर हामरा बिरोधि सर्ममि पडुन्। 9 नउकरलाइ लइ आफना मालिकका अधिनमि रइबर हरेक कुरामि आफना मालिकलाइ खुसि पाड्डया आदेस दे। रे तिनु मुख लाग्द्या जनहउन्। 10 तिनुले नचोरुन् तर सप्पइ कुरामि बिस्वासयोग्य हउन्। यसेरि तिनुले अर्या सप्पइ कामबटहइ मुक्तिदाता परमेस्वरका बारेमि सिकाया कुराको आदर हउ। 11 क्यालाइकि सप्पइ मान्सका मुक्तिकि निउति परमेस्वरले आफनो अनुग्रह धेकाया छन्। 12 यइ अनुग्रहले हामुलाइ परमेस्वरको भक्ति नअद्द्या जिबन रे सान्सारिक लालचलाइ त्याग्द लाउछ, आफुइलाइ रे आफुइलाइ बसमि राखि सन्सारमि साँचो परमेस्वरलाइ भक्ति अद्द्या जिबन बिताउनाइलाइ तालिम दिन्छ। 13 यसेरि हामुले आसा राख्या कुरा पुरा हुन्या दिनको बाटो हेद्दाउ। माहान परमेस्वर रे हामुलाइ मुक्ति दिन्या इसु ख्रिस्टको तइ दिन ठुलो सम्मान भया धेकिन्या छ। 14 इसु ख्रिस्टले हामुलाइ सप्पइ किसमका पापबटहइ छुट्कारा दिनाइलाइ आफनो जिबन दियो। उनुले हामुलाइ पबित्तर पाड्डाइलाइ आफनो बनायो रे असल काम अद्द्या रे जोसिला बनायो। 15 तुइले यिनु कुराको सिछ्या दिन्याबेला पुरा अधिकारसहित अर्ति-उपदेस दे रे हप्का। कसइले लइ तुलाइ हेला अद्द जनपाउ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.