तितस 1 - डोटेलि1 परमेस्वरको दास रे ख्रिस्ट इसुको प्रेरित मु पावलकातर्फबटहइ यो चिट्ठि लेख्दाछु। परमेस्वरले मुलाइ छान्यो रे उनरा चुनियाको बिस्वास बलियो बनाउनाइलाइ रे परमेस्वरलाइ मन पड्या जिबनसित मिल्ल्या सत्यको ग्यानतिर तिनुलाइ डोर्याउनाइलाइ मु खटाया हुँ। 2 तइ बिस्वास रे ग्यानले कभइ नमद्दया जिबनको आसा दिन्छ। रे कभइ झुटि नबोल्या परमेस्वरले सिरिस्टि हुनभुन्ना अगाडिबटहइ हामुलाइ यो जिबन दिनउ भुनिबर प्रतिग्या अर्या थ्यो। 3 पइ ठिक समयमि उनुले आफनो बचन धेकायो। जो बचन सुनाउनाइलाइ हामुलाइ मुक्ति दिन्या परमेस्वरका आग्याबटहइ मुलाइ जिम्मा दियाछन्। 4 मुसित एकइ बिस्वासमि भया मेरो साँचो चेलो तितस तुलाइ मु यो चिट्ठि लेख्दा छु। परमेस्वर पिता रे हामुलाइ मुक्ति दिन्या ख्रिस्ट इसुले तुलाइ अनुग्रह रे सान्ति दिउन्। क्रेट टापुमि तितसको सेबा 5 ताँ बाकि रया काम पुरा अद्दाइलाइ मुइले तुलाइ क्रेटमि छाड्या हुँ। तबइलाइ मुइले भुन्या जसेरि तुइले सप्पइ सहरमि एल्डर निउक्ति अद्दु। 6 मण्डलिका एल्डर कसइले लइ दोस लाउन नसक्द्या, एकइ स्वाइनिका बइकान, दोस नभया रे तिनरा चेला-चेलि असल बिस्वासि, इमान्दार रे आग्याकारि हुनुपड्डछ। 7 क्यालाइकि परमेस्वरका कामको जिम्मा लिया हुनाले मण्डलिको अगुवा दोस नभया हुनपणन्छ। तिनु आफु खुसि अद्या, छिट्टाइ रिसाउन्या, जण्या, मारपिट अद्द्या रे धनको लोबि हुनुहुनइन्। 8 तर पाउनाको स्वागत-सत्कार अद्या, भलाइ, पिरिम, आत्मा-संयमि, इमानदार, पबित्तर रे अनुसासित हुनपडन्छ। 9 तिनुलाइ सिकाइया बिस्वासयोग्य बचनमि तिनु बलिया होइबर बस्सु पणन्छ, ताकि तिनुले पक्का सिद्दान्तअन्सार सिछ्या दिन सकुन्, रे यइ सिछ्याको बिरोद अद्द्याको गल्तिलाइ धेकाइदिन्या हुनुपड्न्छ। 10 क्यालाइकि ताँ अधिनमि बस्स नचाहान्या, देखाओटि, अर्थ नभया कुरा अद्या, झुटा बोल्या भउतइ छन्। तिनुमि लगभग भउतइ जसा त यहुदि खतना अद्द्या नियम मान्नइ पडन्छ भन्न्याहुन्या हुन्। 11 तिनरो मुख बन्द अद्दइ पडन्छ, क्यालाइकि आफनो निजि स्वार्थबटहइ पइसा कमाउनाइलाइ तिनुले सिकाउनइ नहुन्या कुरा सिकाइबर सप्पइ मउकपिलामि भाणभइलो मच्चाइराइछन्। 12 क्रेटका एक जना अगमबक्ताले यसेरि भुन्या छन्, “क्रेटका मान्स सप्पइ झुटि बोल्या, दुस्ट पसु रे अल्छि रे काँहार छन्।” 13 यो कुरडि साँच्चि हो। तबइलाइ तिनुलाइ कडासित हप्का, ताकि तिनु बिस्वासमि पक्का हउन्। 14 आब यहुदिका बनावटि कथा रे सत्यलाइ नमान्या मान्सका आग्यालाइ जनमानेइ। 15 सुद्द मान्सलाइ सप्पइ थोक सुद्दइ हुनाछन्। तर असुद्द रे बिस्वास नअद्याकि निउति भन्या केइ कुरा लइ सुद्द हुनइन्। क्यालाइकि तिनरो मन रे बिबेकसमेत असुद्द भया हुन्छ। 16 तिनुले परमेस्वरलाइ चिन्या छु भुनिबर दाबि त अद्दाछन्, तर तिनरा कामले भन्या परमेस्वरलाइ इन्कार अद्दछ भनि धेकाउछ तिनु घिनलाग्दा रे अनाग्याकारि हुनाछन्, रे केइ निका कामकि निउति योग्यका लइ हुनाइन्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.