लूका 21 - डोटेलिबिधुवाले दिया भेटि ( मर्कुस १२:४१-४४ ) 1 इसुले हेरन्ज्या धनिनले आफना आफना भेटि मन्धिरका दानपेटिकामि राख्या धेक्यो। 2 इसुले एक गरिब बिधुवालाइ ताँ दुइ पइसा चढायालइ धेक्यो। 3 तबइ उनुले भुन्यो, “साँच्चि मु तमखि भुन्नउ यइ गरिब बिधुवाले अउर सप्पइका हइ बर्ता भेटि चढाइराइ छ। 4 क्यालाइकि यिनुन सप्पइले आफना बर्ता बटहइ भेटि चढाया छ, रे यइले आफु गरिब होइबर लइ आफनो सारा जिबन चलाउन्या खर्च चडायो।” इसुले येरुसलेमको मन्धिर नास हुन्या बिसयमि भुन्यो ( मत्ति २४:१-४१ ; मर्कुस १३:१-१३ ) 5 आब कसइ कसइ सिस्यानले निका निका ढुङाले बनाइया रे चडाया भेटिबटहइ सिङारिया मन्धिरका बिसयमि कुरा अद्द लाग्या। रे इसुले भुन्यो, 6 “तमुले जि अइले धेक्द्दा छउ, यसो बेला आउन्या छ जब एक ढुङो अर्खा ढुङामि रन्या आथिन् तिन जम्माइ भत्किन्याछन्।” 7 तिनुनले उनलाइ सोध्यो, “गुरुज्यु, यिन सप्पइ कुरा कब हुन्याछन्? रे यो कुरा हुन्ज्या कि चिन्ह हुन्या छ ब?” 8 उनुले भुन्यो, “होसियार बस, तमुलाइ कसइले जनबहकाउ। क्यालाइकि मेरा नाउँमि कतिबइ जना ‘मु ख्रिस्ट हुँ, भुन्नाइ आउन्या छन्।’ रे ‘समय नजिकइ छ’ भुन्न्या छन्, तनुनका पाछा जनलागउ। 9 तमुले जबइ युद्दका होहल्ला रे लडाइ झगडा भया कुरा सुन्या छउ तबइ जनडरा, क्यालाइकि पइलि यिन घटना हुनपड्या छ, रे अन्त्य तन्जेइ हुन्या आथिन्।” 10 तबइ इसुले अज तिनुनलाइ भुन्यो, “जाति जातिका बिरुद्मि रे राज्य, राज्यका बिरुद्मि उठ्याछन्। 11 भंयकर भुइचालो जान्या छ। भउत ठउँरमि अनिकाल रे महामारि हुन्या छ, भंयकर आतंक्क हुन्या छ रे अग्गासमि ठुला ठुला चिन्ह धेकिन्या छन्। 12 रे यिन सप्पइ कुरा हुनाहइ अगाडि, मान्सनले तमुलाइ पकड्या छन्, सताउन्याछन्, तमुलाइ सभाघरमि सुम्पिन्या छन् रे झेलखानामि हालदिन्या छन्। तमुलाइ मेरा नाउँका खातिर राजान रे हाकिमका अगाडि पुर्याउन्या छन्। 13 रे तमरा निउति यो एक साक्छि दिन्या अबसर हुन्या छ। 14 तबइलाइ आफना बचाउका निउति कि भन्या हो भनिबर पटकइ चिन्ता जनअर, 15 क्यालाइकि मु तमलाइ यसो बोल्या मुख रे बुद्दि दिन्याछु, कि तमरा बिरोधिनले तमरो प्रति उत्तर दिन सक्द्या आथिनन्। 16 रे तमरा इजा-बा रे दाइ भाइ, नातेदार रे सङिले लइ तमुलाइ पकडाइ दिन्याछन्, रे तमुमध्ये कसइ कसइलाइ तिनुनले माद्याछन्। 17 मेरा नाउँका खातिर तमुलाइ सप्पइ मान्सले घिणा अद्या छन्। 18 रे तमरा मुन्टाका एकलइ रउ नास हुन्या आथिन्। 19 तमरा आफना धइर्य बटहइ आफनो जिबन पाउन्याछउ। यरुसलेम सहर नास हुन्या छ भणि इसुले भुन्यो ( मत्ति २४:१५-२१ ; मर्कुस १३:१४-१९ ) 20 “यरुसलेम सहरलाइ सेनानले घेरा हाल्या धेक्या पाछा, आब सहरको नास हुन्याबेला आया छ भणि तमुले जान। 21 तबइ यहुदिया प्रदेसमि हुन्यान डाँणातिर भागुन, सहर भित्र हुन्यान सहर बाइर भागुन, रे बाइर गाँउमि हुन्यान सहर भित्र जनपसुन। 22 क्यालाइकि धर्म- सास्त्तरमि लेखिया कुरा सप्पइ पुरा हुनाइलाइ यिन सजाइ पाउन्या दिन हुन्याछन्। 23 कठइ, तन दिनमि बच्चा पाउनेइ रे दुध ख्वाउनेइ स्वानिका निउति असजि बेला हुन्या छ! क्यालाइकि धर्तिमि ठुलो सङकस्ट आउन्या छ, रे यइ जातिमि दण्ड आउन्या छ। 24 तिनुन तरबारले मारिन्या छन्, रे सप्पइ देसमि कइदि बनाइबर लइजाइन्या छन्। रे अउरजातिको समय पुरा नभयासम्म तिनुनले यरुसलेमलाइ कुल्चिमिल्चि राख्द्या छन्। मान्सका चेलाको अगमन ( मत्ति २४:२९-३१ ; मर्कुस १३:२४-२७ ) 25 “सुर्य, जुन रे तारामि चिन्ह धेकिन्या छन्, रे समुन्दरको गर्जन रे छालले अरन्ज्या धर्तिका सप्पइ जातका मान्सन सङकस्टमि पडिबर हइरान हुन्याछन्। 26 सन्सारमि हुन आउन्या घटनाका बिसयमि सुनिबर मान्सन मुर्छा पड्याछन्, क्यालाइकि अग्गासको सक्ति हल्लिन्या छन्। 27 तइपाछा मान्सको चेलोलइ ठुला सक्ति रे माहान महिमासङ बादलमि आउन्नारया तिनुनले धेक्द्या छन्। 28 जबइ यिन कुरा हुनाहान् तबइ साहासि भइबर मल्तिर हेर क्यालाइकि तमरो उद्दार नजिकइ आइरइछ।” तिम्लाका रुखबटहइ सिछ्या ( मत्ति २४:३२-३५ ; मर्कुस १३:२८-३१ ) 29 इसुले तिनुनलाइ एक उखान भुन्यो, “तिन्लाको रुख रे सप्पइ रुखलाइ हेर। 30 तिनमि पालुवा फेरिया धेकिबर तमु आफुइ थाँ पाउन्याछउ, कि गर्मिको बेला नजिकइ छ। 31 तसेरि तमु लइ जब यिन कुरा होइरया धेक्द्या छउ, तबइ परमेस्वरको राज्य नजिकइ छ भनि जान। 32 “साँच्चि मु तमखि भन्नउ यिन सप्पइ घटना पुरा नभयासम्म यो पुस्ता बित्या आथिन्। 33 अग्गास रे धर्ति बितिजान्या छ, रे मेरा बचन कभइ बित्या आथिन्। होसियार बस 34 “रे तमु आफना बिसयमि होसियार बस, नति त भोग बिलासमि मात्तिबर रे जिबनका चिन्ता फिक्रिले तमरो मन दबाइ राख्द्या छ। रे तमुमि एकइबर त्यो दिन पासोहाल्या जसेरि आउन्या छ। 35 क्यालाकि इसेरि सारा धर्तिमि बास अद्या सप्पइ मान्सनमि यो आइपड्या छ। 36 तबइलाइ चल्लाख होइबर बस, रे आउन्या यिन सप्पइ कुरा बटहइ उम्कनाइलाइ रे मान्सका चेलाका अगाडि कल्लिन सक्द्या सक्ति पाउनाइलाइ प्रार्थना अर।” 37 इसुले दिनमि मन्धिरमि सिछ्या दिन्थ्या रे रात जाइबर जइतुन भनिन्या डाँणामि रात बिताउथ्या। 38 उनरो बचन सुन्नाइलाइ सप्पइ मान्स ब्याहानइ मन्धिरमि आउथ्या। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.