लूका 2 - डोटेलिइसुको जनम ( मत्ति १:१८-२५ ) 1 तइबेला रोमका माहाराजा अगसटसले तनरा राज्यका सप्पइ मान्सनका नाउँ लेखाइबर गणना अर्नु पण्यो भनि हुकुम अर्यो। 2 तइ राज्यका मान्सन गन्या कुरडि पल्लिबार भइ तइबेला कुरेनियस नाउँ भया सिरियाका ठुला हाकिम थ्या। 3 तइ हुकुम अन्सार सप्पइ मान्स आफना आफना पुर्खाका ठउँर नाउँ लेखाउनाइलाइ गया। 4 तइबेला योसेफ गालिलका नासरत भन्या सहरमि बसन्थ्या, उनरा पुर्खा दाउदको सहर बेथलेहेम थ्यो। क्यालाइकि उन दाउदका कुलका सन्तान थ्या, तबइलाइ तिन नाउँ लेखाउनाकि बेथलेहेममि गया। 5 योसेफसित मरियमको ब्या हुन्या कुरडि पक्कि थिइ तबइलाइ तनले मरियमलाइ आफुसित लइया, तइबेला मरियमको बच्चा पाउन्या बेला थ्यो। 6 तिनुन बेथलेहेममि हुनज्या मरियमको बच्चा पाउन्या बेला आयो। 7 तिनले आफनो जेठो चेलो जन्मायो रे उनलाइ टालाले बेणिबर गोठका डुणमि सियालिदियो क्यालाइकि तिनले धर्मसालामि ठउँर पाएन्। ग्वाला रे स्वर्गदुत 8 बेथलेहेम सहरका नजिकइ चउणमि ग्वाला भेडाको हेरबिचार अद्दाकि रात ताँइ काटाथ्या। 9 परमप्रभुका स्वर्गदुत तनरा वाँ धेकिया परमप्रभुको उजालो तिनरा चारइतिर चम्कियो, त्यो धेकिबर ग्वाला डरले काम्द लाग्या। 10 स्वर्गदुतले तिनुनलाइ भुन्यो, “जनडरा! सुण, क्यालाइकि मु सप्पइ मान्सनलाइ बडो आनन्न दिन्या असल रइबार लेइबर तमरा वाँ आइरइछु। 11 आज दाउदका सहरमि तमरि निउति एक जनो मुक्तिदाताको जनम होइरइछ, जो ख्रिस्ट प्रभु हुन्। 12 तमले बालखलाइ टालामि बेणिबर गोठका डुणमि स्याइ राख्या धेग्द्याछउ इस्या तमुले उनलाइ पछेन्या छउ।” 13 तनज्या ताँ अउरलइ स्वर्गदुत धेकिया, परमेस्वरको बडाइ अद्दाइ गित गाउन लाग्या। 14 “स्वर्गमि बस्या परमेस्वरको जयजयकार होइरउ। रे धर्तिमि जइ मान्सनसित उन खुसि छन्, तिनुनलाइ सान्ति होइरउ।” 15 स्वर्गदुत बिदा भयापइतर ग्वालानले भुन्यो कि, “परमप्रभुले हामुलाइ भन्याअन्सार बेथलेहेममि लउ हिट हेद्दाइ जानाउ।” 16 रे तिनुन अतासिबर बेथलेहेम गया। ताँ तिनुनले मरियम, योसेफ रे डुणमि सियाइ राख्या बालखलाइ धेक्यो। 17 यो धेकिबर ग्वालानले बालखका बारेमि स्वर्गदुतले भणेइ कुरडि सप्पइलाइ सुनाइदियो। 18 तन कुरडि सुन्या मान्स जति सप्पइ अचम्ममि पण्या। 19 मरियमले यिन जम्माइ कुरडि बिचार अरिबर आफना मनइनि राख्यो। 20 ग्वालानले स्वर्गदुतले भणेइ कुरडि सुन्न, धेग्द् पाया हुनाले परमेस्वरको महिमा रे प्रसम्सा अद्दाअदाइ फर्किया। बालखको नाउँ इसु राख्यो 21 बालख जनमिया आठउ दिनमि इज्राएलिका निएम अन्सार खतना अरन्ज्या उनरो नाउँ इसु राखियो, जो नाउँ उनरा इजाका गर्बमि हुनाहइ पइलि स्वर्गदुतले राख्या भन्याथ्यो। मन्धिरमि इसुलाइ अर्पण अर्यो 22 ब्यबस्था अन्सार तनरो चोख्याउन्या बेला पुरा भयो, उनरा बा इजाले उनलाइ यरुसलेमका मन्धिरमि परमप्रभुका अगाडि अर्पण अद्दाइलाइ लेया। 23 क्यालाइकि परमप्रभुका निएममि लेखिया छ, “पइलो जनम्या जेठो चेलो परमप्रभुकि निउति अर्पण अरिन्या छ।” 24 परमप्रभुका ब्यबस्था अन्सार ढुकुर या, परेवा एक जोडा लेइबर बलि चणाउन्थ्या। 25 तइबेला सिमियोन यरुसलेममि बसन्थ्या। तन धर्मि मान्स थ्या, रे परमेस्वरको भक्ति अरन्थ्या, तन इज्राएलिलाइ बचाउन्या मान्सको बाटो हेर्रइथ्या पबित्तर आत्मा तनसित थ्या। 26 “परमप्रभुले पठाया मुक्तिदिन्या ख्रिस्टलाइ नधेकि मद्या आथिन्” भनिबर पबित्तर आत्माले अगाडि बटहइ सिमियोनलाइ जणायो थ्यो। 27 पबित्तर आत्माबटहइ था पाइबर सिमियोन मन्धिरमि गया, ततिबेला परमेस्वरको ब्यबस्था पुरा अद्दाइलाइ मरियम रे योसेफले इसुलाइ लेइबर मन्धिरमि आया। 28 सिमियोनले इसुलाइ आफना काखिमि समाइबर परमेस्वरको प्रसम्सा अद्दाइ भुन्यो। सिमियोनको प्रसम्सा 29 “परमेस्वरले आफना प्रतिग्या पुरा अद्दाहान्। आब मु सान्तिले मद् पाउ। 30 क्यालाइकि तमले पठाया मुक्ति दिन्यालाइ मुइले आफनाइ आँखाले धेक्द् पाया। 31 जो तमले सप्पइ मान्सका अगाडि तयार पाण्या छउ। 32 उन अउरजातिनका मान्सलाइ बाटो धेकाउन्या उजालो हुन्। तमरा जाति इज्राएलिकि निउति महिमा हुन।” 33 बालखका बारेमि सिमियोनले भुन्या कुरडि इसुका इजा-बाले सुनिबर अचम्ममि पण्या। 34 सिमियोनले तनलाइ आर्सिबाद दिबर बालखइ इजा मरियमलाइ भुन्यो, “सुन इज्राएलमि मुक्तिदिन्या रे नास अद्या भनिबर परमेस्वरले तमरा बालखलाइ छान्याछन्, परमेस्वरले धेकाया चिन्ह हुन्। कतिबइले निको नमाणिबर आफना ह्रिदयका बिचार धेकाउन्या छन्। 35 तमरा ह्रिदयमि तिखा तरबारले घोच्याजस्यो भउत पिडा हुन्याछ।” 36 मन्धिरमि हन्ना बुडि जो अगमबादिनि थिन्, तिन आसेरका कुलकि फनुएलकि चेलि थिन्, तिन ब्या भया सात बर्समि बिधुवा भएइथिन्। 37 तिन चउरासि बर्सकि थिन् रे तिन मन्धिर छाणन्थिनन्, उबास, प्रार्थना रे आराधना दिनरात अरन्थिन् परमेस्वरलाइ माणन्थिन्। 38 उनुले मरियम रे योसेफका नजिक आइबर परमेस्वरलाइ धन्यबाद दिइबर यरुसलेमलाइ छुटाउन्याको बाटो हेद्यानलाइ इसुका बारेमि बताइन्। 39 परमप्रभुको ब्यबस्था अन्सार अद्या जति सप्पइ निएम अरिसकिबर योसेफ रे मरियमले इसुलाइ लेइबर आफना सहर नासरत फर्किया। 40 इसु तागतमि, बुदिमि ग्यानमि भरिनाइ गया परमेस्वरको अनुग्रह उनमि थ्यो। इसु मन्धिरमि 41 इसुका इजा-बा एक बर्समि हुन्या निस्तार चाड मान्नाइलाइ यरुसलेममि जान्थ्या। 42 इसु बार बर्सका हुनज्या उनरा इजा-बाले आफना रिति अन्सार उनलाइ लइजाइबर चाड मान्न गया। 43 चाड माणिसक्या पाछा, तिन आफना घर फर्किया। इसु यरुसलेममि बस्या, त्यो कुरा इसुका इजा-बालाइ था थेइन्। 44 इसु आफना सङिसित आउन्नाछन्, भनिबर तन दिनभरिकाइ बाटामि हिट्या। बसाइतिकलइ उनलाइ नपायाहुनाले तिनुनले आफन्तका वाँ रे चिन्याजान्या वाँ इसुलाइ खोज्ज लाग्या। 45 तनले इसुलाइ नपायाहुनाले खोज्जाइलाइ यरुसलेम फर्किबर गया। 46 खोज्जा खोज्जाइ तेसरा दिनमि तिनुनले इसुलाइ मन्धिरमि भेट्यो, इसु धर्म-गुरुसित बसिरइथ्या रे उनरा कुरा सुनिबर प्रस्न सोधाथ्या। 47 उनरो ग्यान, समझ रे भन्या कुरडि सुनिबर सप्पइ अचम्ममि पण्या। 48 इसेरि आफनो चेलो ताँ धेकिबर उनरा बा इजा अचम्ममि पण्या, “मरियमले भुन्यो ए चेलो तुइले यसो क्यारि? हेर, तेरा बा लइ मुलइ अतासिबर तु लाइ खोज्जाथ्या।” 49 इसुले भुन्यो “तमले मुलाइ क्याकि खोज्या? मु आफना परमेस्वर पिताका घरमि हुनपणन्छ। भन्या कुरडि कि तमलाइ थाँ थेइन?” 50 इसुले भुन्या कुरडि मरियम रे योसेफले बुझेन्। 51 तइपाछा इसु आफना इजा-बा सित नासरत फर्किया, उनरो भण्या मानिबर बस्या। इन जम्माइ कुरडि मरियमले आफना मनइनि राख्यो। 52 इसु परमेस्वर रे मान्सका अनुग्रह पाइबर सरिलमि, समझमि बड्डाइ गया। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.