लूका 19 - डोटेलिकर उठाउन्या जखायस 1 इसु यरिहो सहरमि प्रवेस अरिबर ताँ बटहइ जान्नाथ्या। 2 ताँ जखायस नाउँ भया एक जनो मान्स थ्यो। तिन कर उठाउन्यामिका प्रमुख मान्स थ्या, रे धनि लइ थ्या। 3 उनुले इसु को हुन भणिबर हेद्द चाहान्थ्या, रे पुट्को भया हुनाले भिडले अरन्ज्या तिनले इसुलाइ धेक्द सकेन्। 4 तबइलाइ तिन उनलाइ हेद्दाइलाइ अगाडि दगुडिबर एक तिम्लाका रुखमि चढ्या। क्यालाइकि इसु तसइ बाटो भइबर जान्नाथ्या। 5 जबइ इसु तइ ठउँर आइ पुग्या, उनुले मल्तिर हेरिबर तिनलाइ भुन्यो, “ए जखायस, छिट्टाइ तल्तिर ओरलिबर आस, क्यालाइकि आज मुलाइ तमरा घरमि बस्स पण्या छ।” 6 जखायस छिट्टाइ ओरलिबर आया। रे खुसि होइबर उनरो सत्कार अर्यो। 7 जबइ मान्सनले यो धेक्यो, तिनुन सप्पइ यसो भनिबर गनगन अद्लाग्या, “इन मान्स त पापिका घरमि पाउना लाग्द गया।” 8 जखायासले उठिबर प्रभुलाइ भुन्यो, “प्रभु, सुन, मु आफनो सम्पतिको आधा भाग गरिबनलाइ दिनउ, रे कसइबटहइ अन्याय अरिबर केइ लिराइछु भन्या मु तइको चार गुण फिर्ता अर्दिन्या छु।” 9 तबइ इसुले तिनलाइ भुन्यो, “आज यइ घरमि मुक्ति आइरइछ, क्यालाइकि यिनलइ अब्राहामका सान्तान हुन्। 10 क्यालाइकि मान्सको चेलो हरायालाइ खोज्ज रे बचाउन आया हो।” सुनका सिक्काको उखान ( मत्ति २५:१४-३० ) 11 तिनुनले यिन कुरा सुन्नासुन्नाइ इसुले तिनुनलाइ एक उखान भुन्न लाग्या, क्यालाइकि उन येरुसलेमका नजिकइ आइ पुग्या थ्या, रे मान्सन परमेस्वरको राज्य छिट्टाइ प्रकट हुन्ना छ भन्या समझन्नाथ्या। 12 उनुले भुन्यो, “एक जनो खान्दानि मान्स राज्य अद्या अधिकार पाइबर फर्कि आउलो भनि कसइ दुर देसमि गयो। 13 तिनले आफना दस जना नउकरलाइ बोलाइबर तिनुनलाइ दस सुनका सिक्का दिबर भुन्यो, ‘जबसम्म मु फर्कि आउनइन येइबटहइ ब्यापार अर।’ 14 रे तिनरा प्रजा तिनलाइ घिणा अरन्थ्या रे तिनरा प्रजाले पाछापाछा यसो भनिबर रइबार पठायो, ‘तिनले हाम्मि राज्य अर्या हाम चाहानाइन।’ 15 “तबइ राज्यको अधिकार पाया पाछा आफुले पइसा दिया नउकरलाइ आफना वा बोलाउन्या हुकुम दियो, रे ब्यापारबटहइ तिनुनले कति नाफा अर्यो भन्या तिनले जान्न चायो। 16 तबइ पइलो नउकर आइबर यसो भुन्यो, ‘मालिक, तमले दिया सिक्काले अज दस सिक्का कमाया छु।’ 17 तिनले तइ नउकरलाइ भुन्यो, ‘स्याब्बास असल नउकर, तु भउत नाना कुरामि बिस्वासि भइ, तुइले दस सहरमि अधिकार पाउन्या छइ।’ 18 दोसरो नउकर आइबर यसो भुन्यो, ‘मालिक तमले दिया सिक्काले अउर पाँच सिक्का कमाया छु।’ 19 तिनले तइलाइ भुन्यो, ‘तुइले लइ पाँच सहरमि अधिकार पाउन्या छइ।’ 20 रे अर्खो नउकरलइ आइबर यसो भुन्यो, ‘मालिक, हेर तमले दिया सिक्का याँ छ। यो मुइले रुमालमि पोको पाडिबर राख्याथ्या। 21 मु तमसङ डराया, क्यालाइकि तम कठोर मान्स हउ। जो तम राख्दानु त्यो लिन्छउ, रे जो बुनानु तसइको कटनि अरनछउ।’ 22 तिनले तइलाइ भुन्यो, ‘ए दुस्ट नउकर! तेराइ मुखका कुरा बटहइ मु तुलाइ दोसि ठराउन्या छु, जे राखिनइन् त्यो लिन्या जे बोइनइन तइको कटनि अद्या मु कठोर मान्स हु भनिबर तुइले जाण्याकोइ थिइ। 23 तबइ मेरो सिक्का ब्याजमि क्याकि लाइनि? मु आइबर तइ पइसाको ब्याजसमेत पाउनेइथिउ।’ 24 तबइ नजिकइ कल्लियालाइ तिनले भुन्यो, ‘तइबटहइ त्यो सिक्का लिबर दस सिक्का हुन्यालाइ दिइहाल्।’ 25 तिनुनले तनलाइ भुन्यो, ‘हजुर, तइसङ त दस सिक्का छनइछन्!’ 26 तइ मान्सले भुन्यो ‘मु तमुलाइ भुन्नउ, जइसङ छ तइलाइ अज बर्ता दिइन्या छ, रे जइसङ आथिन् तइसङ भयालइ तइबटहइ खोसिन्या छ। 27 रे मुइले तिनुनमि राज अर्या नचाहान्या मेरा तिन सत्तुरनलाइ याँ ल्यास्, रे तिनुनलाइ मेराइ अगाडि मार।’” यरुसलेममि इसुको प्रवेस ( मत्ति २१:१-११ ; मर्कुस ११:१-११ ; युहन्ना १२:१२-१९ ) 28 इसुले यिन कुरा भनिसक्या पाछा, उन तिनुनका अगाडि अगाडि यरुसलेमतिर लाग्या। 29 जबइ उन बेथफागे रे बेथानिया गाँउका नजिक जइतुन भनिन्या डाँणामि पुग्या, उनुले आफना सिस्यानमध्येका दुइ जनालाइ यसो भुनिबर पठायो, 30 “तमु नजिकइका गाउँमि जाँ रे भित्र पस्सापस्साइ तमुले गधाको एक बछेडो बाध्या भेट्टाउन्या छउ, जइमि अइलसम्म कोइ मान्स चड्या आथिन्। तइलाइ फुकाइबर याँ लेइबर आस्। 31 कसइले येइलाइ क्याकि फुकाउन्छउ? भुनिबर तमुलाइ सोध्याले, प्रभुलाइ यइको खाँचो छ भुण्या।” 32 तिन पठाइया सिस्यान गया रे उनुले तिनुनलाइ जसो भन्याथ्यो तसोइ गधाको बछेडो भिट्यो। 33 तिनुनले बछेडो फुकाउनज्या बछेडाका मालिकले तिनुनलाइ सोध्यो, “तमु यो बछेडो क्याकि फुकाउनाछउ?” 34 तिनुनले भुन्यो, “प्रभुलाइ यइको खाँचो छ।” 35 सिस्यानले तइलाइ इसुका वाँ लेया। रे आफना लत्ता बछेडाका पिठिमि हालिबर इसुलाइ तइमि चडायो। 36 उन जान्ज्या मान्सनले आफना लत्ता बाटामि बिछायो। 37 इसु यरुसलेमका नजिकइ जइतुन डाँणाका ओरालाइनि आउन्ज्या, तइबेला इसुले अर्या सक्तिसालि कामलाइ सम्जिबर सिस्यानले रमाउनाइ ठुला सोरमि परमेस्वरको प्रसम्सा अद्द लाग्या। 38 “परमप्रभुका नाउँमि आउन्या राजा धन्यका हुन्। स्वर्गमि सान्ति रे परमेस्वरको महिमा।” 39 रे भिडमिका कसइ कसइ फरिसिले उनलाइ भुन्यो, “हे गुरु, तमरा सिस्यानलाइ हकार।” 40 रे उनुले भुन्यो, “मु तमलाइ भुन्नउ यिनुन चुप लाग्याले ढुङा कला हाल्या छन्।” इसु यरुसलेम धेकिबर रोया 41 जबइ इसु यरुसलेम सहर नजिकइ आइ पुग्या तइ सहरलाइ धेकिबर रोया, 42 “सान्ति कि कुराले ल्याउछ भनिबर तुइले आजलइ जान्या भयाले हुनेइथ्यो! रे तुइले त्यो धेक्द सकिनि! 43 क्यालाइकि तु मि इसा दिन आउन्याछन्, जबइ तेरा सत्तुरले तेरो वरिपरि घेरा हाल्याछन् रे सप्पइतिर बटहइ तुलाइ थुनिराख्द्या छन्। 44 तिनुनले तु लाइ रे तुभित्र बास अद्या तेरा सन्तानलाइ नास अद्या छन्, रे एक ढुङामि अर्खो ढुङो रन्या आथिन्, क्यालाइकि परमेस्वरले बचाउन आया समयलाइ तुइले चिन्न सकिनि।” इसु मन्धिरमि गया ( मत्ति २१:१२-१७ ; मर्कुस ११:१५-१९ ; युहन्ना २:१३-२२ ) 45 इसु मन्धिर भित्र पस्या रे किनबेच अद्दारयालाइ निकालिदियो। 46 रे तिनुनलाइ भुन्यो, “धर्म- सास्त्तरमि लेखिया छ, ‘मेरो घर प्रार्थनाको घर हुन्या छ’ रे तमुले येइलाइ डाकुको अड्डा बनाया छउ।” 47 तइपाछा इसु दिन दिनइ मन्धिरमि सिछ्या दिन्थ्या। रे मुख्य पुजारि, धर्म-गुरु रे मान्सका प्रमुख अगुवानले उनलाइ माद्द खोजन्थ्या। 48 तिनुनले उनलाइ माद्दाइ केइ उपाय पायेन्, क्यालाइकि सप्पइ मान्स उनरा सिछ्यामि मगन थ्या। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.