प्रेरित 6 - डोटेलिसात जना सेबकको नियुक्ति 1 तइ समयमि सिस्यानको संख्या बड्डइ जान्ज्या, ग्रिक भासा बोल्या रे हिब्रु भासा बोल्या यहुदिनका बिचमि भुणाभुण चल्ल लाग्यो। दिनदिनि खान्या कुरा बाणन्ज्या तिनुनका बिधुवानको वास्ता भएन भन्न्या ग्रिक भासा बोल्या यहुदिनको भुणाइ थ्यो। 2 तबइ बारइ प्रेरितनले अउर सिस्यानलाइ लइ बोलाइबर भुन्यो, “परमेस्वरको बचन प्रचार अद्द छाडिबर ख्वाउन्या प्याउन्या सेबा अद्द हामुलाइ उचित आथिन्। 3 तबइलाइ दाइभाइन हो, तमु मध्ये पबित्तर आत्मा रे बुद्दिले भरिया सप्पइको आदर पाया सात जना मान्सन छान, जइलाइ हाम यइ काममि नियुक्ति अद्दाउ। 4 रे हाम प्रार्थना रे बचन प्रचारका काममि पुराइ समय दिन्याछउ।” 5 भेला भया सप्पइलाइ यो कुरा निको लाग्यो। तिनुनले बिस्वास अर्या रे पबित्तर आत्माले भरिपुर भया स्तिफनस, फिलिप, प्रखरस, निकनोर, तिमोन, पर्मिनास, रे एन्टिओखियाका यहुदि मत मान्या निकोलाउसलाइ छान्यो। 6 तिनुनले यिन मान्सलाइ प्रेरितनका अगाडि लेया रे प्रेरितनले तिनुनमि आफना हात राखिबर प्रार्थना अर्यो। 7 इसेरि परमेस्वरको बचन फइलिनोइ गयो, रे सिस्यानको संख्या यरुसलेममि झिग झिग बड्यो। पुजारिनमध्ये भउत जनाले लइ यइ बिस्वासलाइ सुइकार अर्यो। स्तिफनसलाइ पकणाउ अर्यो 8 स्तिफनसले प्रभुबटहइ भउत आसिस रे सक्ति पाइबर मान्सनका बिचमि ठुला ठुला अचम्मका काम रे चिन्ह अर्यो 9 तर कति मान्सनले उनरो बिरोध अद्द लाग्या। तिनुन यहुदि सभाघरका स्वतन्त्र भनिन्या दलका मान्सन रे अलेक्जेन्डिरिया सहर रे कुरेनि, किलिकिया रे एसिया इलाकाबटहइ आया यहुदिन थ्या। तिनुन सप्पइ मिलिबर स्तिफनसका बिरुद्दमि उठ्या। 10 तर पबित्तर आत्माले स्तिफनसलाइ यसो ग्यान रे सक्ति दियो, तिन बोलन्ज्या मान्सले तिनरा बिरोधमि बोल्लइ सकेन। 11 तबइलाइ तिनुनले गुप्तमि मान्सनलाइ उचालिबर यसो भुन्न लायो, “मोसा रे परमेस्वरका बिरुद्दमि यइले बोल्या हामले सुण्या।” 12 तबइ तिनुनले मान्सन, अगुवान, धर्म-गुरुनलाइ भड्कायो। रे स्तिफनसलाइ पकणिबर माहासभाका अगाडि लेया। 13 तइपाछा तिनुनले स्तिफनसका बिरुद्दमि इसा झुटा साछिनलाइ अगाडि सार्यो, “यइ मान्सले त जन्ज्या लइ हामरो पबित्तर मन्धिर रे मोसाले दिया ब्यबस्थाका बिरोधमि बोल्ल छाड्डइन्। 14 क्यालाइकि यइले यसो भुण्या हामले सुन्या, नासरतका इसुले यइ मन्धिरलाइ भत्काउन्या छन्, रे मोसाले हामुलाइ दिया रितिथिति लइ बदलि अरिन्या छ।” 15 तनज्याइ माहासभामि बस्यान सप्पइले स्तिफनसलाइ एकोहोरो होइबर हेरिरया, तिनरो अनार स्वर्गदुतको जसो उज्यालो भइबर चम्किन्ना थ्यो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.