प्रेरित 4 - डोटेलिमाहासभाका अगाडि पत्रुस रे युहन्ना 1 पत्रुस रे युहन्ना मान्सनसित कुरा अद्दा अद्दाइ, पुजारिन, सदुकिन रे मन्धिरको हेरबिचार अद्द्या कप्तान तिनरा वा आया। 2 उनुन रिसाया थ्या क्यालाइकि इसु मर्याबटहइ जिउना भया छन्, तबइलाइ अउर मर्या मान्सन लइ जिउना हुन्या छन्। भन्न्या कुरा तिनुनले मान्सनलाइ सिकाउन्नाथ्या। 3 तिनुनले पत्रुस रे युहन्नालाइ पकड्यो रे भोलिबारसम्म थुनिबर राख्यो, क्यालाइकि तइबेला बसाइतिक भइसक्याथ्यो। 4 रे तन दुइ प्रेरितनले अर्या प्रचार सुनिबर भउतनले इसुमि बिस्वास अर्यो, रे बिस्वास अद्द्या बइकान मान्सन लगभग पाँच हजार भया। 5 भोलिबार इनरा सासकन, अगुवान रे धर्म-गुरुन यरुसलेममि भेला भयाथ्या। 6 यइ सभामि हन्नास भन्या ठुला पुजारि, कइयाफा, युहन्ना, अलेक्जेन्डर रे ठुला पुरारिनका आफन्तन ताँइ थ्या। 7 तिनुनले पत्रुस रे युहन्नालाइ सभाका बिचमि कल्लेइबर सोदपुछ अर्यो, “कइ सक्तिबटहइ या कइका नाउँमि तमुले यइ लङ्गडोलाइ निको पाड्या हउ?” 8 तबइ पबित्तर आत्माले भरिबर पत्रुसले तिनुनलाइ भुन्यो, “मान्सनका सासक रे अगुवान हो, 9 आज हामले यइ लङ्गडो मान्सखिलाइ निका काम अर्या बिसयमि त्यो कि उपायले निको पाणियो भनिबर सोधपुछ अरन्छउ भन्या, 10 तमु सप्पइ रे इज्राएलका सारा मान्सनलाइ था हउ कि, तमुले क्रुसमि टाङिबर मार्या रे परमेस्वरले मर्याबटहइ जिउना पाण्या उनइ नासरतका इसु ख्रिस्टका नाउँमि यो मान्स तमरा अगाडि निको भइबर कलिया छ। 11 धर्म- सास्त्तरमि यो कुरणि इसुकाइ बिसयमि लेखिया हो, “घर बनाउन्या मान्सनले काम नलाग्द्या भनिबर खित्या ढुङो जसोइ उनइ हुन् जो अइल घराका जगको मुख्य ढुङो बन्यो।” 12 इसु ख्रिस्टबाहेक अउर कसइले लइ मान्सनलाइ मुक्ति दिन सक्दइन् क्यालाइकि हामले मुक्ति पाउनाइलाइ स्वर्गतल्तिर मान्सनमि अर्खो कोइ नाउँ दिइया आथिन्। 13 पत्रुस रे युहन्ना नपड्यालेख्या साधारण मान्सन थ्या, तबइ लइ तिनुनले नडराइबर बोल्या धेकिबर माहासभाका सप्पइ मान्सन अचम्म पण्या। यिनुन त इसुसङइ रनथ्या भन्न्या लइ तिनुनले था पायो। 14 तर तइ निको भया मान्सलाइ पत्रुस रे युहन्नासित कलिया धेकिबर तिनुनले उनरा बिरुद्दमि केइ बोल्ल सकेन। 15 तबइलाइ तिनुनले पत्रुस रे युहन्नालाइ माहासभाबटहइ बाइर जान्या आग्या दिबर तिनुन एक अर्कामि मिलिबर इसेरि सरसल्हा अद्द लाग्या, 16 “आब हाम इन दुइ मान्सलाइ क्याअद्दाउ? क्यालाइकि साँच्चिलइ यिनुनबटहइ कभइ नधेक्या अचम्मको काम होइरइछ भन्न्या यरुसलेमका बासिन्दा जम्माइलाइ था भइसक्या छ, रे हाम यइ कुरालाइ हइन भन्न सक्दाइन्। 17 तर यो कुरडि मान्सनमि नफइलियो भनिबर अज ‘इसुका नाउँमि कसइ मान्ससित तमुले केइ जनबोल्या’ भनिबर हामले यिनुनलाइ चेतावनि दिन पणन्छ।” 18 तइपाछा तिनुनले पत्रुस रे युहन्नालाइ भितर बोलाइबर भुन्यो, आबबटहइ इसुका नाउँमि बोल्लइ जनबोल्या रे कसइलाइ सिछ्या लइ जनदिया भनि चेतावनि दियो। 19 तर पत्रुस, युहन्नाले तिनुनलाइ भुन्यो, “तमुले भुण्या कुरा मान्नु कि परमेस्वरइले भुण्या कुरा मान्नु, परमेस्वरका अगाडि कि कुरा ठिक छ? तमु आफुइ बिचार अर। 20 क्यालाइकि हामले धेक्या रे सुण्या कुरा हाम नबोलि सक्दाइ सक्दाइन्।” 21 यो कुरा सुनिबर माहासभाका मान्सनले उनुनलाइ अज बर्ता धम्कि दिबर छाड्दियो। तिनुनले पत्रुस रे युहन्नालाइ सजाइ दिन्या केइ कारण पाएन् क्यालाइकि उनुनले अर्या अचम्मको काम धेक्या हुनाले सप्पइ मान्सनले परमेस्वरको महिमा अद्दा थ्या। 22 क्यालाइकि जो मान्स अचम्म किसिमले निको पाडिया थ्यो, तइको उमर चालिस बर्सभन्ना लइ बर्ता थ्यो। बिस्वासिनको प्रार्थना 23 ताँबटहइ छुटन्जेइ पत्रुस रे युहन्ना आफना बिस्वासि संङिनका वाँ आया, रे मुख्य पुजारिन रे अगुवानले भुण्या सप्पइ कुरा उनुनलाइ बताइदियो। 24 जबइ तिनुनले यो कुरा सुण्यो, तबइ तिनुनले सङइ ठुला स्वरले परमेस्वरसित इसेरि प्रार्थना अद्द लाग्या, “हे सर्बसक्तिमान प्रभु, तमले स्वर्ग, धर्ति, समुन्दर रे तिनमि भया जम्माइ थोक बनाया, 25 तमले पबित्तर आत्माबटहइ आफना सेबक हामरा पुर्खा दाउदका मुखबटहइ भुन्या, “अउरजातिन क्याकि झोकिया, रे मान्सनले खालिसारा कुराको क्याकि योजना अर्यो? 26 परमप्रभुका बिरुद्दमि रे उनरा मुक्ति दिन्या ख्रिस्टका बिरुद्दमि धर्तिका राजान खडा भया, रे सासकन एक होइबर भेला भया।” 27 “यो कुरा साँच्चि भया छ, क्यालाइकि तमले अबिसेक अर्या तमरा पबित्तर सेबक इसुका बिरुद्दमि हेरोदराजा, पन्तियस पिलातस रे अउरजातिन इज्राएलिनसित इसइ सहरमि भेला भया थ्या। 28 तर तमरा सक्ति रे इछ्याबटहइ तमले अगाडिबटहइ निर्णय अर्याअन्सारइ तिनुनले अर्यो। 29 आब हे प्रभु, तिनुनका धम्किमि नजर राख, रे तमरा सेबकनलाइ पुरा साहाससित तमरो बचन बोल्ल दिय, 30 बिमारिनलाइ निको पाड्डाइलाइ तमरो हात फइलाइदिय। आफना पबित्तर सेबक इसुका नाइँबटहइ चिन रे अचम्मका काम हउन।” 31 इसेरि प्रार्थना अरिसक्यापाछा तिनुन भेला भया ठउँरमि कम्प भयो। तिनुन सप्पइ जना पबित्तर आत्माले भरिया। रे तिनुनले साहाससित परमेस्वरको बचन बोल्यो। बिस्वासिनको साजा सम्पति 32 बिस्वास अद्द्यान सप्पइ एकइ मनका रे एकइ चित्तका भया थ्या। तिनुनमध्ये कसइले लइ आफनो धन-सम्पतिको केइ थोकलइ यो मेरो आफनो हो भनन्थेएनन्, रे तिनुनको सप्पइ थोक साजा थ्यो। 33 तन प्रेरितनले ठुला सक्तिसित प्रभु इसु मर्याबटहइ जिउना होइबर उठ्याछन् भन्या गवाइ दिन्थ्या, रे प्रेरितनले ठुलो सक्ति पाइबर गवाइ दिन्थ्या रे परमेस्वरले तिनुन सप्पइमि दया अरिबर भउत आसिस खण्याथ्यो। 34 तिनुनमध्ये कसइलाइ केइ कुराको खाँचो पडन्थेन क्यालाइकि जति जना जग्गा जमिन कि घरका मालिक थ्या, तिनुनले ति बेचिबर तइको रकम ल्याउथ्या, 35 त्यो रकम तिनुनले प्रेरितनका जिम्मामि लाउथ्या रे जइ जइलाइ जि जि कुराको खाँचो पडन्थ्यो त्यो हरेकलाइ बाड्दिन्थ्या। 36 लेबि कुलका योसेफ नाउँ भया एक जना मान्स थ्या। तिन साइप्रस भन्न्या ठउँरबटहइ आया थ्या। प्रेरितनले तिनलाइ बारनाबास भनि नाउँ राख्या थ्यो, जइको अर्थ हो उत्साहको चेलो। 37 उनुले आफनो जमिन बेच्यो रे त्यो रकम लेइबर प्रेरितनका जिम्मामि दियो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.