प्रेरित 3 - डोटेलिपत्रुसले एक जनो लङ्गडो निको पाण्यो 1 एक दिन पत्रुस रे युहन्ना दिनका तिन बजेतिर प्रार्थना अद्द्या समयमि मन्धिरतिर जान्नाथ्या। 2 मन्धिरका चोकमि पस्या सुन्दर भन्न्या देलिमि एक जन्मइबटहइको लङ्गडो बसन्थ्यो। मान्सनले उइलाइ दिनदिनि बोकिबर ताँइ ल्याउथ्या। उइले मन्धिर भितर जान्यान् मान्सनसित भिक मागन्थ्यो। 3 पत्रुस रे युहन्नालाइ मन्धिर भितर जान्नारया धेकिबर तइले भिक पाउनउ कि भनिबर भिक माग्यो। 4 युहन्नासितइ पत्रुसले तइलाइ एकोहोरो हेरिबर भुन्यो, “हामतिर हेर्!” 5 तिनुनबटहइ केइ पाउन्या आसा अरिबर तइले तिनुनलाइ ध्यान दिबर हेर्यो। 6 तबइ पत्रुसले भुन्यो, “सुनचाँदि मुसित आथिन्, तर जि मुसित छ तेइ मु तुलाइ दिनउ। नासरतका इसु ख्रिस्टका नाउँमि उठिबर हिट्!” 7 पत्रुसले तइको दाइन हात समाइबर उठायो। तन्जेइ तइका खुट्टामि रे गोलिगाँठामि ताकत आयो। 8 रे त्यो जुणुक्क उठिबर सिदा कलियो रे हिट्ट लाग्यो। उफड्डोइ रे नाच्चोइ परमेस्वरको इस्तुति प्रसम्सा अद्दोइ तिनुनसित मन्धिर भितर गयो। 9 सप्पइ मान्सनले तइलाइ हिट्टोइ रे परमेस्वरको प्रसम्सा अद्दोइरया धेक्यो। 10 तिनुनले तइलाइ मन्धिरका सुन्दर भन्न्या देलिमि बसिबर भिक माग्द्या यइ हो भनिबर चिन्यो। त्यो कसेरि हिट्ट लाग्यो भनिबर तिनुन अचम्ममि पण्या। पत्रुसले मन्धिरमि प्रचार अर्यो 11 त्यो निको भया मान्स मन्धिरका सोलोमन भन्या खलामि पत्रुस रे युहन्नाका संङ संङइ लाग्या धेकिबर सप्पइले अचम्म मान्नाइ दगुणिबर आया। 12 तिन मान्सनलाइ धेकिबर पत्रुसले तिनुनलाइ भुन्यो, “हे इज्राएलि दाइभाइन हो, तमु क्याकि यइ कुरामि अचम्म मानिबर हेरिरइछउ? क्या हामले यइ मान्सलाइ आफना सक्ति रे भक्तिबटहइ हिट्ट सक्द्या बनाया हुँ भन्न्या तमु सोचन्छउ? 13 तसो हइन, हामरा पिता-पुर्खा अब्राहाम, इसहाक रे याकुबका परमेस्वरइले आफना सेबक इसुलाइ महिमित पाण्यो। तमुले इसुलाइ माद्दइ पणन्छ भुनिबर पक्राइदिया। पिलातसले उनलाइ छाडिदिन्या बिचार अरन्ज्या लइ तमुले उनराइ अगाडि असुइकार अर्या। 14 रे तमुले पबित्तर रे धर्मि जनलाइ असुइकार अरिबर एक जनो ज्यानमारालाइ छाडिदिन्या माग अर्या। 15 जिबन दिन्यालाइ तमुले मार्या, परमेस्वरले उनलाइ मर्याबटहइ जिउना बनाया छन्, यइ कुराका हाम साछि छु। 16 इसुका नाउँमि अर्या बिस्वासले अरज्या तमुले धेक्या रे चिन्या यो लङडो मान्स निको भयो। यइ मान्सले इसुलाइ बिस्वास अर्या हुनाले तमराइ अगाडि उ पुराइ निको भया धेक्दाछउ। 17 “हे मेरा दाइभाइ हो, मुलाइ था छ, कि तमुले अन्जानमि तसो अर्या हउ, रे तमरा सासकनले लइ तसोइ अर्यो। 18 ख्रिस्टले दुःख भोग्दु पणन्छ भनि परमेस्वरले सप्पइ अगमबक्ताका मुखबटहइ भुन्या अगमबाणि उनुले इसेरि पुरा अर्यो। 19 तबइलाइ पस्साताप अर रे परमेस्वरतिर फर्किय, उनुले तमरा पाप छिमा अद्द्या छन्। रे परमप्रभु परमेस्वरले तमुलाइ आत्मामि ताजापन दिन्या समय दिन्या छन्। 20 परमेस्वरले तमरि निउति चुन्या मुक्ति दिन्या राजा ख्रिस्टलाइ अज पठाइदिन्याछन्, उनइ इसु हुन। 21 पबित्तर अगमबक्ताले भुण्या जसेरि परमेस्वरले सप्पइ कुरा नयाँ बनाउन्या समय नआयासम्म इसु स्वर्गइमि रनपड्या हो। 22 मोसाले इसेरि भुण्या थ्यो, ‘परमप्रभु परमेस्वरले मलाइ खडा अर्याजसेरि तमरा दाइभाइका बिचबटहइ एक जनो अगमबक्ता तमरि निउति खडा अद्द्याछन्। उनुले तमुलाइ जि जि भुण्याछन् तिन सप्पइ कुरा तमुले पालन अद्दुपणन्छ। 23 यसो हुन्याछ, कि तन अगमबक्ताले भुण्या नमान्न्या जति सप्पइ मान्सन परमेस्वरका जनबटहइ अलग अरिन्या छन् रे नास हुन्या छन्।’ 24 समुएलबटहइ लिबर तन पाछाका सप्पइ अगमबक्तान जतिले बोल्या छन्, तन सप्पइले बेलि रे आजका दिनका बिसयमि भुण्या थ्या। 25 तमु तिनइ अगमबक्तानका रे परमेस्वरका प्रतिग्या अर्या सन्तान हउ। परमेस्वरले अब्राहामसित यसो भन्यो, ‘तेरा सन्तानमि धर्तिका सप्पइ जातिनले आसिस पाउन्या छन्।’ 26 तमु हरेकलाइ आफना दुस्टताबटहइ परमेस्वरतिर फर्काइबर तमुलाइ आसिस दिनाइलाइ परमेस्वरले आफना सेबक इसु ख्रिस्टलाइ निउक्ति अर्यो रे सबभन्ना पइलि तमरा वाँ पठायो।” |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.