प्रेरित 28 - डोटेलिपावल माल्टा टापुमि 1 इसेरि बाँचिबर किनारमि आयापाछा तइ टापुको नाउँ माल्टा रइछ भन्न्या कुरा हामले था पाया। 2 ताँ का मान्सन भउत मिलनसार रइछन्। तइ बेला पानि पड्डारया रे भउत जाडि भया हुनाले तिनुनले आगो बालिबर ताप्द हामुलाइ बोलायो। 3 पावलले एक अङालि दरुवा जम्मा अर्याथ्यो रे दरुवा लेइबर आगामि हाल्यो। आगाका राफले स्याप निक्लबर आयो, रे तिनरा हातमि बेडियो। 4 ताँ का बासिदानले तिनरा हातमि स्याप बेडिया धेकिबर आपसमि भन्न लाग्या, “यो मान्स साँच्चि लइ ज्यानमारा हुनुपणन्छ। यो समुन्दरबटहइ बाँचिबर त आयो तर न्याय अद्द्या इस्वरबटहइ यो उम्कन सकेन्।” 5 तर पावलले आफनो हात झट्कायो रे स्याप आगामि पड्यो, तइले पावललाइ केइ नोक्सानि अद्द सकेन्। 6 तनरो सरिल सुनिन्या छ, रे तन एक्कासि ढलिबर मद्दया छन् भनि तिनुन हेरिरइथ्या। तर भउत बेरसम्म लइ तनरो केइ नोक्सानि नभया धेकिबर तिनुनले आफनो बिचार बदलिबर भन्न लाग्या, “यिन त देबता प रइछन्।” 7 तइ टापुमि पब्लियस नाउँ भया मुख्याको जग्गाजमिन थ्यो। उनुले हामुलाइ स्वागत अर्यो, रे तिन दिनसम्म हाम उनरा घरमि पाउना होइबर बस्या। 8 तइ बेला पब्लियसका बालाइ जर आइबर आउँमासि पड्या थ्यो। तसोभया हुनाले पावल पब्लियसका बाका कोठामि गया रे प्रार्थना अरिबर आफनो हात बिमारिमि राख्या पाछा तन निका भया। 9 इसेरि बिमारबटहइ निको भया था पाइबर तइ टापुमि भया सप्पइ बिमारिन पावलका वा आया रे निका भया। 10 तिनुनले हामुलाइ आदर अरिबर भउत उपहार दियो। हामले तइ ठउँर छाडिबर पानि जहाज चड्डयाबेलामि तिनुनले हामुलाइ चाइन्या जति सामान जहाजमि हालिदियो। पावल माल्टाबटहइ रोम सहरमि गया 11 हाम तिन मइनापाछा, अलेक्जेन्डिरिया सहरबटहइ आया पानि जहाजमि चड्या। यो जहाज हिउनमि तसइ टापुमि थ्यो। तइ जहाजका अगाडिका भागमि जोलिया देबताको प्रतिमा खोप्या थ्यो। 12 हाम सुराकुसाइ भन्न्या सहरमि पुगिबर ताँ तिन दिनसम्म बस्या। 13 ताँबटहइ हाम किनार किनारइ रेगियन भन्न्या सहरमि आया। एक दिनपाछा दछिणबटहइ बतास चल्यो, रे भोलिबार हाम पटिओलि भन्न्या सहरमि आया। 14 ताँ हामले प्रभु इसुमि बिस्वास अद्द्या कोइ कोइ दाइभाइनलाइ भेट्या। रे उनुनले हामुलाइ एक हप्तासम्म बसिदिय भनिबर बिन्ति अर्यो। हाम तिनुनसंङ एक हप्ता बस्यापाछा रोम सहरतिर जान्या बाटा लाग्या। 15 ताँबटहइ हाम आउन्ना छु भन्न्या रइबार सुनिबर बिस्वासि दाइभाइन हामुलाइ भेट्न अप्पियसको बजार रे तिन पाटि भन्न्या ठउँर आइरइथ्या। यिनुनलाइ धेकिबर पावलले परमेस्वरलाइ धन्याबाद चणायो, रे साहस पायो। पावलले रोम सहरमि प्रचार अर्यो 16 हाम रोम सहरमि आयापाछा पावललाइ एक जनो सिपाइका पहरामि आफनोइ डेरा लिबर बस्या अनुमति मिल्यो। 17 तिन दिनपाछा पावलले ताँइका यहुदिन अगुवानलाइ बोलायो। तिनुन भेला भयापाछा पावलले भुन्यो, “दाइभाइन हो, मुइले हामरा जाति रे हामरा पिता-पुर्खानका रितिथितिका बिरुदमि केइ काम अर्या आथिन्। तबइ मुलाइ यरुसलेममि पकणिबर बन्दि बनाइ रोमिनका जिम्मा लाया छ। 18 उनुनले छानबिन अर्यापाछा मुमि ज्यानसजाइको केइ कारण नपायाहुनाले मुलाइ छाडिदिन्या मन अर्याथ्यो। 19 तर यहुदि दाइभाइनले जबरजस्ति अरिबर मुलाइ छाड्ड नदियाहुनाले मुइले रोमि महाराजाका वाँ बिन्ति चडाउनइ पड्डया भयो। रे मेरा आफना यहुदि दाइभाइका बिरोधमि दोस लाउनुपड्या केइ कुरा थेएन्। 20 तबइलाइ मुइले तमुसित भेटिबर यो कुरा अद्द तमुलाइ बोलाया हुँ। हाम इज्राएलिनले आस राख्या मुक्ति दिन्या राजाका निउति मु इसेरि साङलाले बाँधिया हुँ।” 21 उनुनले तनलाइ भुन्यो, “हामले त तमरा बिसयमि यहुदियाबटहइ केइ चिट्ठि पाया आथिन्। कसइ भाइनले आइबर तमरा बिरुद्दमि केइ कुरा लइ सुणाया या बोल्या लइ आथिनन्। 22 तर तमरो बिचार कि हो? तमबटहइ हाम सुन्न चाहानाउ क्यालाइकि तमरा समुहका बिरुद्दमि जाँइताँइ कुरा चल्या हामुलाइ था छ।” 23 तइपाछा उनुनले पावलका कुरा सुन्नाइलाइ एक दिन तोक्यो। तोक्या दिनमि भउत मान्सन तिनरा डेरामि आया। तइ दिन पावलले ब्याहानइबटहइ बासाइतिकसम्म परमेस्वरको राज्यका बिसयमि सिछ्या दियो। धर्म- सास्त्तरमि मोसा रे अगमबक्तानले लेख्या कुरा लेइबर उनुले इसुका बिसयमि बुजाउनाइ तिनुनलाइ बिस्वासमि ल्याउन्या कोसिस अर्यो। 24 तनले भुण्या कुरा कतिले बिस्बास अर्यो, कतिले बिस्बास अरेनन्। 25 आफु आफुइमि कुरा नमिलिबर तिनुन तत्तिमि ताँबटहइ हिट्ट लाग्या। तबइ पावलले तिनुनलाइ यसो भुन्यो, “पबित्तर आत्माले तमरा पुर्खानलाइ भुण्या कुरा साँचो छ क्यालाइकि यसइया अगमबक्ताबटहइ उनुले इसरि बोल्यो! 26 इन मान्सनका वाँ जाइबर भुण, “‘सुन्ना त तमु सुणन्छउ, तर कभइ लइ बुज्जानु, हेद्द त हेरन्छउ, तर कभइ लइ धेक्दानु! 27 क्यालाइकि इन मान्सनको ह्रिदय बोधो भया छ, रे तिनुनका कान बइरा भया छन्, रे तिनुनले आफना आँखा बन्द अर्या छन्, नति त तिनुनले आँखा धेक्देइ थ्या, कानले सुन्नेइ थ्या रे ह्रिदयले बुज्जेइथ्या थ्या, रे तिनुनले आफनो मन मुतिर फर्काउन्या थ्या, रे मु तिनुनलाइ निको पाड्या थ्या।’” 28 तइपाछा पावलले भुन्यो, “तबइलाइ तमुलाइ थाँ हउ, कि परमेस्वरबटहइ आया यो मुक्ति दिन्या असल रइबार अउरजातिनका वाँ पठाइया छ रे तिनुनले सुन्याछन्।” 29 [रे पावलले यिन बचन भुण्यापाछा यहुदिन आपसमि भउत बाद बिबाद अद्दाइ बिदा भया।] 30 आफुइले भाडामि लिया तइ डेरामि पावल दुइ बर्ससम्म बस्या। पावलले आफुलाइ भेट्ट आउन्या सप्पइको स्वागत अर्यो। 31 उन साहसि भइबर परमेस्वरका राज्यको प्रचार अद्दाइ प्रभु इसु ख्रिस्टका बिसयमि सिकाउथ्या रे कसइलेलइ उनलाइ रोक्दाइनथ्या। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.