प्रेरित 27 - डोटेलिरोमतिर पावलले यात्रा अर्यो 1 हामले पानि जहाजको यात्रा अरिबर इटालिया देसमि जानुपणन्छ भुणि निर्णय भयापाछा तिनुनले पावल रे अउर कतिबइ कइदिनलाइ रोमि महाराजा अगस्टसका युलियस भन्न्या कप्तानका जिम्मामि लाइदियो। 2 एड्रामिटेनोस भन्न्या ठउँर एसियाका भउत पानि जहाज रोकिन्या ठउँर होइबर जान्या एक पानिजहाजमि चढिबर हामले यात्रा सुरु अर्या। माकेडिनिया छेत्रमि पडड्या थेसलोनिके सहरबटहइ आया अरिस्तार्खस भन्न्या मान्स लइ हामसित थ्या। 3 भोलिबार हाम सिदोन सहरमि पुग्या। तइ ठउँरमि कप्तान युलियसले पावललाइ दया अरिबर तिनरा सङिनका वाँ गइबर भेटघाट अद्द्या रे चाइया जति साहेता लिन्या अनुमति दियो। 4 ताँबटहइ हामरो पानि जहाज अज बाटा लाग्यो, रे जहाजका अगाडिबटहइ बतास चल्याहुनाले हाम साइप्रस टापुका किनाराइ किनारा होइबर गया। 5 किलिकिया रे पामफिलिया छेत्रमि भया समुन्दर पार अरिबर हाम लुकिया सहरमि पुग्या। 6 ताँ कप्तान युलियसले अलेक्जेन्डिरिया सहरबटहइ इटालिया देसमि जान्या जहाज भेट्यापाछा उनुले हामुलाइ तसइ जहाजमि चडाइदियो। 7 भउत दिनसम्म सद्दिले गइबर जस्यातस्या क्निडस सहरका नजिकइ आया रे बतासले अज आगाडि जान नदियाहुनाले क्रेट टापुका किनार-किनाइ होइबर हाम सालमोने भन्न्या ठउँरबटहइ गया। 8 भउत कठिनाइसित टापुका किनारइ किनार लागिबर हाम सुन्दर भन्न्या पानि जहाज रोकिन्या ठउँर आया, ताँबटहइ लासिया सहर नजिकइ थ्यो। 9 ताँ पुग्दाइलाइ भउत समय बितिसक्या थ्यो। उबास बस्या बिसेस दिन लइ बितिसक्या थ्यो रे तइ जाडिका मउसममि आइरन्या आँधिभेरिले अरन्ज्या आब पानि जहाजबटहइ अगाडि बड्ड खत्रा भयाथ्यो। तसो भयाहुनाले पावलले आफुलाइ कुद्दया मान्सनलाइ यसो भुणिबर सम्जायो, 10 “संङिन हो, यइ समुन्दर यात्राले अरन्ज्या जहाज रे मालसामानको मात्तरइ हइन, रे हामरो ज्यानको समेत खतरा रे नोक्सानि होलो भन्न्या मुलाइ लागन्छ।” 11 रे कप्तानले पावलका कुरामि बिस्वास अरेन रे तिनले जहाज चलाउन्या रे जहाजका मालिकले भुण्या कुरामि बर्ता बिस्वास अर्यो। 12 यो पानि जहाज रोक्द्या ठउँरमि हिउन काट्टाइलाइ सुबिधा नभयाहुनाले जसेरि लइ फोनिक्सइमि पुगिबर जाणि काट्ट पणन्छ भनिबर भउतले ताँबटहइ जहाज चलाइहाल्या सर-सल्लाहा दियो। फोनिक्स क्रेटको एक पानि जहाज रोक्द्या ठउँर हो, यो दछिण-पस्सिम रे उत्तर-पस्सिमतिर फर्किया छ। समुन्दरमि आँधिभेरि आयो 13 दछिणबटहइ सद्दिले बतास चल्न लाग्यो, सप्पइ मान्सले आब हाम जान सक्दाउ। तबइलाइ तिनुनले अड्काइबर राख्या पानि जहाजको लङगर निकाल्यो रे जहाजलाइ क्रेट टापुका किनारइ किनारतिरबटहइ लइया। 14 तर केइ समय पाछा टापुतिरबटहइ उत्तरपुर्बि भन्न्या ठुलो आँधिभेरि आयो। 15 जबइ जहाज आँधिभेरिका चपेट्टामि पड्यो, रे तइ आँधिभेरिका अगाडि हामरो केइ लागेन। तबइलाइ हामले पानि जहाजलाइ जाँ जान्छ जाउ भनिबर छाड्दिया। 16 क्लउडा भन्न्या एक नाना टापुमि पुग्यापाछा टापुले आँधिभेरिलाइ थोक्काइ छेकिदियो। रे ताँ लइ हामले जहाजका पछाडि बाँद्या नाना नाउँलाइ जस्यातस्या बगाउनबटहइ बचाउन सक्या। 17 तइ नाउँलाइ मल्तिर उठायापाछा तिनुनले केइ उपायले जहाजलाइ तल्तिरबटहइ बाद्दाइ लेया रे सिरटिस भन्न्या बलुवामि फसन्छ कि भन्न्या डरले तिनुनले पाल झडाइदियो रे जहाज आफुइ बग्द लाग्यो। 18 आब आँधिभेरिले पानि जहाजलाइ भउत उचाल्ल रे पछाड्ड लाग्यो, भोलिबार पानि जहाजमि भया मालसामान मान्सनले खित्तर लाग्या। 19 रे तेसरा दिनमि तिनुनले जहाज चलाउनाइलाइ चाइन्या सामान लइ खित्दियो। 20 भउत दिनसम्म हामले न घाम धेक्या न तारा धेक्या। आँधिभेरि जोरले चल्याथ्यो रे अन्तिममि त हामले बाँच्या आसा लइ छाड्दिया। 21 भउत दिनसम्म तिनुन नखाइ बस्या थ्या। तबइ पावलले तिनरा वाँ जाइबर भुन्यो, “दाइभाइन हो, तमुले मेरो सर-सल्लाहा मानिबर क्रेटबटहइ जहाज नचलाउनु पड्डयाथ्यो। तइबेला मुइले भुण्या कुरा माण्या भयाले नत यसो दुःख पाइनेइथ्यो नत मालसामानको नास हुनेइथ्यो। 22 आब मु बिन्ति अद्दउ, साहस अर, तमुमध्ये कोइलइ मद्दया आथिनउ, रे जहाज मात्तरइ नास हुन्याछ। 23 मु परमेस्वरको मान्स हुँ, रे उनरोइ आराधना अद्दउ, उनरा एक जना स्वर्गदुतले आज रात मेरा नजिक कलिबर मुलाइ भुन्यो, 24 ‘पावल जनडराइ, तु रोमि महाराजा अगाडि जसेरि लइ पुग्द्या छइ। सुण, तुसित जहाजमि जान्या सप्पइलाइ परमेस्वरले रछ्या अद्द्याछन्।’ 25 तबइलाइ सङिन हो, साहस अर, मु परमेस्वरमि बिस्वास अद्दउ, रे मुलाइ जसो भुणिया छ ठिक तसोइ हुन्याछ। 26 तर जहाज कसइ टापुका किनारमि ठोकिन्या छ।” जहाज ध्वस्त भयो 27 हामरो जहाज इसेरि आधिभेरिका बिचमि एड्रियास भन्न्या समुन्दरमि लड्खडाइरया चउध दिन भइसक्याथ्यो। आधारातमि जहाज चलाउन्यानले हाम कसइ जमिनका नजिकइ पुग्दाछु भन्न्या अनुमान लायो। 28 रे तिनुन पानिको गइराइ नाप्द लाग्या। नापन्ज्या तिनुनले सइतिस मिटर पत्ता लायो, रे थोक्काइ पल्तिर गया पाछा अज नाप्यो छब्बिस मिटर पत्ता लायो। 29 पानि थोक्काइ भयाहुनाले जहाज काँइ चट्टान्मि ठोकिन्छ कि भन्न्या डर मान्यो। तबइलाइ तिनुनले पानि जहाजका पछाडिबटहइ जहाज अड्याउन्या चार लङगर खित्यो, रे ब्याहान होउ भणि प्रार्थना अद्द लाग्या। 30 इसेरि पखिरन्ज्या जहाज चलाउन्यानले अगाडिको लङगर खित्या बाहाना अरिबर नानो नाउँलाइ जहाजबटहइ खितिबर भाग्द खोज्यो। 31 तर पावलले कप्तान रे सिपाइनलाइ भुन्यो, “इन जहाज चलाउन्या मान्सन भाग्यो भण्या हाम कोइ लइ बाँच्या आथिनउ।” 32 रे सिपाइनले नाउँका डोरि काट्दियो रे नाउँलाइ जान दियो। 33 मिरमिर्या उज्यालो हुन्ज्या, पावलले तिनुन सप्पइलाइ केइ खाँ भनि इसेरि सल्ला दियो, “तमु चिन्ताले अरन्ज्या खानाइ नखायइ बस्या चउद्द दिन होइयो। 34 आब तमुलाइ मेरो बिन्ति छ, केन केइ त खाँ, क्यालाइकि बाँच्चाइलाइ त खानइ पणन्छ। जनडरा, परमेस्वरले भन्याजसेरि कसइलाइ लइ केइ हुन्या आथिन्।” 35 इन कुरा भणिसक्या पाछा पावलले रोटो लियो रे सप्पइका अगाडि परमेस्वरलाइ धन्यबाद चणाइबर खान लाग्या। 36 तइपाछा अउरले लइ हउसला पाइबर केइ खान्या कुरा खायो। 37 तइ जहाजमि हाम जम्मा दुइ सय छहत्तर जना मान्स थ्या। 38 तिनुनले अगाउन्ज्यासम्म खायापाछा, जहाजलाइ हलुका बनाउनाइलाइ तिनुनले भया जति सप्पइ गहुँ लइ समुन्दरइन खित्दियो। 39 उज्यालो भया पाछा समुन्दरको केइ किनार धेकियो, तर जहाज चलाउन्यानले त्यो ठउँर लइ चिन्न सकेन्। किनारमि बालउट्या पाजुलो ठउँर धेकिबर तिनुनले जहाजलाइ ताँइ लइजान्या बिचार अर्यो। 40 तिनुनले जहाज अड्याउन्या लङगरनमि बाँधिया डोरि काटिबर लङगर समुन्दरमि छाड्दियो। पानि काट्टया दाबलो बाँधिराखिया डोरि लइ फुकाइदियो रे पानि जहाजका अगाडिको पाल उठाइदियो तइपइतर बतासले जहाजलाइ लइजान्ज्या किनारइ किनारतिर चलाउनाइ लइया। 41 रे पानि तल्तिर लुक्या बालुवाका रासमि जहाज ठोकियो रे जमिनमि भासियो, जहाजका अघाडि तिरको भाग अड्कियो रे चल्लइ सकेइन्, रे पछाडिको भाग पानिका छालले अरन्ज्या फुट्ट लाग्यो। 42 तइबेला कइदिन पउडिबर भागन्ना कि भनिबर सिपाइनले तिनुनलाइ माद्दया बिचार अर्यो। 43 तर कप्तानले पावललाइ बचाउन चाहान्थ्या तसो भयाहुनाले उनुले कसइलाइ लइ माद्द दिएन, उनुले पउडिन सक्द्याजति पइलि पउडिबर जाँ भन्न्या हुकुम दियो। 44 रे बाँकि रयालाइ काठका फल्यामि रे जहाजका टुक्रणानमि पारि जान्या हुकुम दियो। तसेरि सप्पइ जना सकुसलसित किनारमि पुग्या। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.