प्रेरित 26 - डोटेलिराजा अग्रिपासका अगाडि पावलको बिन्ति 1 राजा अग्रिपासले पावललाइ भुन्यो, “तुलाइ आफना पछ्यमि बोल्या अनुमति छ।” रे पावलले हातका इसारा अरिबर आफना बचाउमि केइ बोल्ल लाग्या, 2 “हे राजा अग्रिपास, यहुदिनले मुलाइ लाया सप्पइ दोसका बिसयमि आज हजुरका अगाडि मुइले आफना बचाउमि बोल्ल पायाछु। यइमि मु आफुलाइ भाग्यामानि ठान्नउ। 3 यहुदिनका सप्पइ चालचलन रे रितिथितिका कुरामि हजुर बिसेस रुपले परिचितइ छउ। मेरा कुरा निकेरि सुणिदिय भणि मु अनुरोध अद्दउ। 4 “मु आफना देसमि रे यरुसलेम सहरमि यहुदि जातिनका बिचइमि हुर्किया, तसो भयाहुनाले यहुदिनले मुलाइ बच्चाइबटहइ निकेरि चिन्नाहान्। 5 पइलि मु फरिसि भन्न्या कट्टर धर्मिक समुहको मान्स थ्या, तसइ कट्टर धर्मको जिबन बिताउथ्या, तिनुनले चायाले यइ कुराको गवाहि दिन सक्दाहान्। 6 परमेस्वरले हामरा पिता-पुर्खानलाइ अर्या प्रतिग्यामि भरोसा राख्याहुनाले मुइले आज इसेरि हजुरका अगाडि कलिनपण्या छ। 7 हे राजा अग्रिपास, हामरा बारइ कुलनले यो आसा पाउनाइलाइ रात दिन एक मनले आराधना अद्दाछन्। रे यइ आसाकि निउति यहुदिनले मुलाइ दोस लाइराइछन्। 8 परमेस्वरले मर्यालाइ जिउना बनाउनाहान भन्न्या कुरा क्याकि तमुलाइ बिस्वास लाग्दइन्? 9 “हुन त मुइले लइ नासरत इसुका नाउँको बिरोध अद्दुपणन्छ भन्न्या मु आफुइ लइ बिस्वास अरन्थ्या। 10 मुइले यरुसलेममि तसेरि बिरोध अर्या। मुख्य पुजारिनबटहइ अधिकार पाइबर प्रभु इसुमि बिस्वास अद्द्या मान्सनलाइ मुइले झेलखानामि हालिबर उनुनलाइ माद्दया काममि समेत साहेता अर्या। 11 भउतबेर मुइले उनुनलाइ आबबटहइ नासरतका इसुमि बिस्वास अद्दइन भन्न्या पाड्डाइलाइ सभाघरमि जबरजस्ति अरिबर सजाइ दिन लाया, मु उनुन धेकिबर रिसले इति आगो भया थ्या कि, अउर देसका सहरनमि लइ गइबर मुइले उनुनलाइ सताया।” आफु कसेरि परिबर्तन भया भन्न्या बिसयमि पावलले भुन्यो ( प्रेरित ९:१६ ; २२:६-१६ ) 12 “इसेरि एक दिन मु मुख्य पुजारिनबटहइ अधिकार रे आग्या पाइबर तिनुनलाइ पकड्ड सकु भनिबर दमस्कस सहरतिर जान्नाथ्या। 13 हे राजा अग्रिपास, तइ दिन छकालाइतिक बाटामि जान्ज्या मुइले स्वर्गबटहइ घामभन्ना लइ उज्जल ज्योति धेक्या, मु रे मेरा सङिका चारइतिर त्यो ज्योति चम्कियो। 14 हाम सप्पइ जमिनमि लोट्या तन्जेइ मुइले हिब्रु भासामि यसो भुन्नारया आबाज सुण्या, ‘साउल ए साउल तु क्याकि मुलाइ सताउन्नाछइ? सुयामि लात्ति हाण्याले तुइलाइ पिण हुनेइ हो।’ 15 रे मुइले भुण्या, हे प्रभु, ‘तम को हउ?’ प्रभुले मुलाइ भुन्यो, ‘मु इसु हुँ, जइलाइ तु सताउन्नाछइ। 16 आब उठ, मु तुलाइ मेरो सेबक रे गवाइ दिन्या मान्स बनाउन चाहानउ। तबइलाइ मु तेरा वाँ धेकिया हुँ। तुइले मेरा बिसयमि धेक्या कुरा रे मुइले तुलाइ पाछा धेकाउन्या कुरासमेत अउर मान्सनलाइ सुनाउनपड्डया छ। 17 मु तुलाइ यहुदिन रे अउरजातिका वाँ पठाउन्या छु। तुलाइ तिनुनबटहइ बचाउन्या छु। 18 तुइले तिनुनका आँखा खोलिदिन्या, रे तिनुनलाइ अन्याराबटहइ उज्यालामि, रे सइतानका सक्तिबटहइ परमेस्वरतिर फर्काउन्पडन्छ। इसरि तिनुनले पापको छिमा पाउन्याछन् रे मुलाइ बिस्वास अर्या हुनाले परमेस्वरले चुन्या मान्सनका ठउँर बस्स पाउन्याछन्।’ 19 “तबइलाइ, हे राजा अग्रिपास, स्वर्गबटहइ धेकिया यइ दर्सनमि मु आग्याकारि भया। 20 तर पइलि दमस्कसमि, तबइ यरुसलेममि रे सारा यहुदिया देसभरि रन्यानलाइ, रे अउरजातिनलाइ लइ पस्साताप अरिबर परमेस्वरतिर फर्क रे आफनो पस्साताप अन्सार काम अरिबर प्रमाण दिय भुणिबर मुइले प्रचार अर्या। 21 तबइलाइ यहुदिनले मुलाइ मन्धिरमि पकणिबर माद्द खोज्यो। 22 आजका दिनसम्म मुइले परमेस्वरबटहइ साहेता पाइराइछु। तबइलाइ मु याँ हुन्यान् ठुला नाना सप्पइलाइ अगमबक्तानले रे मोसाले बोल्या बचन साँच्चि लइ पुरा हुन्याछन् भन्न्या कुराबाहिक मुइले अउर केइ भुण्या आथिन्। 23 मुक्ति दिन्या राजा ख्रिस्टले दुःख भोगिबर मद्दु पणन्छ, उन मर्याबटहइ जिउना हुन्यान्मि सप्पइ भन्ना पइलि हुन्या छन् रे उनुले आफना ज्योतिले यहुदिनमि रे अउरजातिनका मान्सनमि लइ घोसणा अद्द्या छन्, यिन कुरा त अगमबक्तानले भुणिसक्या थ्यो।” 24 पावलले भुण्या कुरा सुनिबर फेस्तसले कला हालिबर भुन्यो, “पावल तु बउलिया हइ, तेरा ग्यानले तुलाइ बउला बनाया हो।” 25 रे पावलले भुन्यो, “माननिय फेस्तस, मु बउलिया हइन्, मु सत्य रे साँचो कुरा बोल्ला छु। 26 क्यालाइकि राजा आफुइले यिन कुराका बिसयमि जान्नाहान्, जइका अगाडि मु साहससित बोल्ला छु, क्यालाइकि यिन कुरा उनबटहइ लुक्या आथिनन्, रे यो कुरा लुकिबर अर्या हइन्। 27 राजा अग्रिपास, कि हजुरले अगमबक्तानमि बिस्वास अरन्छउ? हजुरले बिस्वास अरन्छउ भन्न्या कुरा मुलाइ था छ।” 28 राजा अग्रिपासले पावललाइ भुन्यो, “क्या एकइ बेर तु मुलाइ ख्रिस्टियन बनाउन चाहान्छइ?” 29 पावलले भुन्यो, “कम समयमि हउ या भउत समयमि यिन मेरा हातमि लगाइया साङ्लान छाडिबर हजुर मात्तरइ हइन, आज मेरा कुरा सुन्या जति सप्पइ मुजसाइ हुन भुनिबर मु परमेस्वरसित प्रार्थना अद्दउ।” 30 तबइ राजा अग्रिपास, ठुला हाकिम फेस्तस, बरनिकि रे ताँ बस्या सप्पइ मान्सन जणमणान्त उठ्या। 31 रे बाइर गयापइतर तिनुनले आपसमि यसो भुणिबर कुरा अर्यो, “यइ मान्सले थुनिनु पड्डया या ज्यानसजाय पाउनुपड्डया केइ काम अर्या आथिन्।” 32 राजा अग्रिपासले फेस्तसलाइ भुन्यो, “यइ मान्सले रोमि महाराजाका वाँ बिन्ति नअर्या भया त यइलाइ छाडिदियालइ हुनेइथ्यो।” |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.