प्रेरित 25 - डोटेलिपावलले रोमि महाराजालाइ बिन्ति चणायो 1 बडा-हाकिम फेस्तस आफना प्रान्तमि आया तिन दिनपाछा कइसरिया सहरबटहइ यरुसलेममि गया। 2 मुख्य पुजारिन रे यहुदि नेतानले पावलका बिरोधमि आफना कुरा सुणायो। 3 पावललाइ यरुसलेममि पठाइदिय भनिबर खुसामत अर्यो क्यालाइकि पावललाइ बाटामि आउना आउनइ माद्दया योजना बनाउन्नाथ्या। 4 रे बडा-हाकिम फेस्तसले तिनुनलाइ यसो भुन्यो, “पावललाइ कइसरियामि थुनिराख्या छ रे मु लइ छिट्टाइ ताँ जान्नाछु। 5 तमुमध्येका कोइ मुख्य मान्सन मुसितइ जान चाहान्छउ भन्या पठाइदिय, रे पावलले केइ खराब अर्या छ भन्न्या तिनुनले ताँइ उजुर अद्द सक्दाहान।” 6 आठ-दस दिनसम्म यरुसलेममि बस्यापाछा बडा-हाकिम फेस्तस कइसरियामि फर्किया, भोलिबार उनुले न्याय अद्द्या ठउँरमि बसिबर पावललाइ ल्यास् भनिबर हुकुम दियो। 7 पावल आयापाछा यरुसलेमबटहइ आया यहुदिनले तिनरा वल्तिर पल्तिर कलिया, रे पावलका बिरुद्दमि अनेक किसमका दोस लाउनलाग्या। तर तिनुनले केइ लइ दोसको प्रमाण दिन सकेन। 8 पावलले तिनुनलाइ भुन्यो, “मुइले यहुदिनका ब्यबस्थाका बिरुद्दमि, मन्धिरका बिरुद्दमि रे रोमि माहाराजा कइसरका बिरुद्दमि केइ अपराध अर्या आथिन्।” 9 रे बडा-हाकिम फेस्तसले यहुदिलाइ खुसि पाड्डाइलाइ पावललाइ भुन्यो, “कि तु यरुसलेममि गइबर ताँ मेरा अगाडि यिन कुराका बिसमयमि न्याय अरिदिय भन्न्या इछ्या अरन्छइ?” 10 तर पावलले भुन्यो, “मु रोमि माहाराजाका न्यायलय अगाडि कलिरइछु। याँइ मेरो न्याय हुन्पडन्छ। मुइले यहुदिनका बिरोधमि केइ खराबि अर्या आथिन् भन्न्या कुरा हजुरलाइ लइ थाइ छ। 11 मु अपराधि हुँ रे मुइले ज्यानसजाय पाउन्या केइ अपराध अर्याछु भन्या मद्दाइलइ तयार छु। तर यहुदिनले लाया दोस एकलइ साँचो आथिन् भन्या मुलाइ तिनुनका हातमि कसइले लइ सउपिन सक्दइन्। मु रोमि महाराजाका अगाडि मेरो न्याय अरिदिय भनि बिन्ति अद्दउ।” 12 बडा-हाकिम फेस्तसले सल्लाकारसित सल्ला अर्यापाछा पावललाइ भुन्यो, “तुइले महाराजाका अगाडि बिन्ति अर्याहुनाले मु तुलाइ रोमि माहाराजाकाँइ वाँ पठाइदिनउ।” राजा अग्रिपाससित फेस्तसको सल्ला 13 केइ दिन पाछा राजा अग्रिपास रे उनरि बइनि बरनिकिले बडा-हाकिम फेस्तसलाइ स्वागत अद्दलाइ कइसरियामि आया। 14 तिनुन केइ दिन कइसरियामि बस्यापाछा बडा-हाकिम फेस्तसले पावलको मुद्दा राजाका अगाडि यसो भुन्नाइ पेस अर्यो, “बडा-हाकिम फेलिक्सले राखिबर गया एक जना बन्दि याँ छ। 15 मु यरुसलेमि गयाबेला मुख्य पुजारिन रे यहुदिनका मुख्य अगुवानले तइका बिरुदमि दोस लाइबर तइलाइ दण्ड दिन्पडन्छ भणि अनुरोध अर्याथ्यो। 16 तर मुइले तिनुनलाइ भुण्या, ‘मान्सलाइ दोसि नठहरायासम्म रोमि सरकारको दण्ड दिन्या चलन आथिन्। दोसि ठहराइया मान्सले दोस लाउन्या मान्सनका अगाडि आफनो कुरा सुणाउन्या मउका पाउनुपणन्छ।’ 17 तिनुन याँ आयापाछा मुइले ढिलो नअरि भोलिबार पावललाइ न्यायालयमि ल्याउन्या आग्या दिया। 18 पावलका बिरोधिनले उइले अपराध अर्या खास दोस लाउनाहान् भन्न्या सोच्या थ्यो, रे तिनुनले केइ दोस लाउन सकेनन्। 19 तर तिनुनको झगडा तिनुनकाइ धर्मका बिसयमि रे मरिसक्या इसुका बारेमि रइछ, जइलाइ पावलले अज जिउनाइ छन् भणि जिद्द अद्दाथ्यो। 20 तबइलाइ यइ कुराको जाँच पड्ताल अद्द्या बिसयमि मु अलमल पड्याहुनाले यइ बिसयमि छलफल अद्द यरुसलेममि जानाइलाइ तइको इछ्या छ कि भनिबर तइलाइ मुइले सोध्या। 21 तर पावलले रोमि माहाराजाबटहइ न्याय पाउ भणि बिन्ति अर्यो रे मुइले रोमि महाराजाका वाँ नपठायासम्म उइलाइ निकेरि पहरा दिबर यइ राख्द्दया आग्या दिया छु।” 22 तबइ राजा अग्रिपासले फेस्तसलाइ भुन्यो, “यइ मान्सका कुरा मु आफुइले लइ सुन्न पायाले हुनेइ थ्यो।” तर उनुले भुन्यो, “भोल तमले सुन्नपाउन्या छउ।” पावल राजा अग्रिपासका अगाडि 23 भोलिबार राजा अग्रिपास रे बरनिकि ठुलो सम्मानसित सेनापतिन रे सहरका प्रमुख मान्सनसित सभाघरमि पस्या, रे बडा-हाकिम फेस्तसको आग्या पायापाछा पावललाइ सभामि हाजिर अरायो। 24 फेस्तसले भुन्यो, “राजा अग्रिपास रे हामसित याँ उपस्तिथ भया भलादमिन, यहुदिन सप्पइले मेरा वा उजुर अर्या मान्स यइ हो। यइ मान्सलाइ माद्दु पणन्छ भनि सप्पइ यहुदिनले यरुसलेममि रे याँ कइसरियामि लइ भुन्नाहान। 25 तर ज्यानसजाय पाउन्या यइले केइ अर्या मुइले नपायाहुनाले रे यइले महाराजाका वाँ बिन्ति अर्या हुनाले मुइले यइलाइ पठाउन्या निर्णय अर्या। 26 यइका बिसयमि मुइले मेरा महाराजालाइ लेख्द्या खास कुरडि केइ आथिन्। तबइलाइ मुइले यइलाइ तमरा अगाडि, खास अरि हजुर राजा अग्रिपासका अगाडि लेइबर आया छु, रे हामले यइको जाँच अर्यापाछा सायद मुइले केइ कुरडि लेख्द पाउन्या छु। 27 क्यालाइकि खास दोस नधेकेइ उइलाइ पठाउन मुलाइ निको लागेन।” |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.