प्रेरित 24 - डोटेलिपावल बडा-हाकिम फेलिक्स का अगाडि 1 पाँच दिन पाछा ठुला पुजारि हननिया कोइ कोइ धर्म-गुरुन तर्तुल्लस भन्न्या वकिल लेइबर कइसरियामि आया। तिनुन सप्पइले हाकिमका अगाडि पावलका बिरुदमि उजुरि अर्यो। 2 पावललाइ ठुला हाकिमका अगाडि लेयापाछा तर्तुल्लसले इसेरि उनरा बिरुद्दमि दोस लाउनोइ भुन्यो, “माननिय बडा-हाकिम फेलिक्स, हजुरबटहइ हामले ठुलो सान्ति भोग अर्याछउँ, रे हजुरले यइ जातिकि निउति सुधारको काम सुरु अर्या छउ। 3 यइ कुरालाइ हाम सुइकार अद्दाइ मान्नाउँ रे धन्यबादि लइ हुनाउ। 4 तर हजुरको भउत समय नलिबर हामरो बिन्ति चडाउनाउ दया अरिबर सुणिदिय। 5 हामले यइ मान्सलाइ जाँइताँइ दुःख दिनोइ हिट्टया, सन्सारभरिका यहुदिनका बिचमि आन्दोलन मचाउन्या, रे नासरिभन्या दलका प्रमुख अगुवाका रुपमि भेट्या छउँ। 6 यइले मन्धिर असुद्द अद्द्या कोसिस अर्याथ्यो, रे यइलाइ हामले पकड्या [हामरा ब्यबस्था अन्सार कारबाइ अद्द्या बिचार लइ अर्याथ्या।] 7 [तर सेनापति लुसियस आइबर जबरजस्ति यइलाइ हामबटहइ खोसिबर लइया, रे यइका बिरुद्दमि दोस लाउन्यानलाइ हजुरका वाँ आउन्या आदेस दियो।] 8 आब हजुर स्वयमले यइको जाँच अर्याले हामले यइलाइ लाया दोस यिन सप्पइ कुरा उसइबटहइ था पाउन सकन्छउ। 9 अउर यहुदिनले लइ यो कुरा ठिक हो भनिबर गवाहि दियो।” बडा-हाकिम फेलिक्सका अगाडि पावलले बिन्ति अर्यो 10 बडा-हाकिमले पावललाइ बोल्या इसारा दियापाछा पावलले इसेरि जवाफ दियो, “भउत बर्सबटहइ हजुर यहुदि जातिका न्यायाधिस भया कुरा था पाइबर मु आफना पछ्यमि बोल्लाइलाइ भउत खुसि छु। 11 मु यरुसलेममि परमेस्वरको आराधना अद्द गया बार दिन भन्ना बर्ता भया आथिन्, यइ कुरालाइ हजुरले निकेरि पत्ता लाउन सकन्छउ। 12 यिनुनले न त मुलाइ कसइ मान्ससित बहस अद्दारया भिट्यो, न मन्धिरमि, सभाघरमि या सहरमि मान्सनलाइ भट्काया भिट्यो। 13 न त मुलाइ अइल यिनुनले दोसलाया कुराको प्रमाण दिन सक्दाहान्। 14 रे यो कुरा मु हजुरकाइ अगाडि सुइकार अद्दउँ, जइ मुक्ति पाइन्या बाटालाइ तिनुन झुटा भुन्नाहान्, तसइअन्सार ब्यबस्थामि भया कुरा रे अगमबक्ताका किताबमि लेखिया सप्पइ कुरा बिस्वास अरि मेरा पुर्खानका परमेस्वरको आराधना मु अद्दउँ। 15 धर्मि रे अधर्मिन दुएइ मान्स मर्यापाछा अज जिउना हुनाछन् भन्न्या कुरा इनरि जसेरि मुइले लइ आसा राख्या छु। 16 तबइलाइ मान्स रे परमेस्वर दुएइका अगाडि मु आफना बिबेकलाइ सुद्दु राख्द्या कोसिस अद्दउँ। 17 “भउत बर्स बित्या पाछा मु आफना यहुदि दाइभाइनलाइ दान दिनाइनाइलाइ रे परमेस्वरलाइ भेटि चडाउनाइलाइ यरुसलेममि आया थ्या। 18 यिनुनले मुलाइ मन्धिरमि भेट्न्ज्या मुइले सुद्द हुन्या बिधि पुरा अरिसक्या थ्या। ताँ कोइ भिड लइ थेएन्, रे हुलदङा लइ भया थेएन। 19 तर एसिया इलाकाबटहइ आया कति जना यहुदिनले मुलाइ मन्धिरमि धेक्यो, रे तिनुनको मेरा बिरुदमि केइ कुरा थ्यो भन्या तिनुनलेइ हजुरका वाँ आइबर उजुरि अद्दुपड्या थ्यो, 20 या त यहुदिनका माहासभामि हुन्ज्या मेरो कि दोस फेला पाण्याछन् याँ हुन्यानले भुणुन। 21 खालि एकइ कुरा मात्तरइ तिनुनले मुलाइ दोस लाउन सकन्ना, त्यो कि हो भन्या, ‘मुइले तिनुनका बिचमि कलिबर मर्या मान्सन जिउना हुनाहान भुण्या थ्या। आज यइ कुरामि हजुरका अगाडि मेरो मुद्दा चल्ला छ।’” 22 बडा-हाकिम फेलिक्सलाइ मुक्तिको बाटाका बिसयमि निकेरि था थ्यो। तसो भयाहुनाले बडा-हाकिम फेलिक्सले भुन्यो, “आब तमरो उजुरि सेनापति लुसियस आयापाछा मात्तरइ बिचार अर्लो।” 23 इति भुनिबर बडा-हाकिम फेलिक्सले कप्तानलाइ भुन्यो, “पावललाइ निकेरि पहरा दिबर राख्, तर पावललाइ चाइन्या कुरा पुर्याउन्या सङिनलाइ भन्या जनरोक्या रे उनलाइ कडा ब्यबहार जनअर्या भन्न्या आग्या दियो।” बडा-हाकिम फेलिक्स रे द्रुसिल्लाका अगाडि पावल 24 केइ दिन पाछा बडा-हाकिम फेलिक्स आफनि यहुदि स्वाइनि द्रुसिल्लालाइ सङ लेबर आया, उनुले पावललाइ बोलाइबर ख्रिस्ट इसुलाइ बिस्वास अद्द्या बिसयमि तनबटहइ सुण्यो। 25 रे पावलले परमेस्वरका धार्मिक आग्या मानिबर काम अद्दुपणन्छ, आफनो मनलाइ बसमि राख्दुपणन्छ रे परमेस्वरले न्याय अद्द्या दिन आउन्नाछ भन्न्या कुरा सुणाउन्ज्या बडा-हाकिम फेलिक्स अतासिया, रे यसो भुन्यो, “अइलखिलाइ जा, मउका पाया बेलामि मु तमलाइ बोलाउलो।” 26 बडा-हाकिम फेलिक्सले पावलबटहइ घुस पाउनउकि भनिबर आसा अर्या थ्यो, तबइलइ उनुले पावललाइ बेलाबेलामि बोलाइबर कुराकानि अरन्थ्या। 27 रे दुइ बर्सपाछा जबइ बडा-हाकिम फेलिक्स का सट्टामि बडा-हाकिम पर्किअस फेस्तस आया। तर बडा-हाकिम फेलिक्स ले यहुदिनलाइ खुसि राख्दाइलाइ पावललाइ झेलखानाइमि राखिबर गया। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.