प्रेरित 23 - डोटेलि1 पावलले माहासभाका चारइतिर हेरिबर भुन्यो, “दाइभाइन हो, आजसम्म मेरा जिबनका यात्रामि मुइले मेरा मनलाइ परमेस्वरका अगाडि चोखो राख्या छु।” 2 तर तइ कुरामि प्रधान पुजारि हननियाले तिनरा नजिकइ कलियालाइ मुखमि हान्न्या आग्या दियो। 3 तबइ पावलले तनलाइ भुन्यो, “ए कपटि हो! तमुलाइ लइ परमेस्वरले हान्या छन्, तम जो ब्यबस्थाअन्सार मेरो न्याय अद्द बस्या छउ तबइलइ ब्यबस्था नमाणिबर मुलाइ हान्या आग्या दिन्छउ?” 4 रे नजिकइ कल्लियानले भुन्यो, “कि तु परमेस्वरका ठुला पुजारिको अमान अरन्छइ?” 5 तबइ पावलले भुन्यो, “दाइभाइ हो, उन प्रधान पुजारि हुन भन्न्या मुलाइ था थेइन्। क्यालाइकि लेखिया छ, ‘तुइले आफना जनताका सासकका बिरुद्दमि खराबि जन्बोलेइ।’” 6 माहासभामि सदुकि रे फरिसि समुहका मान्सन बस्या छन् भन्न्या कुरा था पाइबर पावलले ठुला स्वरमि भुन्यो, “दाइभाइन हो, मु फरिसिको चेलो फरिसि हुँ। मर्या मान्स अज जिउना हुनाछन् भुन्न्या मुइले आसा राख्या कुरामि याँ मेरो मुद्दा चल्या छ।” 7 तनले यसो भनिसक्यापाछा फरिसिनमि मतभेत भयो, रे भिडमि फाटो भयो। 8 क्यालाइकि सदुकिनले मान्सन मर्याबटहइ जिउना हुनाइन् स्वर्गदुतन रे आत्मा त झिग हुनाइहुनाइन् भुणन्थ्या। तर फरिसिनले भन्या यइ कुरडिमि बिस्वास अरन्थ्या। 9 ताँ ठुलो होहल्ला मचियो, रे फरिसि दलका कोइ कोइ धर्म-गुरुनले कलिबर यसो भुन्नाइ प्रतिबाद अद्द लाग्या, “यइ मान्समि हाम केइ दोस पाउनाइन, रे आत्मा या स्वर्गदुतले यिनलाइ यसो भुण्या हो भन्या कि भयो पइ?” 10 ताँ ठुलो मतभेत भयापाछा उनुनका हातबटहइ पावल लुछालुछ हुन्ना भन्या डरले सेनापतिले सिपाइनलाइ तल्तिर गइबर तनलाइ उनुनका बिचबटहइ बलजबस्तिसित लेइबर ब्यारेक भितर लइजा भनि आग्या दियो। 11 तइ रात प्रभु पावलका नजिकइ धेकिया रे यसो भुन्यो, “हिम्मत अर, पावल क्यालाइकि जसरि तुइले यरुसलेममि मेरा बिसयमि गवाहि दिइ, तसेरि तुइले रोममिलइ गवाहि दिनुपणन्छ।” पावललाइ माद्दया सडियन्त्र 12 भोलिबार ब्याहान यहुदिन भेला होइबर पावललाइ माद्या सर-सल्लाहा अर्यो रे तिनुनले यसो भुणिबर कसम खायो, “पावललाइ नमार्यासम्म हाम केइ लइ खान्या रे पिउन्या आथिन्।” 13 पावललाइ माद्दुपणन्छ भुनिबर कसम खान्या मान्सन चालिस जना भन्ना बर्ता थ्या। 14 तइपाछा तिनुनले मुख्य पुजारि रे धर्म-गुरुनका वाँ जाइबर भुन्यो, “पावलको हत्या नअर्यासम्म हाम केइ खान्या आथिन् भनिबर हामले कसम खाया छउ। 15 तबइलाइ तमु रे माहासभाका सप्पइ मिलिबर सेनापतिलाइ जानकारि दिय रे तइको मुद्दाको निर्णय अज ठिक तरिकाले अद्दु पड्न्छ भन्या बाहाना बनाइबर तइलाइ ब्यारेकबटहइ निकाल, रे माहासभामि आउना आउनइ हाम तइलाइ बाटाइमि माद्दया छउ।” 16 तर पावलका भान्जले यो कुरा था पाइबर ब्यारेकभितर जाइबर पावललाइ सुनाइदियो। 17 पावलले तन्जेइ एक जना कप्तानलाइ बोलाइबर भुन्यो, “यइ केटालाइ सेनापतितका वाँ पुर्याइदिय क्यालाइकि यइले उनसित केइ भुन्नु पड्या कुरा छ।” 18 तइपाछा कप्तानले तइलाइ लयइबर सेनापतिका वाँ पुर्याइबर भुन्यो, “कइदि पावलले मुलाइ बोलाइबर यइ केटालाइ तमरा वाँ पुर्याइदिय भुन्यो, तमलाइ यइले भन्नुपड्या केइ कुरा छ।” 19 सेनापतिले तइ केटाको हात समाइबर एकान्तमि लइजाइबर सोध्यो, “तुइले मुलाइ भुन्नु पड्डाया कुरा कि हो?” 20 तइले भुन्यो, “यहुदिनले पावलका बिसयमि अज निकेरि सोदखोज अद्द्या निउ बनाइबर भोल तिनलाइ माहासभामि लेइदिय भणि तमसङ अनुरोध अद्द्या मत अर्या छ। 21 रे तमले तिनुनको कुरा जनमाण्या, क्यालाइकि चालिस जना भन्ना बर्ता यहुदिनले पावललाइ नमारन्ज्यासम्म केइ खान्या, पिउन्या आथिनउ भनिबर कसम खाइराइछन्। तिनुन अइलइ उनलाइ माद्दाइ ढुकिबर बस्याछन् रे हजुरका आग्याका आसामि पखिरइछन्।” 22 तबइलाइ सेनापतिले तइ केटालाइ यसो भुणिबर पठायो, “तुइले मुलाइ यो रइबार दिया कुरा कसइलाइ लइ जनभुनेइ” भनिबर पठायो। पावल कइसरियामि पठाइया 23 तइपाछा सेनापतिले दुइ जना कप्तानलाइ बोलाइबर भुन्यो, “आज रात नउ बजेतिर दुइ सउ सिपाइन, सत्तरि जना घोडचडि रे दुइ सउ भाला बोक्द्या सिपाइन तयार अर, उनुन बासाइतिकका नउ बजेइतिर हिट्ट तयार हुन्पडन्छ। 24 रे पावलकि निउति लइ घोडाको ब्यबस्था अर, रे उनलाइ सुरछित बडा-हाकिम फेलिक्स का वाँ पुर्याउन्पडन्छ।” 25 सेनापतिले यसो किसमको चिट्ठि लइ लेख्यो। 26 “माननिय बडा-हाकिम फेलिक्सलाइ, मु क्लउडियस लुसियसको ढोग! 27 यइ मान्सलाइ यहुदिनले पकणिबर माद्द खोज्याथ्यो, तर यो रोमि नागरिक रइछ भन्न्या मुइले था पाइबर मु आफुइ सेना लयइबर ताँ गया रे तइलाइ छुटाइबर लेया। 28 यइले कि गल्ति अर्यारइछ भन्न्या जान्नाइलाइ मुइले यइलाइ तिनरा माहासभामि लेया। 29 रे यइले त ज्यान सजाय पाउनुपड्या या थुनिनुपड्या खास अपराध केइलइ नअर्यारइछ। उनरो दोस उनराइ धार्मिक नियमका बिसयमि रइछ। 30 यहुदिन यइ मान्सलाइ माद्दया बिचारमि रइछन् भन्या कुरा सुनिबर मुइले यइलाइ छिट्टाइ तमरा वाँ पठाया हुँ। यइलाइ दोस लाउन्या यहुदिनलाइ लइ तमराइ वाँ उजुर अद्दु भनिबर आदेस दिराइछु।” 31 कप्तान रे सिपाइनले सेनापतिको आदेसअन्सार पावललाइ रातइ एन्टिपाट्रिसमि पुर्यायो। 32 भोलिबार पइदल सिपाइनले पावललाइ घोडचडि सिपाइनका जिम्मामि लाइबर ब्यारेकमि फर्किया। 33 कइसरिया पुग्या पाछा तिनुनले हाकिमलाइ चिट्ठि बुजाइबर पावललाइ उनरा अगाडि हाजिर अरायो। 34 त्यो चिट्ठि पडिबर ठुला हाकिमले पावललाइ सोध्यो, “तेरो घर काँ हो? कइ ठउँरमि पणन्छ?” पावलले भुन्यो, “किलिकियामि पडन्छ, हजुर।” 35 ठुला हाकिमले पावललाइ भुन्यो, “तुलाइ उजुर अद्द्यान आयापाछा तेरा कुरा सुण्ला।” तइपाछा ठुला हाकिमले पावललाइ सुरछ्यासित हेरोदले बनाया दरबारमि राख्द्या हुकुम अर्यो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.