प्रेरित 22 - डोटेलि1 “दाइभाइ रे बा हो, तमरा अगाडि मुइले मेरा बारेमि भुन्नु पड्डाया कुरा आब सुण। 2 पावलले हिब्रु भासामि बोल्या सुनिबर सप्पइ मान्सन चुप लाग्या। 3 “मु किलिकिया सहरका टार्ससमि जन्मिया एक यहुदि हुँ, रे यइ सहरमि गमलिएलको सिस्य होइबर हुर्किया हुँ, हामरा पुर्खाका बिधिअन्सार मुइले निकोनिको सिछ्या पाया हुँ, आज तमु परमेस्वरको सेबा अद्द जति उत्साहित छउ मुलइ तति उत्साहित थ्या। 4 मुइले मुक्तिका बाटामि लाग्या मान्सनलाइ माद्दाइसम्म सताया थ्या। मुइले बइकान मान्स रे स्वाइनि मान्सनलाइ पकणिबर झेलखानामि थुन्न लाया थ्या। 5 ठुला पुजारि रे सप्पइ माहासभाले लइ यइ बिसयमि मेरा पछ्यमि गवाइ दिनाहान्। क्यालाकि उनराइ तर्फबटहइ दमस्कस भन्न्या ठउँरमि यहुदि दाइभाइनलाइ पकणाउन्या अधिकारको पुर्जि पाइबर मु ताँ भया बिस्वासिनलाइ बादिबर यरुसलेममि लेइबर सजाय दिनाइलाइ दमस्कसमि गयाथ्या।” आफु परिबर्तन भया बिसयमि पावलले भुन्यो ( प्रेरित ९:१-१६ ; २६:१२-१८ ) 6 “दमस्कसमि पुगन्ज्या लगभग छकलाइतिकको समय थ्यो। तसइ बेला अग्गासबटहइ अचानक एक ठुलो ज्योति मेरा वल्लतिर पल्तिर चम्कियो। 7 रे मु जमिनमि लोट्या, तन्जेइ मुइले एक यसो भन्नारया आबाज सुण्या, ‘ए साउल, ए साउल, तु मुलाइ क्याकि सताउन्नाछइ?’ 8 रे मुइले सोद्या, हे प्रभु, तम को हउ? उनुले भुन्यो, ‘मु नासरतको इसु हुँ, जइलाइ तु सताउन्नाछइ।’ 9 रे मुसित हुन्यानले ज्योति त धेक्यो, तर सुण्या आबाज बुजेन। 10 मुइले भुण्या, ‘हे प्रभु आब मु क्यारु?’ रे प्रभुले मुलाइ भुन्यो, ‘उठ् दमस्कस सहरमि जा रे तुइले अद्दुपड्या कामका बिसयमि तुलाइ ताँइ बताइन्या छ।’ 11 तइ चम्किला उजालाले अरन्ज्या मु आँखा नधेक्द्या भयाथ्या रे मुसित हुन्यान्ले मुलाइ समाइबर दमस्कसमि लेया। 12 “तइ सहरमि हननिया नाउँ भया एक जना मान्स बसन्थ्या। उन मोसाले दिया ब्याबस्था पालन अद्द्या धर्मि मान्स थ्या रे दमस्कसमि बस्या यहुदिन सप्पइले उनलाइ आदर अरन्थ्या। 13 तन मेरा वाँ आया, रे मेरा नजिकइ कलिबर मुलाइ भुन्यो, ‘भाइ साउल, अज धेक्द्दया होइजा।’ तिनले तसो भुणिसक्या पाछा मु अज आँखा धेक्द्दया भया। 14 तइपाछा उनुले मुलाइ भुन्यो, ‘तमले हामरा पुर्खाका परमेस्वरको इछ्या बुज्ज, धर्मि इसुलाइ धेक्द रे उनरा मुखबटहइ बोलिया कुरा सुन्नाइलाइ परमेस्वरले तमलाइ छान्या छ। 15 क्यालाइकि तमले उनरा साछि भइबर आफुले धेक्या रे सुन्या कुरा सप्पइ मान्सनका अगाडि सुणाउन पड्डया छ। 16 आब क्याकि ब्यालो अद्द्या हउ? उठ रे बप्तिस्मा लिय। इसुमि बिस्वास अरिबर आफना पापबटहइ सुद्द हो।’” 17 “यरुसलेममि फर्किबर आयापाछा मन्धिरमि प्रार्थना अद्दाअद्दाइ मुइले दर्सन धेक्या। 18 मुइले प्रभुलाइ धेक्या रे प्रभुले मुलाइ भुन्यो, ‘झट्ट यरुसलेबटहइ जा, क्यालाइकि तुइले मेरा बिसयमि भुण्या गवाहि ताँका मान्सनले ग्रहण अद्द्या आथिनन्।’ 19 मुइले भुण्या, ‘हे प्रभु, मुइले हरेक सभाघरमि जाइबर तममि बिस्वास अद्द्यानलाइ झेलखानामि हलिबर कुटपिट अर्या इनुन सप्पइलाइ थाइ छ। 20 तमरो साछि दिन्या स्तिफनसको हत्या हुन्ज्या मु आफुलइ नजिकइ कलिबर तइ हत्यामि सहमत थ्या, रे उनरो ज्यान लिन्यानसित सहमत भइबर तिनरा लत्ताखिलाइ ढुकिबर बसिरइथ्या।’ 21 तबइ प्रभुले मुलाइ भुन्यो, ‘जा, क्यालाइकि मु तुलाइ दुर दुरसम्म अउरजातिका वाँ पठाउन्या छु।’” 22 इति भुणज्यासम्म ताँ भया मान्सनले पावलका कुरा सुनिरइथ्या, तर तइपाछा तिनुनले ठुला स्वरले कला हाल्लाइ भुन्न लाग्या, “तइलाइ माद्दुइपणन्छ! माद्दुइपणन्छ! आब त्यो बाँच्या योग्यको आथिन्।” 23 उनुन आफना लत्ता चिरिबर रे धुलिभकुणान्त अद्दाइ कला हाल्ल लाग्या। 24 तसो भया धेकिबर रोमि सेनापतिले भितर लइजाइबर पावललाइ कोर्रा लाउन्या आग्या दिबर भुन्यो। काँइ कोर्रा लाउन्ज्या यहुदिन क्याकि रिसाया रइछन् भनिबर तइले बताउछ कि। 25 रे जबइ तिनुनले पावललाइ छालाका रसिले बाद्यो, तबइ पावलले नजिकइ कलिबर कप्तानलाइ सोध्यो, “कि रोमि नागरिकलाइ दोसि नठरायइ कोर्रा लाउन पाइन्छ? कि रोमि कानुनमि यसोइ अद्दु भनिबर भुण्या छ?” 26 कप्तानले सेनापतिका वाँ जाइबर यो कुरडि सुनायो रे भुन्यो, “हजुर! कि अद्द चाहान्छउ? तमलाइ थ्या आथिन्? यो मान्स त रोमि नागरि रइछ।” 27 रे यो कुरडि सुन्यापाछा सेनापतिले आइबर पावललाइ सोध्यो, “मुलाइ भुण, कि तु रोमि नागरिक हइ?” तनले भुन्यो, “हो, हजुर मु हुँ।” 28 सेनापतिले भुन्यो, “मुइले त भउत पइसा तिरिबर रोमि नागरिक भया हुँ।” पावलले भुन्यो, “मु त जन्मइबटहइ रोमि नागरिक हुँ।” 29 रे तिनलाइ जाँच अद्द तयार भयाजति सप्पइ उन्जेइ गया, रे पावल एक रोमि नागरिक रइछन् भनि थाहा पाइबर सेनापति लइ डराया, क्यालाइकि उनुले तिनलाइ साङलाले बाद्द लाया थ्यो। पावल यहुदि माहासभाका अगाडि 30 यहुदिनले पावललाइ क्याकि दोस लाया हुन्, त्यो कुरा सेनापति बुज्ज चाहान्थ्या, तसो भयाहुनाले भोलिबार उनुले मुख्य पुजारि रे माहासभाका सप्पइ सदस्यानलाइ बोलाइबर सभा अद्द्या आग्या दियो रे पावललाइ लयइबर सप्पइका अगाडि कलेयो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.