प्रेरित 21 - डोटेलियरुसलेमतिर पावलको यात्रा 1 एफिसस मण्डलिका अगुवानसित बिदा भयापाछा हाम पानिजहाजमि चडिबर सिधाइ कोस भन्न्या टापुमि आया, रे भोलिबार रोडस टापुमि आया रे ताँबटहइ पटारा सहरमि आया। 2 ताँ हामले फोनिके छेत्रसम्म जान्या पानिजहाज पाया रे हाम तसइमि चडिबर गया। 3 जबइ साइप्रस देस धेकियो, तबइ हाम तइलाइ दाइनतिर पाडिबर सिरिया इलाकातिर लागिबर टुरोस सहरमि ओरल्या। क्यालाइकि ताँ पानिजहाजका मालसामान उताद्दथ्यो। 4 रे ताँ बस्या बिस्वासि दाइभाइनलाइ भेट्ट गया रे एक हप्तासम्म तिनुनसितइ बस्या। पबित्तर आत्माबटहइ अगुवाइ पाइबर तिनुनले पावललाइ यरुसलेममि जन्जा भनिबर बिन्ति अर्यो। 5 ताँबटहइ हामरो हिट्टयाबेला भयापाछा हाम बिदा भइबर आफना यात्रामि निकल्या। ताँ भया प्रभुमि बिस्वास अद्या सप्पइ दाइभाइ, दिदिबइनि रे केटाकेटिसमेत हामुलाइ सहर बाइरसम्म पुर्याउन आया, रे हाम सप्पइले समुन्दरका किनारामि घुणा टेकिबर प्रार्थना अर्या, रे एक अर्काबटहइ बिदा भया। 6 तइपाछा हाम पानिजहाजमि चड्या, रे तिनुन आफना घरतिर फक्र्या। 7 टुरोस सहरबटहइ समुन्दरको यात्रा अरिबर हाम टोलेमाइस सहरमि पुग्यापाछा पानिजहाजबटहइ ओरल्या। हाम ताँ भया प्रभुमि बिस्वास अद्या दाइभाइनलाइ भेट अद्द गया रे एक दिन तिनुनसितइ बस्या। 8 भोलिबार हाम ताँबटहइ बिदा भइबर कइसरिया सहरमि पुग्या, रे प्रचारक फिलिपका घरमि बस्या। उन यरुसलेममि सेबा अद्द चुनिया सात जनामध्ये एक जना थ्या। 9 अगमबाणि बोल्लेइ तिनरि चार जनि ब्या नअरेइ चेलि थिन्। 10 हाम ताँ केइ दिन फिलिपका परिवारसित बसन्ज्या यहुदिया छेत्रबटहइ अगाबस नाउँ भया एक जना अगमबक्ता हाम भया ठउँर आया। 11 उनुले हाम भया ठउँर आइबर पावलको पट्को समाइबर आफना हात रे खुट्टा बाँधिबर भुन्यो, “पबित्तर आत्माले यसो भन्नाहान, यो पट्को जइ मान्सको हो, तइलाइ यरुसलेममि यहुदिनले इसेरि बाँद्दयाछन् रे अउरजातिनका हातमि सुउपिदिन्याछन्।” 12 यो कुरडि सुनिबर, हाम रे तइ ठउँर भया मान्सन सप्पइ मिलिबर पावललाइ यरुसलेममि जन्जा भनि बिन्ति अर्यो। 13 रे पावलले भुन्यो, “तमु इसेरि रोइबर मेरा मनलाइ क्याकि छिया छिया पाडन्छउ? क्यालाइकि प्रभु इसुका नाउँकि निउति बादिन् मात्र हइन, यरुसलेममि मद्द लइ तयार छु।” 14 पावललाइ मनाउन नसकन्ज्या “प्रभुको इछ्या पुरा हउ” भनिबर हाम चुप लाग्या। 15 तइपाछा हामले आफना सामान तयार अरिबर यरुसलेमतिर लाग्या। 16 हामसित कइसरिया भन्या ठउँरका प्रभुमि बिस्वास अद्द्या कोइ कोइ दाइभाइन लइ आया, रे तिनुनले हामुलाइ साइप्रस टापुबटहइ आइबर बस्या प्रभुका एक जना पुराना बिस्वासि मनासोनका घरमि लइया, तनरा वाँ हाम बास बस्या। पावल यरुसलेमि पुग्या 17 हाम यरुसलेममि आइ पुगन्ज्या, ताँका बिस्वासिनले हामुलाइ भउत खुसिहोइबर स्वागत सत्कार अर्यो। 18 भोलिबार पावल हामसित याकुबका वाँ गया। याकुबका घरमि मण्डलिका सप्पइ अगुवान भेला होइरइथ्या। 19 पावलले तिनुन सप्पइलाइ भेटघाट अर्यापाछा, उनुले तिनरा सेबकाइमि भया अउरजातिका बिचमि परमेस्वरले अर्या काम तिनुनलाइ एक एक अरिबर बताइदियो। 20 यो सुन्यापाछा तिनुनले परमेस्वरको महिमा अर्यो। तबइ तिनुनले पावललाइ भुन्यो, “हेर भाइ, यहुदिनका बिचमि बिस्वास अद्द्या हजारउ छन् रे ब्यबस्थाका कुरामि उनुन सप्पइ भउत जोसिला छन्। 21 आब ‘मोसाका ब्यबस्था मान्नुपड्डइन रे बालखनका सरिलको खतना अद्दु पड्डइन रे यहुदि रितिथितिमि चल्लु पड्डइन’ भनि अउरजातिनका बिचमि बस्या यहुदिनलाइ तमले सिकाउन्ना छउ भन्न्या कुरडि उनुनले सुण्या छन्। 22 तसो भयाहुनाले आब हाम क्यारु? तम आया छउ भनिबर तिनुनले पक्काइ सुण्या छन्। 23 तबइलाइ जि हाम भुन्नाउ, त्यो अर भाकल अद्द्या चार जना हामसित छन्। 24 यिनुनलाइ मन्धिरमि लयइबर सुद्द हुन्या काममि तम लइ भाग लिय, रे यिनुनलाइ चाइन्या खर्च तमलेइ दिय, रे यिनुनले रउ खोउरुन्, इसेरि तमले ब्यबस्था पालन अर्या धेकिबर तमरा बिसयमि सुन्या कुरा सत्य नरइछ भन्या सप्पइले थाँ पाउन्या छन्। 25 तर अउरजातिन जइले प्रभु इसु ख्रिस्टमि बिस्वास अर्या छन्, तिनुनले मुर्तिलाइ बलि चडाया थोक, रगत, रे घाँटि निमोरिबर मार्या पसुको मासु जनखाया रे ब्यबिचारबटहइ अलग बस्सु भनिबर हामले निर्णय अरिबर चिट्ठि लेख्या छउ।” 26 भोलिबार पावलले तन चार जना मान्सलाइ मन्धिरमि लयइबर तनले तिनुनसितइ आफुलाइ लइ सुद्द अरायो। तइपाछा पावल सुद्द हुन्या उबासको भाकल पुरा अरिबर बलि चढाउन्या दिन कब हो भनि पुजारिलाइ थाँ दिनाइलाइ मन्धिर भितर पस्या। पावल मन्धिरमि पकणाउ पण्या 27 भाकल अर्या सात दिन पुरा हुन्नाथ्या, तबइ एसिया इलाकाबटहइ आया यहुदिनले पावललाइ मन्धिरमि धेक्यो। तिनुनले मान्सका भिडलाइ भड्काइबर पावललाइ पकणाउ अर्यो। 28 उनुन यसो भन्नाइ कलाहाल्ल लाग्या, “इज्राएलका दाइभाइन हो, आस रे हामुलाइ साहेता अर मान्सनलाइ जाँइताँइ हामरो जाति, हामरो ब्यबस्था रे यइ ठउँरका बिरुद्दमि सिछ्या दिनोइ हिट्टया मान्स यइ हो। इति मात्तरइ हइन, यइले ग्रिकनलाइ लइ मन्धिर भितर लेइबर यइ पबित्तर ठउँरलाइ असुद्द पाणदिया छ।” 29 क्यालाइकि तिनुनले एफिससका तोरोफिमस भन्न्या एक जना मान्सलाइ पावलसंग सहरमि धेक्या हुनाले पावलले तइलाइ मन्धिर भितर लेया हो भन्न्या तिनुनले सोच्यो। 30 तबइ यइ कुराले सहरभरि होहल्ला भयो, रे मान्सन चारइतिरबटहइ ओइरिबर आया। तिनुनले पावललाइ तानिबर मन्धिरबटहइ बाहिर निकाल्यो, रे उन्जेइ मन्धिरको देलो बन्द अरिदियो। 31 जबइ तिनुनले पावललाइ माद्दया बिचार अद्दाथ्या, तबइ सारा यरुसलेम सहरमि मारकाट हुन्ना छ भन्न्या रइबार रोमि सेनापतिका कानमि पुग्यो। 32 रोमि सेनापतिले उन्जेइ सिपाइ रे कप्तान लेइबर दगुड्डाइ आया। मान्सले सेनापति रे कप्तानलाइ आउन्नारया धेकिबर पावललाइ हान्न छाड्यो। 33 सेनापतिले पावललाइ समाइबर दुइ साङ्लाले बाद्दया हुकुम दियो यो को हो, रे यइले कि अर्यो भनि उनुले सोध्यो। 34 रे तइ भिडमि कसइले एक कुरा कसइले अर्खो कुरा भनिबर कला हाल्ललाग्या, रे उनुले तइ होहल्लाले अरन्ज्या घटना कि हो भनिबर था पाउन नसक्याहुनाले पावललाइ सेनान् बस्या ब्यारेकमि लइजा भन्न्या आग्या दियो। 35 सिपाइनले पावललाइ लइजान्ज्या मान्सको हुल उनरा पाछा पाछा लाग्यो। सिणिबटहइ मल्तिर जान्ज्या मान्सन पावललाइ माद्द आया, तसो भयाहुनाले मान्सबटहइ बचाउनाइलाइ सिपाइनले उनलाइ बोकिबर लइया। 36 तेइ बेलासम्म लइ मान्सन पावललाइ माद्दु पणन्छ भनिबर कलाहाल्लाइ पाछा पाछा लाग्या थ्या। पावलले भिडसित आफना बिसयमि भुन्यो 37 ब्यारेकभितर पुर्याउन्ज्या पावलले सेनापतिलाइ ग्रिक भासामि यसो भुन्यो, “हजुर, मु तमलाइ केइ कुरडि भुन्न सक्दउ?” उनुले भुन्यो, “कि तुलाइ ग्रिक भासा आउँछ?” 38 “कि तु तेइ मिस्र देसको मान्स हइनि, जइले उपद्दर मच्चाइबर चार हजार बिद्रोहिनलाइ उजाड ठउँरमि लइया थ्यो?” 39 पावलले भुन्यो, “हइन हजुर, मु त किलिकियाको टार्सस सहरमि जन्मिया यहुदि हुँ। नानातिना सहरको मान्स मु होइन। बिन्ति छ यिन मान्सनका अगाडि मुलाइ केइ कुरडि बोल्ल दिय।” 40 जबइ सेनापतिले अनुमति दियो, तबइ सिणिमि कल्लिबर पावलले मान्सनलाइ हातका इसाराले सान्त पाड्यो। मान्सन सान्त भयापाछा, पावलले हिब्रु भासामि यसो भुन्यो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.