प्रेरित 20 - डोटेलिपावल माकेडोनिया सहर रे ग्रिस देसमि 1 यो होहल्ला सान्त भयापाछा पावलले बिस्वासिनलाइ बोलाइबर तिनुनलाइ अर्ति दियो, रे तिनुनसित बिदा मागिर ताँबटहइ माकेडोनिया इलाकातिर गया। 2 ताँ पुग्यापाछा उनुले ठाउँ ठाउँमि गइबर प्रभुमि बिस्वास अद्या बिस्वासिनलाइ भउत हउसला दियो तइपाछा उन ग्रिस देसमि गया। 3 ताँ तनले तिन महिना काट्यो। तइपाछा पावल पानि जहाज चडिबर सिरियातिर जान्ज्या यहुदिनले उनरा बिरुद्दमि जाल रच्चाछन् भन्न्या कुरडि उनुले था पायो, त्यसो भयाहुनाले पावलले पानिजहाजबटहइ नजाइबर हिटिबर माकेडोनिया होइबर जान्या मन अर्यो। 4 तबइ बेरिया सहरमि बस्या पुरसका चेला सोपातोरोस, थेसलोनिके सहरमि बस्या अरिस्तार्खस रे सिकन्दस, डर्बि सहरमि बस्या गायस, तिमोथि रे एसिया इलाकाबटहइ आया तुखिकस रे तोरोफिमस सङ गया। 5 तिनुन हामभन्दा अगाडि गइबर हामुलाइ तोरोआस सहरमि पखिरइथ्या। 6 तबइ हाम निस्तार चाड माणिसक्या पाछा फिलिप्पि सहरबटहइ पानि जहाज चडिबर गया, रे पाँच दिनपाछा तिनुनलाइ तोरोआस सहरमि भेट्या, रे ताँ हाम सात दिनसम्म बस्या। युटिकस मर्याबटहइ जिउनो बनाइयो 7 आइतबार बासाइतिक हाम ताँ भया प्रभुमि बिस्वास अद्द्या बिस्वासिनसित प्रभु-भोज खानाइलाइ भेला भया। तब पावलले भोलिबार जान्या इच्छा अर्या हुनाले, तिनुनसित आधा रातसम्म कुरा अद्द लाग्या। 8 हाम भेला भया मल्ला तलामि भउत बत्ति बल्या थ्यो। 9 युटिकस नाउँ भया एक जनो केटो झ्यालमि बस्या थ्यो। पावलले भउत बेरसम्म कुरडि अर्याहुनाले त्यो केटो झुम्द लाग्यो, झुम्दाझुम्दाइ उ सिइयो रे तिन तला मल्तिरबटहइ तल्तिर झण्यो। उइलाइ उठाउन जान्ज्या उ मरिसक्याथ्यो। 10 तबइ पावल तल्तिर ओरलिबर तइमि घोप्टो पडिबर उइलाइ अङाल हाल्यो रे वरिपरि भया मान्सनलाइ भुन्यो, “चिन्ता जनअर, यो केटो त जिउनोइ छ।” 11 तइपाछा पावल मल्ला तलामि गया रे सप्पइ मिल्बर प्रभु-भोज खायो, प्रभु-भोज खाइसक्यापाछा रातभरि ब्याहानइ उज्यालो नहुन्ज्या सम्म भउत कुरा अरिबर बस्या, तइपाछा उन बिदा भया। 12 ताँका बिस्वासिनले तइ केटालाइ घर पुर्याइदियो, तर त्यो केटो जिउनो भयाहुनाले हुनाले सप्पइ खुसि भया। पावलले तोरोआसबटहइ मिलेटससम्म यात्रा अर्यो 13 तोरोआसबटहइ पावलबाहेक हाम सप्पइ पानिजहाज चडिबर अस्सोस सहरमि गया। पावललाइ अस्सोससम्म हिटिबर जान्या इच्छा भया हुनाले उनुले आफुलाइ अस्सोसमि मात्तरइ पानिजहाज चड्या बन्दोबस्त अर्या थ्यो। 14 हाम अस्सोसमि पुग्यापाछा पावलले हामुलाइ भिट्यो, हामले उनलाइ पानि जहाजमि चडाया रे हाम सप्पइ मिल्बर मितिलेन सहरमि गया। 15 ताँबटहइ पानिजहाजमि यात्रा अरिबर भोलिबार खियस टापुका नजिकइ आया, रे पोर्किका दिनमि सामोस टापुमि पुग्या, तइका अर्खा दिन मिलेटस सहरमि आया। 16 एसियामि अलमल्ल हुन्छ भनिबर पावल एफिसस सहरमि नपसि जान्या बिचार अर्यो, क्यालाइकि उनलाइ यरुसलेममि पुग्द हतार भया थ्यो, उनुले पेन्तिकोसको चाडसम्म पुग्द्या इच्छा राख्या थ्यो। एफिसस मण्डलिका अगुवानसित पावलको बिदाइ 17 मिलेटस सहरबटहइ पावलले एफिसस सहरमि भया मण्डलिका अगुवानलाइ बोलायो। 18 तिनुन ताँ आयापाछा पावलले भुन्यो, “मुइले एसियामि पाइला टेक्या दिनबटहइ तमुसित बसन्ज्या तन दिन कसेरि काट्या त्यो तमुलाइ थाइ छ। 19 मुइले त नम्रहोइबर आँसु बगानोउ यहुदिका सतावटमि लइ प्रभुको सेबा अर्या। 20 तमरो भलाइ हुन्या कुरा तमु सप्पइका अगाडि घोसणा अद्दबटहइ रे घर घरमि पसिबर सिछ्या दिनबटहइ मु पाछा हटेन। 21 यहुदिनलाइ रे ग्रिकनलाइ पस्साताप अरिबर परमेस्वरतिर फर्किय रे हामरा प्रभु इसु ख्रिस्टमि बिस्वास अर भन्न्या कुराको प्रचार मुइले अर्या छु। 22 अइल मु पबित्तर आत्माले भुण्या मानिबर यरुसलेमतिर जान्नाछु, ताँ मुलाइ कि हुन्या हो मु जान्नइन। 23 इति मात्तरइ जान्नउ कि मु गया सप्पइ सहरमि सतावट रे झेलखानाको दु:ख मुइले भोग्दुपड्या छ भनिबर पबित्तर आत्माले मुलाइ थाँ दिया छन्। 24 तर मु आफना जिबनलाइ केइ मोलको लइ ठान्नइन, इति मात्र चाहानउ कि परमेस्वरले मान्स जातिलाइ अनुग्रह अर्या छ भन्या असल रइबारको गवाहि दिनाइलाइ मेरो दउड रे प्रभु इसुबटहइ मिल्या मेरो सेबकाइ मु पुरा अद्द सकु। 25 “आब हेर, मु जान्नउ कि तमुमध्ये जइ जइलाइ मुइले परमेस्वरका राज्यको प्रचार अद्दोइ आया छु, तमुसित मेरो भेट आब कभइलइ हुन्या आथिन् भन्न्या कुरडि मुलाइ थाँ छ 26 तबइलाइ आज मु तमुलाइ साछि दिनोइ भुन्ना छु, रे तमुमध्ये कोइ नास भयो भन्या मुलाइ तइको दोस लाग्द्या आथिन्। 27 क्यालाइकि परमेस्वरले हामरा उद्दारकि निउति अर्या कामका बिसयमि केइ कुरडि लइ बाकि नराखि मुइले तमुलाइ सप्पइ बताइसक्या छु। 28 आब तमु आफनि निउति रे आफना बिस्वासिन कि निउति सचेत होइबर बस, पबित्तर आत्माले तमुलाइ बिस्वासिनको जिम्मावाला बनाया हुनाले उनुले आफनाइ रगतले किन्या परमेस्वरका मण्डलिको हेरबिचार तमुले अर। 29 क्यालाइकि मुलाइ थाँ छ, मु गयापाछा डरलाग्दा ब्वाँसाजसा मान्सन तमरा बिचमि पस्याछन्, रे मण्डलिलाइ दु:ख दिन छाड्डया आथिनन्। 30 तमराइ बिचबटहइ लइ झुटा सिछ्या दिन्या मान्सन निकल्याछन्, तिनुनले बिस्वासिनलाइ आफना पाछा लइजान्याछन्। 31 तबइलाइ यो बिचार अरिबर होसियार बस, रे मुइले तिन बर्ससम्म दिनरात आँसु बगाइबर सिकाया कुरडि जन बिसर्या। 32 “आब मु तमुलाइ परमेस्वरका हातमि जिम्मा लाउन्नाछु रे उनराइ अनुग्रहले भरिया बचनका भरमि सउपिदिनउ, जइबटहइ परमेस्वरले तमुलाइ बिस्वासमि बलियो बनाइरन्या छन् रे आफना मान्सनलाइ आसिसका भागिदार बनाउन्या छन्। 33 मुइले कसइ मान्सको सुन चाँदि रे लत्ताको लोभ अरेन। 34 तमु आफुइलाइ थाँ छ कि मेरा यिनइ हातले काम अरिबर मुलाइ रे मेरा सङिनलाइ चाइन्या कुरा जुटाया। 35 इसेरि ‘लिन्या भन्ना दिन्या धन्य हुन्’ भनिबर प्रभु इसु आफुइले भुण्या कुरालाइ सम्जिबर कमजोरि मान्सनको हेरचाह अद्द सक्यासम्म परिस्रमसित काम अद्दुपणन्छ भनि मुइले सप्पइ कुरडिमि धेकाया छु।” 36 इति भुणिबर पावलले सप्पइसंग मिल्बर घुणा टेक्यो रे प्रार्थना अर्यो। 37 तिनुन सप्पइ रोया, रे पावललाइ अङाल हालिबर भात्ति खायो। 38 पावलले एक अर्खासित अज कभइ भेट हुनइन भन्याहुनाले तिनुन भउत दुःखि भया, तइपाछा तिनुनले पावललाइ पानिजहाज सम्म पुर्याइ दियो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.