प्रेरित 19 - डोटेलिपावल एफिसस सहरमि 1 अपोल्लोस कोरिन्थ सहरमि हुन्ज्या पावल एसिया इलाकाका बिचबटहइ भइबर एफिसस सहरमि आइपुग्या। ताँ पावलले प्रभुमि बिस्वास अद्या सिस्यानलाइ भिट्यो। 2 उनुले तिनुनलाइ सोध्यो, “कि तमुले प्रभुमि बिस्वास अरिबर पबित्तर आत्मा पाया?” तिनुनले भुन्यो, “हामले त पबित्तर आत्मा छ भन्न्या सुन्या लइ आथिन्।” 3 अज पावलले सोध्यो, “तसो हो भन्या तमुले कसो बप्तिस्मा लिया?” तिनुनले भुन्यो, “युहन्नाले सिकाया बप्तिस्मा पाया।” 4 पावलले भुन्यो, “युहन्नाले सिकाया बप्तिस्मा पापबटहइ मन फिराउनाइलाइ हो। युहन्नाले त ‘मु पाछा आउन्या इसुमि बिस्वास अद्दु’ भणि मान्सनलाइ बतायाथ्यो।” 5 यो सुन्यापाछा तिनुनले प्रभु इसुका नाउँमि बप्तिस्मा लियो। 6 पावलले आफनो हात तिनुनमि राख्यो रे पबित्तर आत्मा तिनुनमि आया। तइ बेला तिनुनले अउर भासामि बोल्यो रे अगमबाणि लइ अर्यो। 7 ताँ लगभग जम्मा बार जना मान्सन थ्या। 8 पावल यहुदिका सभाघरमि गया रे तिन मइनासम्म डरनमानिबर मान्सनलाइ सिछ्या दियो। उनुले परमेस्वरका राज्यका बिसयमि छलफल अरिबर तिनुनलाइ बिस्वासमि ल्याउन्या कोसिस अर्यो। 9 रे कसइ कसइले मन कठोर पाणिबर प्रभुमि बिस्वास अरेइनन्। झिग तिनुनले प्रभुले दिया मुक्ति पाउन्या बाटाका बिरुद्दमि सप्पइका अगाडि टफुचेरो बोल्न लाग्या। तबइ पावलले तिनुनका सभाघरमि जान छाण्यो रे प्रभुमि बिस्वास अद्द्या बिस्वासिनलाइ आफुसित लइजाइबर टुरान्नस भुणिन्या मान्सले बनाया इस्कुलमि दिनदिनि मान्सनसित भेटिबर असल रइबारका बिसयमि छलफल अद्द लाग्या। 10 यो काम दुइ बर्ससम्म चल्यो, रे एसियाका सप्पइ बासिन्दान, यहुदि रे ग्रिक दुयइले प्रभुको बचन सुण्यो। 11 परमेस्वरले पावलका हातबटहइ अचम्मका रे भउत ठुलाकाम अर्यो। 12 याँसम्म कि मान्सनले पावलका सरिलमि रुमाल याँ सउल छोइबर बिमारिनका वाँ लइजान्थ्या, तन बिमारिन निका हुन्थ्या, रे भुत लाग्या मान्सबटहइ भुत निकलबर जान्थ्या। 13 तर इथउथ घुमिफिर अद्द्या यहुदिन झाणफुक अद्द्याले भुत आत्मा लाग्यालाइ प्रभु इसुको नाउँमि यसो भुन्यो, “पावलले प्रचार अर्या इसुका नाउँमि मु तुलाइ निकल्या आग्या अद्दउ।” 14 ताँ एक जना स्केवास भन्न्या यहुदि मुख्य पुजारिका सात जना चेलानले लइ त्यो काम अरन्थ्या। 15 रे भुत आत्माले तिनुनलाइ यसो भुन्यो, “मु इसुलाइ चिन्नउ, रे पावललाइ लइ चिन्नउ, तर तमु को होउ?” 16 त्यो भुत आत्मा लाग्या मान्स तिनुनमि जाइ लागिबर जित्यो, रे तिनुन घरबटहइ नाङाइ रे घाइते भइबर भाग्या। 17 यो कुरडि एफिससमि भया यहुदि रे ग्रिकनमि फइलियो, रे तिनुनले प्रभु इसुका नाउँको ठुलो प्रसम्सा अर्यो। 18 बिस्वास अद्द्या भउत जना आइबर आफुइले अर्या फुचेरा काम सुइकार अर्यो। 19 तिनुनमध्ये भउत जना जो टुनामुना अद्द्याले आफना आफना किताब बटुल्बर लेया, रे सप्पइका अगाडि जलाइदियो। तिनुनले जलाया किताबको मोल अरन्ज्या पचास हजार चाँदिका सिक्काको हिसाब भयो। 20 इसेरि प्रभुको बचन फइलिनोइ गयो, रे प्रभाबसालि भयो। एफिसस सहरमि हुल दङ्गा 21 तइपाछा पावल माकेडोनिया रे अखइया हुनाइ येरुसलेम जान्या मन अर्यो, उनुले भुन्यो, “यरुसलेम पुग्या पाछा मुइले रोम सहर लइ जानुपणन्छ।” 22 तइपाछा उनुले आफनो सेबा अद्द्या तिमोथि रे इरास्तसलाइ माकेडोनिया पठायो, रे आफु केइ दिनसम्म एसिया इलाकामि बस्या। 23 तइ समयमि मुक्ति दिन्या बाटाको प्रचार भया हुनाले एफिससमि ठुलो हलचल मचियो। 24 क्यालाइकि डेमेतिरियस नाउँ भया एक जना कालिगरले आर्तेमिस देबिको चाँदिका नाना-नाना मन्धिर बनाउथ्यो, उ रे उइले राख्या कालिगरले समेत भउत रुपिया कमाउथ्या। 25 रे डेमेतिरियसले आफना कालिगर रे तिनरो जसोइ काम अद्द्या सप्पइ मान्सलाइ जम्मा अरिबर भुन्यो, “भाइन हो, तमुलाइ थाइ छ, हामरा येइ ब्यापारबटहइ भउत कमाइ भया छ। 26 तर त्यो पावल कि भुन्ना छ, आब तमु आफुइले धेक्या रे सुन्या छउ, मान्सका हातले बनाया देबि-देबताइ हइनन् भुनिबर एफिसस रे एसियामि बस्या भउत मान्सलाइ आफना कुरा सिकाइबर भर्माउन्ना छ। 27 तबइलाइ हामरो ब्यापारको नास हुन्या मात्तरइ हइन रे माहान देबि आर्तेमिसको मन्धिरको लइ केइ मान हुन्या अथिन्। सारा एसिया रे सन्सारले मान्या माहान देबि आर्तेमिसको पुजा लइ बन्द हुन्याछ।” 28 यो कुरा सुनिबर ताँ जम्मा भया मान्सन सप्पइलाइ रिस उठ्यो रे कलाहालिबर भुन्न लाग्या, “एफिससमि भएइ देबि आर्तेमिस माहान हुन!” 29 सारा सहरमि होहल्ला मचियो, रे तिनुन सप्पइ हुल बाधिबर पावलका सङि माकेडोनियामि बस्या गायस रे अरिस्तार्खसलाइ समाइबर रङ्गसालामि लइया। 30 पावलले मान्सका भिडमि जान खोज्यो, तर प्रभुमि बिस्वास अद्या बिस्वासिनले उनलाइ जान दिएनन्। 31 एसिया छेत्रका कोइ कोइ सरकारि हाकिमन पावलका सङि थ्या तिनुनले पावलको भलाइ चाइबर उनलाइ रङ्गसाला भितर जनजा भनि बिन्ति अरिबर पठायो। 32 तब मान्सनका हुलमि ठुलो होहल्ला मच्चियाथ्यो। कोइ एक कुरा भुणिबर त कोइ अर्खो कुरा भुणिबर कलाहाल्लाथ्या, रे भउत मान्सनले त तिनुन क्याकि जम्मा भया हुन त्यो लइ जाण्या थेनन्। 33 तन्जेइ तइ भिडका कसइ कसइ यहुदिनले अलेक्जेन्डर भन्न्या मान्सलाइ अगाडि सार्यो। अलेक्जेन्डरले आफना हातका इसारा अरिबर सप्पइ मान्सनलाइ सान्त अराउनाइ केइ बोल्न खोज्यो। 34 रे तिनुनले तन त यहुदि हुन भनि था पाइबर सप्पइ जनाले दुइ घन्टा सम्म “एफिससमि हुन्या आर्तेमिस देबि माहान हुन” भन्नाइ कलाहाल्यो। 35 नगरका हाकिमले मान्सनलाइ सान्त बनाइबर भुन्यो, “एफिससका दाइभाइ हो, यो माहान आर्तेमिस देबिको मन्धिर रे अग्गासबटहइ झण्या उनरो मुर्तिको रछेक एफिसस सहर हो भुन्न्या कुरा सप्पइलाइ थाँ छ। 36 तसो भया हुनाले तमु सान्त होउ, इसेरि जोसमि आइबर बिचार नअरि केइ काम लइ अद्दु निको अथिन्। 37 क्यालाइकि तमुले लेया यिन मान्सनले हामरो मन्धिर लुट्या लइ आथिनन् रे तिनुनले हामरा देबिको अपमान लइ अर्या आथिनन्। 38 तबइलाइ डेमेतिरियस रे तिनुनसित हुन्या कालिगरन कसइका बिरुद्दमि केइ कुरडि छ भन्या तिनुनले अदालतमि गइबर उजुरि अद्द सक्दाहान्। 39 रे तमु यइबाहेक अउर बिसय उठाउन चाहान्छउ भन्या तइको फइसला नियमित सभामि हुन्या छ। 40 क्यालाइकि आजको यइ हुलदङाको दोस हाममि लाग्द्या खतरा छ। यो कारण बिनाको हुलदङा भया हुनाले हामले केहि भन्न सक्दाइन्।” 41 इति भनिसक्या पाछा उनुले भिडलाइ बिदा दियो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.