प्रेरित 18 - डोटेलिपावल कोरिन्थ सहरमि 1 तइपाछा पावल एथेन्सबटहइ बिदा भइबर कोरिन्थ सहरमि गया। 2 ताँ उनुले पोन्टस देसका अकिलास नाउँ भया एक जना यहुदि भिट्यो, तिन इटालिया देसबटहइ आफ्नि स्वाइनि प्रिस्किलासित आया थ्या, क्यालाइकि माहाराजा क्लोडियसले सप्पइ यहुदिनलाइ रोमबटहइ निकलबर जान्या आग्या दिया थ्यो। पावल तिनुनलाइ भेट अद्द गया। 3 तिनुनले पाल बनाउन्या काम अरिबर गुजारा चलाउथ्या, रे एकइ जसो काम भया हुनाले पावल लइ तिनुनसित बस्या, क्यालाइकि तिनुनले लइ पाल बनाउन्या काम अरिबर गुजारा चलाउथ्या। 4 हरेक बिस्राम दिनमि पावल यहुदिनका सभाघरमि गइबर यहुदि रे ग्रिकनसित छलफल अरन्थ्या, रे दुयइ पछ्यलाइ बुजाउन्या कोसिस अरन्थ्या। 5 सिलास रे तिमोथि माकेडोनिया इलाकाबटहइ आयापाछा पावल बचन प्रचारका काममि लाग्या, उनुले यहुदिनलाइ इसुइ मुक्ति दिन्या राजा ख्रिस्ट हुन् भणि साछि दिन्थ्या। 6 तर तिनुनले पावलको बिरोध अद्दाइ तनरो निन्दा अर्यो, तबइ पावलले आफना लत्ता टट्केइबर उनुनलाइ भुन्यो, “तमु नस्ट भया लइ आफनाइ दोसका कारणले नस्ट हुन्याछउ! मुलाइ दोस लाग्द्या आथिन्। आबबटहइ मु असल रइबार सुणाउनाइलाइ अउरजातिनका वाँ जान्याछु।” 7 तबइ पावलले यहुदिनको सभाघर छाडिबर, तइ सभाघरका नजिकइ परमेस्वरको भक्ति अद्या तितस युस्तस नाउँ भया एक जना मान्सका घरमि गया। 8 यहुदि सभाघरका सासक क्रिस्पस रे उनरा पुराइ मउकपिलाले प्रभुमि बिस्वास अर्यो, रे कोरिन्थिका अउर भउत मान्सले लइ पावलको सिछ्या सुनिबर प्रभुमि बिस्वास अर्यो, रे बप्तिस्मा लियो। 9 एक रात प्रभुले पावललाइ सुइनामि यसो भुन्यो, “कसइ धेकिबर जनडराइ, चुप लागिबर जनबसइ असल रइबार प्रचार अर। 10 मु तुसित छु। रे कसइले लइ तुलाइ केइ अद्द सक्द्या आथिन्, क्यालाइकि यइ सहरमि मेरा भउत मान्स छन्।” 11 रे परमेस्वरको बचन सिकाउनाइ पावल एक बर्स छइ मइनासम्म कोरिन्थ सहरमि बस्या। 12 अखइया इलाकामि गलियोन भनिन्या मान्स ठुला हाकिम भया बेला यहुदिन एक जुट होइबर पावलमि जाइलाग्या रे पकणिबर उनलाइ ठुला हाकिमका वाँ लेइबर भुन्यो, 13 “यइ मान्सले हाम्रा ब्यबस्थासित नमिल्या तरिकाले परमेस्वरलाइ आराधना अद्द सिकाइबर मान्सनलाइ बिगाड्ड खोज्जा छ।” 14 पावल बोल्लइ लाग्याथ्या तबइ गलियोनले यहुदिनलाइ भुन्यो, “यहुदिन हो यो साँच्चि लइ केइ अन्याको या दुस्ट अपराधको कुरा भया भयले त मुइले तमरो उजुरि सुनिबर न्याय अद्दु निको हुन्याथ्यो। 15 तर यो कुरा त सब्दन, नाउँ रे तमरा आफनाइ ब्यबस्थाका बिसयमि भयाहुनाले तमु आफुइ बिचार अर। मु इसा कुराको इन्साफ अद्द इन्कार अद्दउ।” 16 यसो भुणि सक्यापाछा गलियोनले तिनुन सप्पइलाइ अदालतबटहइ धपाइदियो। 17 तबइ तिनुन सप्पइले सभाघरका सासक सोस्थेनेसलाइ समाइबर अदालतका अगाडि हाण्यो, रे गलियोनले तइ कुराको वास्ताइ अरेइन। पावल एन्टिओखिया सहरमि फर्किया 18 पावल भउत दिनसम्म प्रभुमि बिस्वास अद्द्या कोरिन्थ सहरका दाइभाइनसित बस्या, तइपाछा उन ताँबटहइ बिदा भइबर प्रिस्किला रे अकिलाससित सिरियातिर जानाइलाइ हिट्या। केइ समय अगाडि केइ भाकल अर्या हुनाले पावलले किंक्रिया सहरमि जानाहइ अगाडि आफना रउ काट्यो। 19 तनुन एफिससमि आयापाछा पावलले प्रिस्किला रे अकिलासलाइ ताँइ छाड्यो। आफु एफिससका सभाघरमि गइबर यहुदिनसित छलफल अद्द लाग्या। 20 यहुदिनले पावललाइ केइ दिनसम्म हामसंङ बस भनिबर बिन्ति अर्यो, तर उनुले बस्स माणेन। 21 तिनुनबटहइ बिदा हुन्ज्या पावलले यसो भुन्यो, “परमेस्वरको इच्छा भयाले मु अज फर्किबर तमरा वाँ आउन्या छु।” तइपाछा उन एफिससबटहइ पानि जहाज चडिबर गया। 22 पावल कइसरिया सहरमि आयापाछा यरुसलेममि गया रे मण्डलिका मान्सनसित भेटघाट अर्यो, तइपाछा उन एन्टिओखिया सहरमि ओरल्या। 23 ताँ केइ दिनसम्म बस्या, तइपाछा उन गलातिया रे फ्रिगियाका इलाका होइबर सप्पइ बिस्वासिनलाइ हउसला दिनाइ भउत ठउँर होइबर गया। अपोल्लोस एफिसस सहरमि 24 तसइ बिचमि अलेक्जेन्डिरिया सहरमि जन्मिया अपोल्लोस नाउँ भया एक जना यहुदि एफिससमि आया। उन भउत निकेरि बोल्ल जान्या मान्स थ्या, रे उनलाइ धर्म- सास्त्तरको लइ भउत ग्यान थ्यो। 25 उनुले मुक्ति दिन्या प्रभु इसुका बारेमि सिछ्या पाया थ्यो, रे आत्मामि जोसिला भइबर इसुका बिसयमि निकेरि सिकाउथ्या, तबइलइ उनलाइ युहन्नाले दिया बप्तिस्माका बिसयमि मात्र थाँ थ्यो। 26 उनुले यहुदिनका सभाघरमि डर नमाणिबर सिछ्या दिन लाग्या, रे उनरो सिछ्या सुनिबर प्रिस्किला रे अकिलासले उनलाइ आफना घरमि लइया। रे परमेस्वरले धेकाया जिबन दिन्या बाटाका बारेमि निकेरि बुजाइदियो। 27 तइपाछा अपोल्लोसले अखइया इलाकामि जान्या बिचार अर्यो, एफिससमि भया प्रभुका सिस्यानले उनलाइ जान्या हउसला दियो रे अपोल्लोसको स्वागत अद्दु भनि ताँ बस्या बिस्वासिनलाइ एक चिट्ठि लइ लेख्दियो। अखइया पुग्यापाछा अपोल्लोसले ताँ प्रभुका अनुग्रहले अरन्ज्या बिस्वास अद्द्यानलाइ भउत साहेता अर्यो। 28 क्यालाइकि ताँ भया यहुदिनसित सप्पइ मान्सका अगाडि छलफल अरन्ज्या उनुले धर्म- सास्त्तरको कुरा लिबर प्रभु इसुइ मुक्ति दिन्या राजा ख्रिस्ट हुन भन्या कुराको प्रमाण दियो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.