प्रेरित 17 - डोटेलिपावल रे सिलास थेसलोनिके सहरमि 1 पावल रे सिलास अम्फिपोलिस रे अपोल्लोनिया सहरबटहइ भइबर थेसलोनिके सहरमि आया। ताँ यहुदिनको एक सभाघर थ्यो। 2 पावल आफना बानिअन्सार तइ सभाघरमि लइ गया रे उनुले ताँ तिन बिस्राम दिनसम्म सभाघरमि धर्म- सास्त्तरबटहइ बहस अर्यो। 3 उनुले धर्म- सास्त्तरबटहइ धेकाइबर तिनुनलाइ इसेरि बुजायो, “मुक्ति दिन्या राजा ख्रिस्टइले दुःख भोग्दु रे मर्याबटहइ जिउना हुन् पणन्थ्यो रे मुइले प्रचार अर्या इसु तेइ मुक्ति दिन्या राजा ख्रिस्ट हुन्।” भन्न्या कुराको अर्थ खोल्दिबर तनले प्रमाणित अर्यो। 4 तिनुनमध्ये कति जना बिस्वास अरिबर पावल रे सिलासतिर लाग्या। ठुला संख्यामि इस्वरभक्त ग्रिक रे कतिबइ निकाइ नाउँ चलेइ स्वाइनि लइ लाग्या। 5 तर अउर यहुदिनले तिनुनको डाहाँ अरिबर बजारका गुन्डानलाइ जम्मा अरि हुल बाधिबर सहरमि हुलदङा मच्चाउन लाया। तिनुनले यासोनका घरमि गइबर पावल रे सिलासलाइ सप्पइका अगाडि लेइबर कल्लेउन खोज्यो। 6 तर तिनुनले पावल रे सिलासलाइ फेला नपाड्याहुनाले उनुनले यासोन रे कसइ कसइ भाइनलाइ सहरका सासकनका वा लछाडपछाड अद्दाइ लेइबर यसो भुन्यो, “संसारभरि उलटपुलट पाड्या यिन मान्स याँ लइ अइल आया छन्। 7 तिनुन यासोनका पाउना भया छन्, रे तिनुन सप्पइले इसु भन्न्या एक जनो अर्खाइ राजा छन् भनिबर रोमि महाराजाका हुकुम बिरुद्द काम अद्दाछन्।” 8 यो कुरा सुनिबर सप्पइ मान्स रे सहरका सासकन अलमल पड्या। 9 तिनुनले यासोन रे तिनसङ भया अउर मान्सबटहइ धरउटि लिबर छोडदियो। पावल रे सिलास बेरिया सहरमि 10 रात पणन्जेइ प्रभुमि बिस्वास अद्या दाइभाइनले पावल रे सिलासलाइ बेरिया सहरमि पठाइदियो। ताँ पुगिबर तिनुन यहुदिनका सभाघरभितर पस्या। 11 ताँ का यहुदिन थेसलोनिकेका मान्सनभन्ना भउत निका थ्या, क्यालाइकि तिनुनले परमेस्वरको बचन ग्रहण अर्यो, रे पावलले भन्या कुरडि ठिक हो कि हइन भनिबर दिनदिनि धर्म- सास्त्तर पडिबर छानबिन अरन्थ्या। 12 तबइलाइ तिनुनमध्ये भउतले प्रभुमि बिस्वास अर्यो। तसोइ अरिबर नाउँ चल्या ग्रिक स्वाइनि रे बइकान मान्सनले लइ बिस्वास अर्यो। 13 रे जबइ परमेस्वरको बचन पावलबटहइ बेरियामि लइ प्रचार हुन्ना छ भन्या थेसलोनिकेका यहुदिनले था पायो, तबइ तिनुन ताँ लइ हुलदङा मच्चाउनाइलाइ आया। 14 यो धेकन्जेइ प्रभुमि बिस्वास अद्या दाइभाइनले पावललाइ तुरुन्तइ समुन्दरका किनारतिर पठाइदियो, रे सिलास रे तिमोथि ताँइ बेरियाइमि बस्या। 15 पावललाइ पुर्याउन जान्या दाइभाइनले उनलाइ एथेन्स सहरसम्म पुर्याइदियो। ताँ पुगिबर पावलले आफुलाइ पुर्याउन्या दाइभाइनका हात रइबार पठायो। कि सिलास रे तिमोथिलाइ जति सक्दो छिटाइ आस भुणिदिया। पावलले एथेन्स सहरमि प्रचार अर्यो 16 पावल एथेन्स सहरमि सिलास रे तिमोथिलाइ पख्याबेला, त्यो सहर मुर्ति मुर्तिले भरिया धेकिबर उनलाइ भउत दुःख लाग्यो। 17 तबइलाइ तिनले यहुदिन रे इस्वरभक्त मान्सनसित सभाघरमि, रे बजारमि भेटिया जतिसङ आउन्या जान्या अद्या मान्सनसित दिनदिनि इसुका बारेमि बहस अरन्थ्या। 18 इपिक्युरि रे स्तोइकि समुहका सिछ्यकनमध्ये लइ कतिले पावलसित बादबिबाद अर्यो। तिनुन कतिले भुन्यो, “यो बकबक्या कि भुन्नाछ?” अउरले भुन्यो, “यो त अउर कसइ बिदेसि देबि-देबताको प्रचार अद्या जसो धेकिन्छ।” क्यालाइकि पावलले इसु मर्याबटहइ जिउनाभया कुराका बिसयमि प्रचार अर्या हुनाले तिनुनले यसो भुन्या हो। 19 तबइ तिनुनले पावललाइ अरियोपागस भन्न्या सभामि लइयइबर भुन्यो, “तमले प्रचार अर्या यो नयाँ सिछ्याका बिसयमि हामुलाइ जान्या इच्छा छ। 20 क्यालाइकि तमले हामुलाइ नयाँ नयाँ कुरा सुनाउन्नाछउ, तबइलाइ तन कुराको मतलब कि हो त्यो हाम जान्न चाहानाउ।” 21 क्यालाइकि एथेन्सबासिका सप्पइ मान्सन रे ताँ बस्या बिदेसिनले अउर कुरा भन्ना नयाँ नयाँ कुरा भुन्न रे सुन्न मात्तरइ आफनो समय बिताउथ्या। 22 पावलले अरियोपागस भन्न्या सभाका अगाडि कल्लिबर यसो भुन्यो, “हे एथेन्स सहरका मान्सन हो, तमु भउत धर्मपिरिमि रइछउ। 23 क्यालाइकि घुमफिर अरन्ज्या तमुले पुज्ज्या ठाउँर मुइले धेक्या, मुइले एक यसो बेदि लइ धेक्या जइमि ‘नजाणिन्या देबताकि निम्ति’ भनिबर खोपिया रइछ। तबइलाइ जइलाइ तमु नजाणि पुजन्छउ उनरा बिसयमि मु प्रचार अद्दउ। 24 परमेस्वरले संसार रे तइमि भया सप्पइ थोक बनायो। उन स्वर्ग रे धर्तिका प्रभु भया हुनाले मान्सका हातले बनाया मन्धिरमि बास अद्दाइनन्। 25 उनलाइ मान्सनले चढाया केइ थोकको लइ खाँचो पड्डइन, क्यालाइकि उनुले सप्पइ मान्सनलाइ जिबन, परान रे चाइन्या सप्पइ थोक दिनाहान्। 26 संसारभरि मान्सन बसुन् भनिबर उनुले एकइ मान्सबटहइ सप्पइ जातिनलाइ सिरिस्टि अर्यो रे तिनुनलाइ संसारभरि बस्स दियो। तिनुनले जिउनुपड्या समय रे बस्सुपड्डया ठउँर उनुले अगाडिबटहइ तोकिदिया थ्यो। 27 मान्सनले परमेस्वरलाइ खोजुन रे भेट्टया आसामि उनुले यसो अर्यो। तबइलइ परमेस्वर हाम सप्पइबटहइ दुर आथिनन्। 28 क्यालाइकि हाम उनइमि जिउनाउ, रे उननइमि हलचल अद्दाउ, उनइमि हामरो अस्तित्व छ। यइ बिसमि तमरा एक जना कबिले लइ इसेरि भुन्याछन्। “साँच्चि हाम उनराइ सन्तान हउ।” 29 “इसेरि हाम परमेस्वरका सन्तान भया हुनाले, परमेस्वर सुन, चाँदि रे ढुङाले बनाया मुर्ति जसो हो भणि हामले सोच्च हुनइन्। 30 तबइलाइ अन्जानमि नजाणि अर्या कामलाइ परमेस्वरले वास्ता अद्दाइन्, रे आब परमेस्वरले सप्पइ मान्सनलाइ आफना आफना पापलाइ मानिबर छाणुन भन्न्या आग्या दिया छन्। 31 क्यालाइकि संसारका सप्पइ मान्सको न्याय अद्या दिन उनुले तोकिदिया छन्। तइ दिन उन आफुइले छान्या एक जनाले ठिकसित संसारको इन्साफ अद्द्याछन्। इसुलाइ मर्याबटहइ जिउना बनाइबर परमेस्वरले सप्पइ मान्सलाइ यइ कुराको प्रमाण दिया छन्।” 32 जबइ तिनुनले मर्याबटहइ जिउना हुन्या बिसयमि सुण्यो, तबइ कसइ कसइले पावलको गिल्ला अर्यो, रे अउरनले “हाम अज यइ बिसयमि तमरा कुरा सुन्या छउ भुन्यो।” 33 तइपाछा पावल तिनुनबटहइ बिदा भया रे गया। 34 रे कोइ कोइ मान्सन उनसितइ लाग्या रे प्रभुमि बिस्वास अर्यो। तिनुनमध्ये अरियोपागस सभाका डियनुसियस भन्न्या सदस्य रे दामारिस नाउँ भयइ एक जनि स्वाइनि थिन्। तन बाहेक अउरले लइ बिस्वास अर्यो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.