प्रेरित 16 - डोटेलिपावल रे सिलाससित तिमोथिको भेट 1 पावल डर्बि रे लुस्त्रा सहरमि आइपुग्या। लुस्त्रा सहरमि तिमोथि नाउँ भया एक जना सिस्य थ्या। तनरि इजा युनिस नाउँ भएइ एक बिस्वासि यहुदि स्वाइनि थिन्। तर तनरा बा भन्या ग्रिक थ्या। 2 लुस्त्रा रे आइकोनियनका दाइभाइनमि तिनरो नाउँ चल्या थ्यो। 3 तिमोथिलाइ पावलले सङ लइजान्या इछ्या अर्यो। तइ ठउँर रन्या यहुदिनका कारणले अरन्या पावलले तिनलाइ लइयबर खतना अर्यो। क्यालाइकि तिनरा बा ग्रिक थ्या भन्न्या उनुन सप्पइलाइ थाहा थ्यो। 4 तइपाछा उनुन सहरको बाटो होइबर जान्ज्या तिनुनले हरेक ठाउँमि भया प्रभुका सिस्यानलाइ येरुसलेमका प्रेरित रे मण्डलिका अगुवानले अर्या निर्णय सुनायो रे यिन कुरा पालना अद्दु भनि अर्ति दियो। 5 इसेरि मण्डलिका बिस्वासिनको बिस्वास बलियो हुनोइ गयो। दिनदिनि प्रभुमि बिस्वास अद्या मान्सन बड्दाइ गया। पावलले माकेडोनिया जान्या दर्सन पायो 6 तइपाछा पबित्तर आत्माबटहइ तिनुनलाइ एसियामि बचन प्रचार अद्द जान रोक्या हुनाले तिनुन फ्रिगिया रे गलातियाका इलाकान भइबर गया। 7 माइसिया छेत्रका सिमानामि आयापाछा तिनुनले बिथिनिया छेत्रतिर जान्या बिचार अर्यो, तर इसुका आत्माले तिनुनलाइ ताँ लइ जान दिएन। 8 तबइ माइसिया होइबर तिनुन तोरोआस सहरमि गया। 9 तसइ रात पावलले सुइनामि एक दर्सन पायो। माकेडोनियाको एक जनो मान्स कलिबर तनलाइ बिन्ति अद्दाथ्यो, “माकेडोनियामि आस, रे हामुलाइ साहेता अर।” 10 जबइ पावलले यो दर्सन पायो, तन्जेइ हाम माकेडोनिया जानाइलाइ तयार भया, हामले यो निर्णय अर्या कि तिनुनलाइ असल रइबार प्रचार अद्द परमेस्वरले हामुलाइ बोलाया रइछन् भन्या कुरा हामले जाण्या। फिलिप्पिमि लिडियाले बिस्वास अर्यो 11 तबइ हाम तोरोआसबटहइ पानिजहाजमि चडिबर सामोथ्रोके टापुतिर लाग्या, रे भोलिबार नियापोलिस सहरमि पुग्या। 12 रे ताँबटहइ हामले यात्रा अरिबर फिलिप्पिमि पुग्या, जो माकेडोनियाको प्रमुख सहर रे रोमि सरकारका अधिनमि थ्यो। हाम तइ सहरमि केइ दिन बस्या। 13 आब बिस्रामदिनमि सहरको देलोबटहइ बाइर नदि किनारमि गया। क्यालाइकि ताँ प्रार्थना अद्द्या ठउँर छ भनि हामले अनुमान लाया थ्या। रे ताँ हाम बस्या रे जम्मा भएइ स्वाइनिसित कुराकानि अद्द लाग्या। 14 रे थिआटिरा सहरमि बस्सेइ बइजनि लत्ताको ब्यापार अद्देइ लिडिया नाउँकि एक इस्वरभक्त स्वाइनिले हामरो कुरा सुण्यो। पावलले बोल्या कुरा ध्यानसित सुणुन् भनिबर प्रभुले तिनरो ह्रिदय खोलिदियो। 15 बिस्वास अरिबर लिडियाले रे तिनरा घरका सप्पइले बप्तिस्मा लियो। तइपाछा तिनले हामुलाइ आफना घरमि बस्साइलाइ इसेरि बिन्ति अर्यो, “तमुले मुलाइ साँच्चि प्रभुमि बिस्वास अरेइ बइनि मानन्छउ भन्या मेरा घरमि आइबर बस।” इसेरि तिनले हामुलाइ आफना घरमि जानाइलाइ कर लायो। पावल रे सिलास झेलखानामि 16 एक दिन जबइ हाम प्रार्थना अद्द्या ठउँरमि जान्नाथ्या, तबइ जोखना हेद्देइ आत्मा भएइ एक जनि कमारि केटिसित हामरो भेट भयो। जइले जोखना हेरिबर तइका मालिककि निउति तइले भउत कमाइ अरिदिन्थि। 17 त्यो कमारि केटि पावल रे हामरा पाछा पाछा लागि, रे यसो भुन्निइ कला हाल्ललागि, “यिन मान्सन माहान परमेस्वरका सेबक हुन्! यिनुनले तमुलाइ मुक्ति पाउन्या बाटाका बिसयमि घोसणा अद्दाछन््।” 18 भउत दिनसम्म तइ केटिले यसो भुणिबर कलाहाल्लिरइ। तबइ पावलले इसेरि कलाहाल्या दिक्क माणिबर फरक्क फर्किबर तइ फुचेरा आत्मालाइ यसो भुन्यो, “मु तुलाइ इसु ख्रिस्टका नाउँमि तइबटहइ निकल्या आग्या दिनउ। तु तइ केटिबटहइ निकल्बर जा।” पावलले यसो भनन्जेइ त्यो फुचेरो आत्मा तइ केटिबटहइ निकल्बर गयो। 19 तर तइका मालिकनले तिनुनका कमाइको आसा बिफल भया धेकिबर पावल रे सिलासलाइ समाइबर बजारका चोकमि सासकनका वा तान्नाइ लइया। 20 रे तिनुनलाइ सहरका रोमि हाकिमका वा लेइबर भुन्यो, “यिन मान्सन यहुदि हुन्” यिनुनले हामरा सहरमि गोलमाल मच्चाइबर दुःख दिन्नाछन्। 21 यिनुनले इसा इसा नियम कानुन सिकाउनाहान् जो हाम रोमिनलाइ ग्रहण अद्द वा पालन अद्द न्यायसङत आथिन्। 22 तबइ मान्सका हुलले पावल रे सिलासमि जाइलाग्या। सहरका हाकिमले पावल रे सिलासका लत्ता खोइबर लठ्ठि लाउन्या आग्या दियो। 23 बेस गन्ज्यासम्म लठ्ठिले हाणिसक्यापाछा पावल रे सिलासलाइ झेलखानामि पुगायो, रे झेलखानाका हाकिमलाइ यिन दुयइ जनालाइ उम्कन जनदिया भनि कडा चेतावनि दियो। 24 यो आग्या पाइबर झेलखानाका हाकिमले पावल रे सिलासलाइ झेलखानाका सप्पइ भन्ना भितर कोठामि राख्यो रे तिनुनका खुट्टामि ठिगुरो लाइबर राखिदियो। 25 आधा रातमि पावल रे सिलास प्रार्थना अद्दाइ परमेस्वरको भजन गाउन्नाथ्या। रे अउर कइदिन लइ सुनिबर बस्रइथ्या। 26 तन्जेइ भंइकर भुइचालो आयो। झेलखानाका जग लइ हल्लिया, रे उन्जेइ सप्पइ देलि खुल्या, रे कइदिनलाइ बाध्या साङ्ला लइ खुल्या। 27 झेलखानाका हाकिम निनबटहइ बिउझ्या, रे ताँ उनुले सप्पइ देलि खुल्या धेकिबर सप्पइ कइदिन् भाग्या भन्या सम्जिबर उनुले आत्माहत्या अद्या बिचारले आफनो तरबार निकाल्यो रे मद्द खोज्यो। 28 रे पावलले कलाहाल्लइ यसो भुन्यो, “ए हजुर तम आफुइलाइ केइ नोक्सानि जनअर, क्यालाइकि हाम सप्पइ याँइ छउ।” 29 यो सुनिबर हाकिमले बत्ति मागि दगुडिबर भितर आया, रे डरले काम्दाइ पावल रे सिलासका खुट्टाइनि घोप्टो पड्या। 30 तइपाछा हाकिमले पावल रे सिलासलाइ बाइर लेइबर भुन्यो, “ओ हजुर, मुइले मुक्ति पाउनाइलाइ कि अद्दुपड्या हो?” 31 रे तिनुनले भुन्यो, “प्रभु इसु ख्रिस्टमि बिस्वास अर तम रे तमरा घरका मान्सनले मुक्ति पाउन्याछउ।” 32 पावल रे सिलासले उनलाइ रे उनका घरका सप्पइलाइ प्रभुको बचन सुनायो। 33 तइपाछा हाकिमले पावल रे सिलासलाइ लयइबर तसइ रात घा धोइदियो। उन रे उनरा घराका सप्पइले बप्तिस्मा लियो। 34 तइपाछा तिनुनलाइ हाकिमले आफना घर लइजाइबर खाना ख्वायो, रे परमेस्वरमि बिस्वास अर्या हुनाले उनरा घरका सप्पइ मान्स खुसि भया। 35 भोलिबार ब्याहानइ सहरका हाकिमले सिपाइनलाइ यसो भनिबर आदेस दियो, “पावल रे सिलासलाइ छाड्दिय।” 36 तबइ झेलखानाका हाकिमले पावललाइ यो कुरा सुणायो, “तम रे सिलासलाइ छाडिदिय भनिबर सहरका हाकिमनले आदेस दिया छ, आब तमु खुसिसाथ जा।” 37 तर पावलले रइबार ल्याउन्या सिपाइनलाइ यसो भुन्यो, “हाम रोमि नागरिक हुनाहुनाइ लइ तिनुनले हामरो केहि दोस नपायइ हामुलाइ मान्सनका अगाडि हाण्यो झेलखानामि लइ हाल्यो, रे आब हामुलाइ सुटुक्क निकाल्ल खोज्जाछन्? यो हुन सक्दइन, उनुन आफुइ आइबर हामुलाइ निकाल्बर लइजाउन।” 38 पावलले भन्या कुरडि सिपाइनले गइबर हाकिमलाइ सुणायो, पावल रे सिलास रोमि नागरिक हुन भन्या था पाइबर तिनुन डराया। 39 उनुन आइबर पावल रे सिलाससित माफ माग्यो, रे तिनुनलाइ झेलखानाबटहइ बाइर लइजाइबर हामरो सहर छाडिबर जा भन्या बिन्ति अर्यो। 40 झेलखानाबटहइ बाइर निकल्यापाछा पावल रे सिलास लिडियाका घरमि गया। ताँ प्रभुमि बिस्वास अद्या दाइभाइनसित भेटघाट अर्यापाछा उनुनलाइ हउसाला दिबर ताँबटहइ गया। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.