प्रेरित 15 - डोटेलियरुसलेमको सभा 1 आब केइ समयपाछा यहुदियाबटहइ एन्टिओखियामि केइ मान्सन आइबर ताँका बिस्वासि दाइभाइनलाइ यसो सिछ्या दिन लाग्या, “तमुले मोसाका रितिअन्सार खतना अर्यानु भन्या त तमरो उद्दार हुन् सक्दइन।” 2 तबइ पावल रे बारनाबासको तिनुनसित भउत मतभेत रे बाद-बिवाद भयापाछा, ताँका दाइभाइनले पावल, बारनाबास रे अउर कति जनालाइ यइ कुराको फइसलाकि निउति प्रेरितन रे अगुवानका वाँ यरुसलेम जानाइलाइ निउक्ति अर्यो। 3 तबइलाइ मण्डलिका बिस्वासिनले तिनुनलाइ ताँबटहइ बिदा दियो। तिनुन फोनिके रे सामरियाबटहइ भइबर जान्ज्या अउरजातिनले लइ प्रभुमि बिस्वास अर्या छन् भन्न्या कुरा तिनुनलाइ सुणायो, यो कुरा सुनिबर तन दाइभाइन भउत खुसि भया। 4 जबइ तिनुन यरुसलेम आया, तबइ तिनुनलाइ मण्डलिका बिस्वासिन, प्रेरितन रे अगुवानले स्वागत अर्यो। परमेस्वरले तिनुनसित अर्या सप्पइ कुराको प्रतिबेदन तिनुनले ताँ दियो। 5 तबइ फरिसि दलका कतिबइ बिस्वास अद्द्यानले कल्लिबर भुन्यो, “अउरजातिनको खतना हुनु रे तिनुनलाइ मोसाका ब्यबस्था पालन अद्द्या आग्या दिन आबस्यक छ।” 6 यइ बिसयमि सोच-बिचार अद्दाइलाइ प्रेरितन रे मण्डलिका अगुवान भेला भया। 7 भउत बहस चल्यापाछा पत्रुसले कलिबर तिनुनलाइ भुन्यो, “दाइभाइ हो, तमुलाइ थाइ छ, सुरुका दिननमि कसेरि परमेस्वरले मेरा मुखबटहइ अउरजातिनले असल रइबारकको बचन सुणुन रे बिस्वास अरुन भुणि तमरा बिचबटहइ मुलाइ चुन्यो। 8 मान्सनका ह्रिदयका कुरा जान्न्या परमेस्वरले तिनुनलाइ लइ हामुलाइ जसेरि पबित्तर आत्मा दियो। इसेरि परमेस्वरले अउरजातिका मान्सनलाइ ग्रहण अर्या कुरा धेकायो। 9 परमेस्वरले तिनुन रे हामरा बिचमि केइ लइ भेदभाब राखेन, तर तिनुनका ह्रिदयले बिस्वस अर्या हुनाले सुद्द पाडिदियो। 10 तबइलाइ अउरजातिनका बिस्वासिनलाइ यहुदि ब्यबस्था मान्नलाइबर क्याकि परमेस्वरको परिछ्या अरन्छउ? यो यहुदि ब्यबस्था न त हामरा पिता-पुर्खाले न हामले मान्नसक्या। 11 रे हाम बिस्वास अद्दाउ कि प्रभु इसुका अनुग्रहबटहइ हामले उद्दार पायाछउ, जसेरि तिनुनले लइ पाया छन्।” 12 यो सुनिबर सभाका सप्पइ मान्सन चुप लागि बस्या, रे अउरजातिनका बिचमि परमेस्वरले तिनुनबटहइ कसा चिन्हन रे अचम्मका काम अर्यो तइको बयान पावल रे बारनाबासले अर्यो, उनुनले यो बयान सुणिरया। 13 तिनुन बोलिसक्यापाछा याकुबले यसो भुन्यो, “भाइ हो, मेरा कुरा सुण!” 14 परमेस्वरले कसेरि दया अरि पइलिबेर अउरजातिका मान्सनका ह्रिदयमि काम अरिबर तिनुनलाइ आफना जन बनायो भन्न्या कुरा तमुले सिमोन पत्रुसका मुखबटहइ सुणिहाल्या। 15 इसइ कुरासित अगमबक्तानका बचन लइ मिल्लाहान, जसो लेखिया छ, 16 यिन कुरापाछा मु फर्कन्या छु, रे दाउदको ढल्या घरानालाइ अज उठाउन्या छु, तइको भत्क्या बास्सथान मु अज बनाइदिन्याछु, रे तइलाइ बलियो बनाउन्या छु। 17 तबइलाइ बाँकि मान्सनले परमप्रभुलाइ खोज्ज सकुन्, रे सप्पइ अउरजातिनले लइ, जो मेरा नाउँबटहइ बोलाइया छन्। 18 यो कुरा परमप्रभुले भुन्नाहान्, जइले भउत पइलिबटहइ यिन कुरा जनायाथ्यो। 19 तबइलाइ मेरो फइसला यो छ कि परमेस्वरतिर फर्किबर बिस्वास अद्द्यानलाइ हाम दुःख नदिउ। 20 तर अउरजातिका मान्सनलाइ यसो कुरा लेखिदिनाउ, तमुले मुर्तिनलाइ चडाया खान्या कुरा जनखाया, ब्यबिचार जनअर्या, रे घाँटि निमोरिबर मार्या पसुको मासु रे रगत लइ जनखाया। 21 क्यालाइकि मोसाले दिया ब्यबस्था त उसइबेलाबटहइ बिस्राम दिनमि सभाघरमि पडिबर सुणायाहुनाले उनरो सिछ्या सहरनमि मान्सनले लइ जाणिसक्या छन्। अउरजातिका बिस्वासिनलाइ लेख्या चिट्ठि 22 तबइ प्रेरितन, रे मण्डलिका धर्म-गुरुन रे सप्पइ मण्डलिले मिलिबर आफना बिचबटहइ कतिपइ मान्सनलाइ चुनिबर पावल रे बारनाबाससित एन्टिओखियामि पठाउन उच्चित माण्यो, रे दाइभाइनमध्ये प्रमुख मान्सन, यहुदा भुनिन्या बारनाबास रे सिलासलाइ चुन्यो। 23 रे तन चार जनाका हातमि उनुनले यो चिट्ठि पठायोः “एन्टिओखिया, सिरिया रे किलिकियामि रन्या अउरजातिनका बिस्वासि दाइभाइनलाइ, प्रेरितन रे मण्डलिका धर्म-गुरुका तर्फबटहइ अभिबादन छ! 24 हामरा बिचबटहइ गया कसइ कसइ मान्सनले उल्टो सिछ्या दिबर तमुलाइ दुःख दियो भुन्न्या कुरा हामले सुण्या छउ। तर हामले तन मान्सनलाइ पठाया हइन। 25 तबइलाइ हाम सप्पइले सर-सल्लाहा अर्या अन्सार हामराइ बिचबटहइ कसइ दाइभाइनलाइ छानिबर हामरा प्यारा भाइ पावल रे बारनाबाससित पठाउन हामुलाइ ठिक लाग्यो। 26 यिन मान्सन इसा हुन्, जइले हामरा प्रभु इसु ख्रिस्टका खातिर आफनो परान जोखिममि हाल्या छन्। 27 तबइलाइ हामले यहुदा रे सिलासलाइ पठाया छउ। तिनुनले लइ यिनइ कुरडि आफनाइ मुखइले बताउन्या छन्। 28 क्यालाइकि पबित्तर आत्मा रे हामुलाइ यिन तल्तिरका चाइन्या कुरा भन्ना अउर भउत कुरा तमुले अद्दु आवस्यक आथिन् भनि ठिक लाग्यो। 29 तमु मुर्तिलाइ बलि चडाया थोकबटहइ अलग रया, रगत, घाँटि निमोरिबर मार्या पसुको मासु जनखाया, रे ब्यबिचारबटहइ अलग रया, हामले भुन्न पड्या कुरा इति हुन्!” 30 तइपाछा तन चार दाइभाइन ताँबटहइ गयापाछा एन्टिओखिया सहरमि आया, रे ताँ उनुनले मण्डलिका सप्पइ मान्सनलाइ बोलाइबर त्यो चिट्ठि दियो। 31 त्यो हउसला दिन्या चिट्ठि पडिबर सुणाउन्ज्या तिनुन सप्पइ खुसि भया। 32 यहुदा रे सिलास आफुइलइ अगमबक्ता भया हुनाले बिस्वास अद्द्या दाइभाइनलाइ बचनबटहइ भउत अर्ति दिबर तिनुनलाइ बलिया बनायो। 33 यहुदा रे सिलासले केइ दिन ताँ बितायापाछा, ताँका दाइभाइनले यिनुनलाइ यरुसलेममि खुसि होइबर बिदा दि पठायो। 34 [रे सिलासलाइ ताँइ बस्न निको लाग्यो।] 35 पावल रे बारनाबास भन्या सिछ्या दिनाइ रे प्रभुको बचन प्रचार अद्दाइ अउर कद्बइ जनासित एन्टिओखियामि बस्या। पावल रे बारनाबास छुट्टिया 36 केइ दिनपाछा पावलले बारनाबासलाइ भुन्यो, “आस जइजइ सहरमि प्रभुको बचन हामले प्रचार अर्या थ्या तिन सहरनमि फर्किबर गइ दाइभाइलाइ भेट अद्दाउ रे तिनुन कि-कसा छन् हेद्दाउ।” 37 बारनाबासले मर्कुस भनिन्या युहन्नालाइ सङइ लइजान्या इच्छा अर्यो। 38 रे पावलले मर्कुसलाइ आफुसङइ लइजान ठिक माणेन, क्यालाइकि मर्कुस पामफिलियाबटहइ तिनुनसङ छुट्टिबर गया थ्या, रे तिनुनसित काममि लइ गया थेनन्। 39 तइ कुरडिले पावल रे बारनाबासका बिचमि इति ठुलो मतभेद भयो, कि तिनुन एक अर्काबटहइ छुट्टिबर, बारनाबासले मर्कुसलाइ लइयइबर पानि जहाज चडि साइप्रसतिर गया। 40 तर पावलले सिलासलाइ चुन्यो, रे दाइभाइनबटहइ परमेस्वरका अनुग्रहमि सउपिबर बिदा भया। 41 सिरिया रे किलिकिया छेत्र होइबर जान्ज्या तिनुनले ताँका मण्डलिनलाइ बिस्वासमि बलियो बनाउनाइ गया। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.