प्रेरित 14 - डोटेलिपावल रे बारनाबास आइकोनियन सहरमि 1 आब आइकोनियन सहरमि पावल रे बारनाबासले दिनदिनिकि जस्या यहुदिनका सभाघरमि पसिबर इति साहाससित परमेस्वरको बचन सुणायो कि भउतजना यहुदिन रे ग्रिकनले प्रभु इसु ख्रिस्टमि बिस्वास अर्यो। 2 तर बिस्वास नअद्द्या यहुदिनले भन्या अउरजातिनलाइ भड्काइबर प्रभुमि बिस्वास अद्द्या दाइभाइका बिरुद्दमि उनुनको मन तितो पाणिदियो। 3 तर प्रभुका भरोसामि साहाससित बोल्लाइ भउत समयसम्म पावल रे बारनाबास ताँ रया। प्रभुले तिनुनका हातबटहइ चिन्ह रे अचम्मका काम अराइबर आफनो अनुग्रहका बचनको साँचो हो भुणि धेकाइदियो। 4 तर सहरका मान्सनमि फाटो हुन गयो, रे कोइ यहुदिनतिर रे कोइ प्रेरितनतिर लाग्या। 5 अउरजाति रे यहुदिन दुएइले उनुनका सासकनसित मिलिबर पावल रे बारनाबासलाइ साताउन्या रे ढुङा हान्न्या मतो अर्यो। 6 पावल रे बारनाबासले यो कुरा था पायो, रे लुकोनियाका सहरन लुस्त्रा, डर्बि रे वलतिरपलतिरका जिल्ला हुनाइ भागिबर गया। 7 रे ताँ तिनुनले असल रइबार प्रचार अरिरया। पावल रे बारनाबास लुस्त्रा रे डर्बि सहरमि 8 आब लुस्त्रा सहरमि एक लङडो मान्स बसन्थ्यो। त्यो जनमइबटहइको लङडो थ्यो, रे कभइलइ हिट्या थेएन्। 9 पावलले बोल्या तइले सुन्नाथ्यो। पावलले तइलाइ एकोरिबर हेर्यो, तइ मान्समि मु लइ निको हुन्सक्दउ भन्न्या बिस्वास रइछ, भणि उनुले था पायो। 10 पावलले ठुला सोरमि कलाहालिबर भुन्यो, “तेरा खुट्टा टेकिबर सिधा कलि।” रे त्यो जुणुक्क उठ्यो रे हिट्ट लाग्यो। 11 जबइ पावलले अर्या यो काम भिडले धेक्यो, तबइ तिनुनले लुकोनियाका भासामि उच्चा सोरले यसो भुन्यो, “देबतान मान्सका रुपमि बद्लिबर हामरा वा आइरइछन्।” 12 तिनुनले बारनाबासलाइ जिउस देबता रे पावललाइ हर्मेस देबता भन्न लाग्या, क्यालाइकि पावल प्रमुख प्रचारक थ्या। 13 रे सहरका किनारमि जिउस देबताको मन्धिर थ्यो। तइ मन्धिरका पुजाहारिले फुलमाला रे बण लेइबर सहरका देलिमि आया। तिनुनले पावल रे बारनाबासका अगाडि ताँका मान्सनसित मिलिबर बणलाइ बलि चडाउनाइलाइ तयार अर्यो। 14 जबइ प्रेरित पावल रे बारनाबासले यो कुरा सुण्यो, तबइ तिनुन दुखित होइबर आफना लत्ता चिरिबर यसो भुन्नाइ कलाहालिबर मान्सनका बिचमि दगुड्डाइ गया रे भुन्यो, 15 “दाइभाइन हो, तमु क्याकि यसो काम अद्दाछउ? हाम लइ त तम जसाइ दुःख-सुख भोग्द्या मान्सन हउ। हाम तमुलाइ परमेस्वरले दिया रइबार सुणाउनाइलाइ आया हउ। हाम त इसा नचाइन्या काम छाडिबर जिबित परमेस्वरतिर फर्क भनिबर असल रइबार प्रचार अद्द आया हउ। उनइले स्वर्ग, धर्ति रे समुन्दर तिनमि भया सप्पइ थोक बनायो। 16 परमेस्वरले आगाडि बितिसक्या पुस्तानमि सप्पइ जातिनलाइ आफना आफनाइ रितिथितिअन्सार चल्ल दियो। 17 तबइलइ परमेस्वरले निका रे भलाइका कामअद्द छाडेन। क्यालाइकि उनुले अग्गासबटहइ पानि दिबर ठिक समयमि उब्जनि अराइदिनाहान्। प्रस्सत खान्याकुरा जुटाइदिबर मान्सनका ह्रिदयलाइ हर्सले भरिदिनाहान। इसेरि परमेस्वरका कामइले उनरो साछि दिन्छ।” 18 यिन कुरा भणिबर पावल रे बारनाबासले तन मान्सनलाइ मुस्किलले बलि-पुजा चडाउनबटहइ रोक्द सक्यो। 19 तर कोइ कोइ यहुदिन एन्टिओखिया रे आइकोनियनबटहइ ताँ आया। रे भिडलाइ मनाइबर पावललाइ ढुङाले हाण्यो, रे तन मर्या हुन्ना भनिबर सहरबटहइ बाइर घिसाड्डाइ लइया। 20 तर जबइ सिस्यान तनरा वरिपरि कलिया रे पावल उठ्या, तइपाछा सहरभितर पस्या। रे भोलिबार बारनाबाससित निकलिबर डर्बि सहरमि गया। सिरियाका एन्टिओखियामि पावल रे बारनाबास 21 तिनुनले डर्बि सहरमि असल रइबार प्रचार अरिबर भउत सिस्यान बनायो। तइपाछा तिनुन लुस्त्रा, आइकोनियन, पिसिदिया ठउँरका एन्टिओखियामि फर्क्या। 22 सिस्यानलाइ बलियो बनाउनाइ उनुनलाइ बिस्वासमि रइरन्या अर्ति दियो, रे भउत कस्ट सइबर हाम परमेस्वरका राज्यमि जानपणन्छ भनि उनुनलाइ उत्साह दियो। 23 तइपाछा पावल रे बारनाबासले हरेक मण्डलिमि अगुवान निउक्ति अर्यो, प्रार्थना रे उबाससहित आफुले बिस्वास अर्या प्रभुका जिम्मामि तन अगुवानलाइ सउपिदियो। 24 तइपाछा तिनुन पिसिदियाबटहइ भइबर पामफिलियामि आया। 25 पर्गा छेत्रमि लइ तिनुनले प्रभु इसु ख्रिस्टको प्रचार अर्यो, तइपाछा तिनुन अटालिया सहरतिर झण्या। 26 रे ताँबटहइ तिनुन समुन्दरको यात्रा अरिबर एन्टिओखियामि फर्क्या। जाँ प्रभुमि बिस्वास अद्द्या दाइभाइले पावल रे बारनाबासलाइ परमेस्वरका अनुग्रहमि सउपिबर प्रचारका काममि पठाया थ्यो। 27 पावल रे बारनाबास एन्टिओखियामि आया, तबइ मण्डलिका बिस्वासिनलाइ भेला अरायो, रे परमेस्वरले तिनुनसित अर्या सप्पइ कामको बयान अर्यो, रे कसेरि परमेस्वरले अउरजातिनका मान्सनकि निउति बिस्वास अद्द्या बाटो खोलिदियो त्यो कुरा सुणायो। 28 तइपाछा उनुन भउत दिनसम्म एन्टिओखिया मण्डलिका दाइभाइनसित बस्या। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.