प्रेरित 13 - डोटेलिबारनाबास रे साउल छानिबर पठाइया 1 एन्टिओखिया सहरका मण्डलिमि परमेस्वरका अगमबक्तान रे सिछ्या दिन्या मान्सन भउत थ्या। तिनुनमध्ये ताँ बारनाबास, काला भनिन्या सिमियोन, कुरेनिका लुकियस, हेरोद राजासित हुक्र्या मनेन रे साउल थ्या। 2 तिनुनले प्रभुको आराधना अद्दारया रे उबास बसिरयाबेला पबित्तर आत्माले भुन्यो, “मेरि निउति बारनाबास रे साउललाइ जइ कामकि निउति मुइले तिनुनलाइ बोलाया छु, तइ कामकि निउति अलग अर।” 3 तबइ उबास बसिबर तन दुइजनामि हात राखिबर प्रेरितनले प्रार्थना अर्यो, रे तिनुनलाइ तइ कामकि निउति पठाइदिय। बारनाबास रे साउल साइप्रस टापुमि 4 तबइ पबित्तर आत्माबटहइ पठाइया हुनाले तिनुन एन्टिओखियाबटहइ सिलुकियामि गया रे ताँबटहइ पानिजहाजमि चडिबर साइप्रसतिर गया। 5 सलामिस सहरमि आयापाछा तिनुनले यहुदिनका सभाघरनमि परमेस्वरको बचन प्रचार अर्यो। तिनुनलाइ साहेता अद्द युहन्ना तिनुनसित थ्या। 6 जबइ तिनुनले पुराइ साइप्रस टापुको यात्रा अद्दाइ पाफोससम्म आइपुग्या, तबइ ताँ तिनुनले एक जनो जादुगरलाइ भिट्यो जो बार-इसु नाउँ भया यहुदि झुटा अगमबक्ता थ्यो। 7 त्यो जादुगर साइप्रस टापुका बडा-हाकिम अग्गासियस पउलससित बसन्थ्यो। अग्गासियस पउलस बुद्दिमान मान्स थ्या। तनले साउल रे बारनाबासलाइ बोलाइबर परमेस्वरको बचन सुन्न्या इछ्या अर्यो। 8 तर एलुमास जादुगरले तिनुनको बिरोद अद्दोइ (क्यालाइकि ग्रिक भासामि तइको नाउँको अर्थ यइ हो) अग्गासियस पउलसलाइ इसुमि बिस्वास अद्दबटहइ बहकाउन खोज्यो। 9 तर साउल (जइलाइ पावल लइ भुणिन्छ) पबित्तर आत्माले भरिबर तइलाइ एकटक लाइबर हेर्यो। 10 रे तिनले भुन्यो, “तु सइतानको चेलो, सप्पइ असल कुराको सत्तुर, सारा छल रे दुस्टताले भरिया! क्या तु प्रभुको सोजो मार्ग बङ्याउन छाड्इनि? 11 आब हेर्, प्रभुको सजाइ तुमि पण्या छ, तु आब केइ समयसम्म घामको प्रकास नधेक्द्या होइबर आँखा नधेक्द्या हुन्याछइ।” तन्जेइ तइका आँखामि कालो बादलजसो लाग्यो, रे त्यो आँखा नधेक्द्या होइयो रे हातले इथउथ साहारा खोज्ज लाग्यो। 12 तबइ प्रान्तका तिन सासकले यो भया धेकिबर बिस्वास अर्यो, क्यालाइकि प्रभुका सिछ्यामि तन अचम्म पण्याथ्या। पावल रे बारनाबास पिसिदियाको एन्टिओखियामि 13 पावल रे तिनरा सङिन पाफोस सहरबटहइ पानिजहाजमि चणिबर पामफिलिया छेत्रका पर्गा सहरमि पुग्या, रे ताँबटहइ मर्कुस भनिन्या युहन्ना तिनुनबटहइ छुट्टिबर यरुसलेम फर्क्या। 14 तर तिनुन पर्गाबटहइ निकल्बर पिसिदियाका एन्टिओखियामि आया, रे बिस्राम दिनमि सभाघरभितर गइबर बस्या। 15 आब ब्यबस्थाका किताब रे अगमबक्तानले लेख्या किताबको पाठ पण्यापाछा सभाघरका सासकले तिनुनका वाँ यसो भुणि पठायो, “ए भाइ हो, तमुसित मान्सनकि निउति अर्तिका बचन केइ छ भुन्या भण।” 16 तबइ कलिबर पावलले हातका इसारा अरिबर भुन्यो, “हे इज्राएलका मान्सन रे परमेस्वरको डर मान्यान मेरा कुरा सुण, 17 इज्राएलि जातिका परमेस्वरले हामरा पिता-पुर्खानलाइ चुनिबर मिस्रदेसमि रन्ज्या तिनुनलाइ माहान बनायो। रे परमेस्वरले आफना सक्तिले तिनुनलाइ तइ देसबटहइ निकाल्बर लेया। 18 उजाड ठउँरमि लगभग चालिस बर्ससम्म परमेसवरले तिनुनको हेरबिचार अर्यो। 19 तबइ परमेस्वरले कनान देसका सात जातिनलाइ नास अरिबर उनुनको देस इज्राएलिनका अधिकारमि दियो। 20 तइ बेलासम्म चार सय पचास बर्स जति बितिसक्या थ्यो। “तइपाछा परमेस्वरले हामरा मान्सनलाइ अगमबक्ता समुएलका पालासम्म सासन अद्द्या न्यायकर्तान दियो। 21 तइपाछा तिनुनले राजा माग्यो, रे परमेस्वरले बेन्यामिन कुलको किसको चेलो साउललाइ चालिस बर्ससम्म तिनुनमि राज्य अद्द दियो। 22 परमेस्वरले साउललाइ हटायापाछा दाउदलाइ तिनुनका राजा हुनाइलाइ निउक्ति अर्यो। उनरा बिसयमि परमेस्वरले गवाइ दिबर भुन्यो, ‘मुइले यिसइको चेलो दाउद मेरा मनले सोच्या जसो मान्स पाया, जइले मेरो सारा इछ्या पुरा अद्द्या छ।’” 23 “परमेस्वर आफुले अर्या प्रतिग्या अन्सार दाउदका सन्तानबटहइ इज्राएलकि निउति मुक्तिदाता इसुलाइ पठायो। 24 उन आउनुभन्ना अगाडि बप्तिस्मा दिन्या युहन्नाले इज्राएलका सप्पइ मान्सलाइ पस्सातापको बप्तिस्माको प्रचार अर्या थ्यो। 25 युहन्नाले आफनो काम सकन्ज्या भुण्या थ्यो, ‘तमु मुलाइ मुक्ति दिन्या ख्रिस्ट हो भणि सोचन्छउ? त्यो त मु हइन। तर उन मुपाछा आउन्नाछन् मु भन्या उनरा जुताको ताना फुकाउन्या लाइको लइ आथिन्।’” 26 “ए, अब्राहामका बंसका सन्तान रे तमुमध्ये परमेस्वरको डर मान्न्या ए दाइभाइ हो, हामरावाइ यो मुक्तिको सन्देस पठाइया छ। 27 तर यरुसलेममि बस्या दाइभाइन रे उनुनका अगुवानले इसुलाइ मुक्तिदाता हुन भनिबर चिन्न सकेन। अगमबक्तानले धर्म- सास्त्तरमि लेख्या कुरा हरेक बिस्रामका दिनमि पडिया भया लइ बुजेनन्। इसुलाइ माद्द लाइबर धर्म- सास्त्तरमि उनरा बिसयमि लेखिया कुरा पुरा अर्यो। 28 ज्यानसजाइको केइ कारण नपाया लइ तिनुनले इसुलाइ माद्दुपणन्छ भुणि पिलातससित बिन्ति अर्यो। 29 इसेरि धर्म- सास्त्तरमि उनरा बारेमि लेखिया सप्पइ कुरडि पुरा अर्यापाछा तिनुनले उनलाइ क्रुसबटहइ ओरालिबर च्याहानमि राख्यो। 30 तर परमेस्वरले इसुलाइ मर्याबटहइ जिउना बनायो। 31 गालिल छेत्तरबटहइ इसुसितइ यरुसलेममि आयानले भउत दिनसम्म उनलाइ धेक्यो। रे तिनुनभन्या अइल इज्राएलका मान्सनकि निउति उनलाइ धेक्द्दया साछिन हुन्। 32 परमेस्वरले हामरा पिता-पुर्खालाइ अर्या त्यो प्रतिग्याकि असल रइबार हाम तमरा वा लेउनाउ। 33 परमेस्वरले इसुलाइ मर्याबटहइ जिउनो पाणिबर हाम उनुनका सन्तानकि निउति यो प्रतिग्या पुरा अरिदियो। यइ कुराका बिसयमि भजन दुइमि लइ इसेरि लेखिया छ, “‘तम मेरा चेला हउ, आज मु तमरो बा होइरइछु।’” 34 उनुले ख्रिस्टलाइ कभइ नसड्या अरि मर्याबटहइ जिउनो पाण्या बिसयमि यसो भुन्या छ, “‘मु तमुलाइ दाउदलाइ दिया पबित्तर रे अटल आसिर्बाद दिन्याछु।’ 35 इसेरि अर्खा भजनमि लइ यसो भुणिया छ, ‘तमले आफना पबित्तर जनको सरिल कुन दिन्या आथिनउ।’” 36 “यो कुरा दाउदले आफना बिसयमि भुण्या हइनन् क्यालाइकि उनरा आफनाइ पुस्तामि परमेस्वरका उदेस्यअन्सार सेबा अरिबर मर्यापाछा उनरा पिता-पुर्खानसित दाउद गाडिया, रे उनरो सरिल सडिबर गयो। 37 तर जइलाइ परमेस्वरले मर्याबटहइ जिउनो पाण्यो उनरो सरिल भुन्या सडेन। 38 तबइलाइ दाइभाइ हो, तमुलाइ था हउ, कि इनइ इसुबटहइ पाप-छिमा हुन्छ भन्न्या घोसणा तमुलाइ अरिया छ। 39 तम बिस्वास अद्द्यान हरेकले उनइबटहइ पापको छुट्कारा पायाछउ, जो छुट्कारा मोसाका ब्यबस्थाबटहइ तमरि निउति सम्भव थेएन्। 40 तबइलाइ होसियार बस, नति अगमबक्तानका किताबमि भुणिया यिन कुरा तमुमि आउन्या छन्। 41 ‘हे गिल्ला अद्द्यान हो! अचम्म माण रे नास होइजा! क्यालाइकि तमरा समयमि मु एक काम अद्द्याछु, यसो काम जइका बिसयमि कसइले बताइदिया लइ तमुले कभइ बिस्वास अद्द्या आथिनउ।’” 42 पावल रे बारनाबास सभाघरबटहइ निकलिबर जान्ज्या आउन्या बिस्राम दिनमि लइ यिन कुरा सुणाइदिय भनि मान्सनले तिनुनलाइ बिन्ति अर्यो। 43 सभा सकियापाछा भउत यहुदिन, यहुदि मत मान्न्या भक्तन पावल रे बारनाबासका पाछा लाग्या, पावल रे बारनाबासले उनुनसित कुराकानि अद्दाइ उनुनलाइ परमेस्वरका अनुग्रहमि रइरया भनि आग्रह अर्यो। 44 अर्खा बिस्राम दिनमि सहरबटहइ भउत जना मान्स परमेस्वरको बचन सुन्नाइलाइ उर्लिबर आया। 45 भिडलाइ धेकिबर यहुदि अगुवान रिसले चुर भया रे पावलले भुण्या कुराको खण्डन अद्दाइ तिनरो निन्दा अद्द लाग्या। 46 तर पावल रे बारनाबासले साहस अरिबर भुन्यो, “परमेस्वरको बचन सबभन्ना पइलि तमुइलाइ सुणाउन आबस्यक थ्यो। तमुले यइलाइ इन्कार अरिबर आफुलाइ कभइ नमद्दया जिबनका भागिदारबटहइ अयोग्य बनायाहुनाले हाम आब अउरजातिनका वाँ जान्याछउ। 47 क्यालाइकि प्रभुले हामुलाइ यसो आग्या दिया छन्। “धर्तिका पल्ला किनारसम्म मान्सनले मुक्ति पाउन भनिबर, मुइले तमुलाइ अउर जातका मान्सनकि निउति ज्योति हुनाइलाइ निउक्ति अर्या छु।” 48 जबइ अउरजातिनले यिन कुरा सुण्यो, तिनुन खुसि भया, रे परमेस्वरका बचनको प्रसम्सा अर्यो, रे कभइ नमद्या जिबनकि निउति छानिया जतिले बिस्वास अर्यो। 49 प्रभुको बचन तइ छेत्र भरि फिजियो। 50 तर पावल रे बारनाबासका बिरुद्द यहुदिनले भक्त रे नाउँचलेइ स्वानिन रे सहरका मुख्या मुख्या मान्सनलाइ उस्कायो, रे पावल रे बारनाबासलाइ आफना साँधसिमानाबटहइ बाइर निकालिदियो। 51 तबइलाइ पावल रे बारनाबासले मान्सनलाइ परमेस्वरले न्याय अरुन भनिबर तिनुनका बिरुद्दमि आफना खुट्टाको धुलो टकटक्यो, रे आइकोनिया सहरतिर गया। 52 सिस्यान पबित्तर आत्माले भरिबर भउत खुसि भया। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.