प्रेरित 10 - डोटेलिपत्रुस रे कर्नेलियस 1 कइसरिया सहरमि कर्नेलियस नाउँ भया एक जना मान्स थ्या। जो रोमि सेना इटालिया भन्या पल्टनका कप्तान थ्या। 2 तन परमेस्वरको आराधना अद्द्या मान्स थ्या। तन रे तनरा सप्पइ मउकपिलाले परमेस्वरको डर राखन्थ्या। तन खाँचामि पण्या मान्सनलाइ उदार चित्तले दान दिइबर परमेस्वरसित सदाइँ प्रार्थना अरनथ्या। 3 एक दिन कर्नेलियसले दिनका तिन बजेतिर दर्सनमि परमेस्वरका एक स्वर्गदुत आफुतिर आइबर यसो भुन्नारया सुण्यो, “ए कर्नेलियस!” 4 तइपाछा कर्नेलियसले डर मानिबर स्वर्गदुतलाइ एकहोरिबर हेर्यो रे भुन्यो, “प्रभु भुण।” रे उनुले तिनलाइ भुन्यो, “तमरो प्रार्थना रे गरिबनलाइ अर्या साहेता परमेस्वरले समजिराइ छन्। 5 “आब योप्पा सहरमि पत्रुस भणिन्या सिमोनलाइ बोलाउन मान्सन पठा। 6 तन छालाको काम अद्द्या सिमोनका घरमि बस्या छन्। जइको घर समुन्दरका किनारमि छ।” 7 जबइ तिनसित बोल्या स्वर्गदुत बिदा भया, तबइ तनले आफना नउकरमध्ये दुइ जना रे निरन्तर तिनरो सेबा-टहल अद्द्या एक जनो परमेस्वरको आराधना अद्द्या सिपाइलाइ बोलायो। 8 कर्नेलियसले तिनुनलाइ सप्पइ कुरा बताइबर योप्पा सहरमि पठायो। पत्रुसको दर्सन 9 भोलिबार तिनुन आफना यात्रामि तइ सहरका नजिक आइपुगन्ज्या, दिनका बार बजेरतिर पत्रुस प्रार्थना अद्द घरका छतमि उकल्या। 10 प्रार्थना अरन्ज्या पतरुसलाइ भोक लाग्यो रे तनले केइ खान्या मन अर्यो, तर अउरनले खाना तयार अद्द्या बेला तनले एक अचम्मको दर्सन धेक्यो। 11 तनले स्वर्ग उघण्या रे ताँबटहइ ठुलो तन्ना चारइ कुनामि समाइबर धर्तितिर झड्डारया केइ थोक जसो धेक्यो। 12 तइ तन्नामि धर्तिका सप्पइ किसमका चारखुट्या पसुन, घसाडिन्या जन्तुन, अग्गासका चणाचुणुङिन थ्या। 13 तबइ तिनले एक आबाज सुण्यो, “ए पत्रुस उठ, तन सप्पइ मारिबर खाँ।” 14 तर पत्रुसले भुन्यो, “हइन प्रभु, क्यालाइकि मुइले कभइलइ केइ अपबित्तर या असुद्द थोक खाया आथिन्।” 15 त्यो आबाज अज दोसर्या लइ तनले सुण्यो, “परमेस्वरले जि सुद्दु अर्या छ तइलाइ तु असुद्दु जनमाणइ।” 16 तिनबेरसम्म यसोइ भयापाछा, उन्जेइ त्यो तन्ना स्वर्गतिर लइयो। 17 जबइ पत्रुस आफुले धेक्या यो दर्सनको अर्थ कि होलो भनिबर मनमनइ अन्योलमि पणिरइथ्या। तसइ बेला कर्नेलियसले पठाया मान्सन सिमोनको घर खोज्जाइ देलि अगाडि कलिबर भुन्यो, 18 “पत्रुस भनिन्या सिमोन या बस्या छन् कि?” भुणिबर उच्चा स्वरले सोद्यो। 19 जबइ पत्रुस दर्सनका बिसयमि बिचार अद्दाथ्या तबइ पबित्तर आत्माले तनलाइ भुन्यो, “हेर, तिन जना मान्सनले तुलाइ खोज्जाछन्। 20 उठ, रे तल्तिर ओरल, रे नहिचकिचाइबर तिनुनसित जा, क्यालाइकि तिनुनलाइ मुइले पठाया हुँ।” 21 तबइ पत्रुस तल्तिर ओरलिबर आया रे तन मान्सनका वा जाइबर भुन्यो, “तमुले खोज्या मान्स मुइ हुँ। तमु या आया कारण कि हो?” 22 तिनुनले भुन्यो, “एक जना कप्तान कर्नेलियस, जो सोजा रे परमेस्वरसित डराउन्या रे सारा यहुदि जातिबटहइ सम्मान पाया मान्स हुन्। तमलाइ उनरा घरमि बोलाया छन् क्यालाइकि तमबटहइ परमेस्वरको बचन सुन्न भुणि एक पबित्तर स्वर्गदुतबटहइ उनलाइ आदेस मिल्या छ।” 23 तबइ पत्रुसले तिनुनलाइ भितर बोलाइबर तिनुनको स्वागत-सत्कार अर्यो। तिनुन तइ रात ताँइ बस्या। भोलिबार पत्रुस उठिबर तिनुनसित गया, रे योप्पा सहरमि भया प्रभुमि बिस्वास अद्द्या कतिपइ दाइभाइ लइ तनसित गया। 24 तेसरा दिनमि तिनुन कइसरियामि पुग्या। कर्नेलियसले आफना कुटुम्बन रे घनिस्ट सङिनलाइ बोलाइबर जमा अरि तिनुनको बाटो हेरिरइथ्या। 25 जबइ पत्रुस भितर आया तबइ कर्नेलियसले तनसित भेट अरि तनरा खुट्टाइनि पणि दण्डवत् अर्यो। 26 तर पत्रुसले उनलाइ यसो भुन्नाइ उठायो, “उठ, मु आफुइ लइ मान्स मात्तर हुँ।” 27 तबइ पत्रुस कर्नेलियससित कुरा अद्दाइ घरभितर पस्या। रे ताँ तनले भउत जना भेला भया धेक्यो। 28 तबइ पत्रुसले तिनुनलाइ भुन्यो, “तमुलाइ थाइ छ, कि एक यहुदिकि निउति अउरजातिनका मान्सनसित सङत अद्दु या भेटघाट अद्दु हामरा ब्यबस्थाका बिरुद्दमि हो। तर परमेस्वरले मुलाइ कसइ मान्सलाइ लइ अपबित्तर या असुद्द जनमाणेइ भनि धेकाया छन्। 29 तबइलाइ तमले मुलाइ बोलाउन्जेइ मु नहिचकिचाइबर तमरा वा आया, तमुले मुलाइ क्याकि बोलाया हउ? लउ भुण।” 30 “चार दिनअगाडि लगभग इसइ समयमि दिनका तिनबजेतिर मु घरमि प्रार्थना अद्दाथ्या, अचानक चम्किला लत्ता लाया एक जनो मान्स मेरा अगाडि कलियो, 31 रे मुलाइ भुन्यो, ‘कर्नेलियस, परमेस्वरले तमरो प्रार्थना सुण्या छ। रे तमले गरिबनलाइ दिया दानको सम्जना होइरइ छ। 32 तबइलाइ योप्पा सहरमि मान्स पठाइबर पत्रुस भुनिन्या सिमोनलाइ बोला। तन समुन्दरका किनारमि छालाको काम अद्द्या सिमोनका घरमि बस्या छन्।’ 33 तबइ मुइले तुरुन्तइ तमलाइ बोलाउन मान्स पठाया, रे तम कस्ट अरिबर आया। आब प्रभुबटहइ तमलाइ आग्या भया सप्पइ कुरा सुन्न हाम परमेस्वरका अगाडि या भेला भया छउ।” पत्रुसको उपदेस 34 तबइ पत्रुसले भुन्यो, “साँच्चि मु धेक्दाछु कि परमेस्वरले पछ्यपात अद्दाइनन्। 35 तर हरेक जातिमि जो परमेस्वरसित डराउछ, रे ठिक काम अरन्छ, त्यो उनरा अगाडि सुइकारयोग्य हुन्या छ। 36 तमुलाइ थाइ छ कि इसुइ सप्पइका प्रभु हुन्। परमेस्वरले उनइबटहइ सान्ति दिन्या असल रइबार इज्राएलिनमि पठायो। 37 युहन्नाले बप्तिस्माको प्रचार अर्या पाछा गालिल छेत्रबटहइ सुरु अरिबर सारा यहुदियाभरि प्रचार अरिया बचन तमुलाइ थाँ छ। 38 परमेस्वरले नासरतका इसुलाइ पबित्तर आत्मा रे सक्तिले अबिसेक अर्यो, कि कसेरि उनुले भलाइको काम अद्दाइ भुत लाग्यालाइ निको पाड्डाइ सप्पइ ठउँरतिर गया। क्यालाइकि परमेस्वर उनसित थ्या। 39 रे उनुले यहुदिनका देसमि रे यरुसलेममि अर्या सप्पइ कुराको हाम साछि छउ। यहुदिनले उनलाइ क्रुसमि झुणेइबर मार्यो। 40 तर उनइलाइ परमेस्वरले तेसरा दिनमि जिउनो पाणिबर उठायो, रे मान्सनले उनलाइ धेक्द पायो। 41 उन सप्पइ मान्सनका वाँ त धेकिएनन्, तर उन जिउना भइबर उठ्यापाछा उनसित रन्या रे बस्यानका वा धेका पण्या क्यालाइकि परमेस्वरले हामुलाइ यइ घटनाका साछि बनाउनाइलाइ अगाडिबटहइ चुन्या थ्यो। 42 हामले मान्सनलाइ प्रचार अद्द, रे उन जिउना रे मर्यानका न्यायकर्ता हुनाइलाइ परमेस्वरबटहइ निउक्ति भया मान्स हुन् भन्न्या गवाइ दिनाइलाइ उनुले हामुलाइ आग्या अर्या छन्। 43 सप्पइ अगमबक्तानले उनरा बिसयमि इसेरि गवाइ दिया छन्, ‘उनमि बिस्वास अद्द्या सप्पइले उनरो नाउँबटहइ पाप-छिमा पाउँछ।’” 44 पत्रुसले यिन कुरा बोल्लाबोल्लाइ बचन सुन्न्या सप्पइमि पबित्तर आत्मा आया। 45 परमेस्वरले आफना पबित्तर आत्माका बर्दान अउरजातिनका मान्सनमि लइ खणेया धेकिबर पत्रुससित आया प्रभुमि बिस्वास अद्द्या यहुदिन अचम्ममि पड्या। 46 क्यालाइकि अउर भासामि बोलिबर तिनुनले परमेस्वरको प्रसम्सा अद्दारया उनुनले सुण्यो। तबइ पत्रुसले भुन्यो, 47 “हामले जसेरि पबित्तर आत्मा पाउन्या यिनुनलाइ पानिको बप्तिस्मा हुनाबटहइ कइले रोक्द सकन्छ?” 48 तबखिलाइ पत्रुसले तिनुनलाइ इसु ख्रिस्टका नाउँमि बप्तिस्मा लिय भुणि आग्या अर्यो, तबइ तिनुनले पत्रुसलाइ केइ दिन आफुइसंङ रनाइलाइ बिन्ति अर्यो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.