२ तिमोथी 4 - डोटेलि1 जिउना रे मर्याहुन्याको इन्साप अद्द आउन्या ख्रिस्ट इसु रे परमेस्वरका अगाडि, उनरो आउन्या दिन रे राज्यलाइ ध्यानमि राखिबर मु तुलाइ कडा आग्या दिनउ, 2 परमेस्वरको बचन सुनाउनाइ रे प्रचार अद्दाइलाइ जइबेला लइ तयार भइबर बस्। पुरा सहनसिलतामि मान्सलाइ सिछ्या सिकाइबर अर्ति दे, हप्का रे उस्साह दे। 3 क्यालाइकि यसो समय आउन्ना छ, मान्स ठिक सिछ्यालाइ नसहनसक्द्या हुन्याछन् तर आफुलाइ मन पण्या सिछ्या मात्तरइ सुन्न चाहान्या रे आफना मन लाग्या सिछ्यक खेड्डया छन्। 4 रे आफना कानले सत्य कुरा सुन्नाइलाइ हइन तर मान्सले बनाया खालिसारा कथा सुन्नु निको मान्न्या छन्। 5 तर तु भुन्या सप्पइ कुरामि होसियार हो। कस्ट भोग्, असल रइबार प्रचार अर, रे तेरा सेबाको काम पुरा अर्। 6 क्यालाइकि, मु त बलिका रुपमि अर्पण हुन्ना छु, मेरो मद्दया समय नजिक आइसक्या छ। 7 मुइले बिस्वासको लडाइ लड्या छु। मुइले मेरो दउड सक्या छु। मुइले मेरा बिस्वासलाइ बचाइराख्या छु। 8 आब यइपाछा मेरि निउति धर्मिकताको मुकुट राखिया छ, जो धार्मिक न्याइदिस प्रभुले तइ दिन मुलाइ दिन्याछन्, रे मुलाइ मात्तरइ हइन, तर उनु दोसर्या आउन्या दिनको बाटो हेद्दया जति सप्पइलाइ यो दिन्याछन्। तिमोथिलाइ दिया सर-सल्लाहा 9 तु मेरा वा आउनाइलाइ जति सक्यो छिट्टाइ कोसिस अर्। 10 क्यालाइकि डेमासले यइ सन्सारलाइ पिरिम अरि मुलाइ छाडिबर उ थेसलोनिके गयो। क्रेसेन्स गलातियामि रे तितस भन्या दलमातियामि गया छन्। 11 लुका मात्तरइ मुसित छ। मर्कुसलाइ खोजिबर तुइले आफुइसितइ लेइबर आयइ, क्यालाइकि तइले मेरा सेबाका काममि साहेता अद्द सक्द्या छ। 12 तुखिकसलाइ मुइले एफिसस पठाया छु। 13 तु आउन्याबेला तोरोआस सहरमि कार्पसका वाँ मुइले छाडि राख्या खास्टो रे किताब, बिसेस अरिबर छालामि लेखिया किताब तुइले नबिसरिबर लेइदिएइ। 14 तामाको काम अद्द्या अलेक्जेन्डरले मुलाइ भउत दुःख दियो। प्रभुले तइलाइ तइका काम अन्सारको बदला दिन्या छन्। 15 तु लइ तइसित होसियार होइबर बसेइ, क्यालाइकि तइले हामरा सिछ्याको घोर बिरोद अरन्छ। 16 पइल्लिबेर मेरो मुद्दा पड्याबेला कसइले लइ मेरो पछ्य लिएन, यइ कुराको दोस तिनुलाइ जनलागउ! 17 तर प्रभु मुसित भइबर अउरजातिले असल रइबार सुन्न पाउन भनिबर असल रइबार प्रचार अद्द्या सक्ति मुलाइ दियो। यसेरि प्रभुले मुलाइ बागका मुखबटहइ छुट्या जसेरि बचायो। 18 हो, प्रभुइले मुइलाइ सप्पइ किसमका खराबिबटहइ बचाउन्या छन्। उनुइले मुलाइ जोगाइबर आफनो स्वर्गिय राज्यकि निउति लइजान्या छन्। उनुइलाइ सदाइँ महिमा होइरउ! आमेन। अन्तिम अबिबादन 19 प्रिस्किला, अकिलासलाइ रे ओनेसिफरसका मउकपिलालाइ मेरो अबिबादन छ भुनि दे। 20 इरास्तस कोरिन्थमि रयो। तोरोफिमस बिरामि भयाहुनाले तइलाइ मिलेटस सहरइ छाड्याँ। 21 सकन्छइ भुन्या तु हिउनका मइना भन्ना अगाडि मेरा वाँ आउन्या कोसिस अर। युबुलसले तुलाइ अबिबादन पठाया छन्, रे पुडेस, लिनस, क्लउडिया रे सप्पइ दाइभाइले लइ तुलाइ अबिबादन पठाया छन्। 22 प्रभु तेरा आत्मामि बास अरुन। रे परमेस्वरको अनुग्रह तमुमि रइरउ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.