२ तिमोथी 3 - डोटेलिअन्त्यका दिनका बारेमि 1 अन्त्यका दिनमि कठिन समय आउन्याछन् भनिबर तुलाइ था हुनपणन्छ। 2 क्यालाइकि तइबेला मान्स आफुइलाइ मात्तरइ निको मान्न्या, रुप्यापइसाको लोभ अद्द्या, घमण्डि, हठि, अउरको बदनाम अद्द्या, इजा-बाको भुन्या नमान्या, बइगुनि, अपबित्तर, 3 कसइलाइ पिरिम नअद्द्या, निर्दयि रे अउरको चुक्लि लाउन्या, छाडा, डरलाग्दा, निका कुरालाइ घिणा अद्द्या हुन्याछन्। 4 बिस्वासघाति, उत्ताउला, अहङकारले फुल्या, परमेस्वरलाइ भुन्ना सुख बिलासलाइ निको मान्या। 5 तिनुले परमेस्वरको भक्ति अर्या जसो त अद्दाछन्, तर तइका सक्तिलाइ इन्कार अद्दाछन्। यसा मान्सबटहइ अलगइ बस्। 6 तमरा बिचमि कोइ मान्स घर घर पसिबर पापले थिचिएइ रे पापइ अद्या इछ्या राख्देइ कम्जोर भएइ स्वाइनि मान्सलाइ आफना अधिनमि पाड्डाछन्। 7 तिनु स्वाइनि मान्स सिक्द त दिन्दिनइँ सिकन्छिन्, तर सत्यका ग्यानमि कभइ आउनिनन्। 8 यान्नेस रे याम्ब्रेसले जसेरि मोसाको बिरोद अर्या थ्यो, तसेरि यिनु मान्सले लइ सत्यको बिरोद अद्दाछन्। यिनु मान्सको दिमाग भ्रस्ट भया रे नक्कलि बिस्वासका हुनाछन्। 9 तर तिनु सदाइँ यसो अद्द सक्दाइन् क्यालाइकि यान्नेस रे याम्ब्रेसकि जसेरि तिनरो मुर्खता सप्पइले था पाउन्या छन्। तिमोथिलाइ पावलको आदेस 10 तर तुइले मेरो सिछ्या, मेरो चरित्र, मेरो जिबनको लछ्य, मेरो बिस्वास, मेरो धइर्य, मेरो पिरिम रे मेरो इस्थिरता धेक्या छइ। 11 एन्टिओखिया, आइकोनियन रे लुस्त्रामि मुइले भोग्या दुःख तुइले निकेरि बुज्या छइ। तबइलइ प्रभुले मुलाइ तिनु सप्पइ आपतबटहइ बचायो। 12 ख्रिस्ट इसुमि भक्तिको जिबन बिताउन्या इछ्या अद्द्या सप्पइ जना सतावटमि पड्डया छन्। 13 तर दुस्ट रे ठग मान्स त अर्कालाइ ठग्दउ भन्ना भन्नाइ आफुइ ठगिनाछन् रे तिनु झिग झिग बिगड्इ जानाछन्। 14 तर तुइले आफुले सिछ्या पाइबर बिस्वास अर्या सत्यतामि लागिराख्। त्यो कइबटहइ सिक्या छइ, त्यो त तु आफुइ जान्नछइ। 15 तु नान्काइछनबटहइ पबित्तर धर्म-सास्त्तरका बिसयमि जान्नछइ यिनु कुराले ख्रिस्ट इसुमि भया बिस्वासबटहइ मुक्तिकि निउति तुलाइ सिछ्या दिन सकन्छ। 16 पबित्तर धर्म-सास्त्तर सप्पइ परमेस्वरका प्रेरणाबटहइ लेखिया हो, रे यो सिकाउनाइलाइ, अर्ति दिनाइलाइ, सच्याउनाइलाइ, धार्मिकतामि तालिम दिनाइलाइ लाभदायक हुन्छ। 17 क्यालाइकि परमेस्वरका जनले भलाइका हरेक काम पुराइ रुपले अद्द सक्दाइलाइ धर्म-सास्त्तर दिइया हो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.