२ तिमोथी 2 - डोटेलिख्रिस्ट इसुमि भरोसा अद्द्या सिपाइ 1 तबइलाइ मेरा चेला तिमोथि, तु ख्रिस्ट इसुले दिया अनुग्रहमि बलियो हुनोइ जा। 2 मुइले भउतइ मान्सका अगाडि तुलाइ जो सिछ्या दिया कुरा छन्, तिनु कुरा सिकाउन सक्द्दया बिस्वासयोग्य मान्सलाइ सउपिदे। 3 ख्रिस्ट इसुको साँचो सिपाइ जसोइ होइबर तु हामुसितइ दुःख भोगमि सहभागि हो। 4 सेनामि भर्ना भया सिपाइ अउर काममि अलमल पड्डइन्, क्यालाइकि उइलाइ भर्ना अद्द्या कप्तानलाइ खुसि पाड्डया उइको लछ्य हुन्छ। 5 तसोइ अरि खेलमि भाग लिन्या खेलाडिले खेलको नियम अन्सार खेलेन भन्या इनाम पाउन सक्दइन्। 6 जइ किसानले मिहिनत अरिबर आफनो खेति लाउछ, बालिको पइलो फल उसइले पाउछ। 7 मुइले भुन्या कुरा बिचार अर, क्यालाइकि प्रभुलेइ तुलाइ यिनु सप्पइ कुरा बुज्ज सक्द्या सक्ति दिन्याछन्। 8 इसु ख्रिस्टलाइ सम्जिराख, उनु मर्याबटहइ जिउना भया हुन्। उनु दाउद बन्सका हुन् मुइले प्रचार अर्या असल रइबार यइ हो। 9 यसइ असल रइबारकि निउति मु दुःख भोग्दा छु। तति मात्तरइ हइन, अपराधिकि जसेरि साङलामि बाँदिया छु। तर परमेस्वरको बचन त साङलाले बाधिनइन्। 10 तबइलाइ चुनियाहुन्याका खातिर मु हरेक कुरा सहनउ, ताकि तिनुले लइ अनन्त महिमासित ख्रिस्ट इसुमि भया मुक्ति पाउन सकुन्। 11 यो भुनाइ साँचो हो, “यदि हामु उनुसितइ मर्या छु भुन्या, हामु लइ उनुसितइ जिउन्या छउँ। 12 हामु लइ उनसितइ दुःख भोगमि सहभागि भया भुन्या, उनुसितइ राज्य लइ अद्द्या छउँ। रे हामुले उनुलाइ इनकार अर्या भुन्या, उनुले लइ हामुलाइ इन्कार अद्द्या छन्। 13 हामु अबिस्वासि छउँ भन्या लइ उनु बिस्वासयोग्य रन्या छन्, क्यालाइकि उनु आफुलाइ इन्कार अद्द सक्दाइन्।” परमेस्वरबटहइ निउक्ति भया कामदार 14 यो कुरा तु मण्डलिका मान्सलाइ सम्जाइ दे, रे परमेस्वरका नाउमि आग्या दे, कि तिनुले सब्दमि बादबिबाद जनअरुन। जइले भलाइ अद्दइन्, तर सुन्या मान्सलाइ बिगाणन्छ। 15 लाज नमान्नु पड्या रे सत्यको बचनलाइ ठिकसित पालन अद्द्या कामदारकि जसेरि आफुले आफुलाइ परमेस्वरमि ग्रहणयोग्य बनाउन्या कोसिस अर। 16 तु भन्या काम बिनाका कुराबटहइ अलगइ बस। क्यालाइकि यइले त मान्सलाइ परमेस्वरबटहइ झिग बर्ता अधर्मिकतातिर लइजान्छ। 17 यसो कुरा त कभइ निको नहुन्या घा जसोइ हो। हुमेनियस रे फिलेतसका सिछ्या लइ तसाइ हुन्। 18 तिनुले सत्यलाइ छाड्या छन्। मर्याबटहइ जिउना हुन्या कुरा त अगाडिबटहइ भइसक्या छ, भुन्न्या सिछ्या दिबर कति जनाको बिस्वासलाइ खलबलाइदिया छन्। 19 तर परमेस्वर आफुइले लाया उनरो जग सदाइँलाइ बलियो होइबर रइरन्या छ। तइमि यो छाप लाग्या छ, “प्रभुले आफना मान्सलाइ चिन्नाछन” रे “प्रभुको नाउँ लिन्या जति सप्पइ खराब कामबटहइ अलग रनपडन्छ।” 20 ठुला घरमि सुन रे चाँदिका भाँणा मात्तरइ हुनाइन्, तर काठ रे माटोका लइ हुनाछन्, कोइ आदरकि निउति कोइ अनादरकि निउति। 21 कसइले खराब कुराबटहइ आफुलाइ सुद्द पाण्यो भुन्या त्यो आदरका कामकि निउति काम लाग्द्या भाणो जसोइ हुन्या छ, रे घरका मालिककि निउति काम लाग्द्या रे असल कामकि निउति तयार रन्या छ। 22 तबइलाइ जवानिका अभिलासा छाडिबर सुद्द मनले प्रभुको नाउँ लिन्यासित सङसङइ धर्मिकता, बिस्वास, पिरिम रे सान्तिको लछ्य राख। 23 तर जान्नइ नजान्या बिनाकामका तर्कबितर्कबटहइ अलगइ बस। तुलाइ थाइ छ, यसा कुराबटहइ झगडा मात्तरइ हुन्छ। 24 प्रभुको सेबक झगडालु हुनुहुनइन्। उ सप्पइसित मिलिबर बस्या, सिछ्या दिन सक्द्या रे सप्पइ कुरा सहन सक्द्या हुनुपणन्छ। 25 रे आफना बिरोदिलाइ नम्रतासित सम्जाउन सक्द्दया हुनपणन्छ, रे सायद परमेस्वरले तिनुलाइ पस्साताप अरि सत्यतालाइ बुज्ज सक्द्या मन दिन्या छन्। 26 यसेरि तिनु चेतना पाइबर सइतानका फन्दाबटहइ उम्कन्या छन्, क्यालाइकि सइतानले तिनुलाइ आफना इछ्याअन्सार काम अराउनाइलाइ पकणिबर राख्या छ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.