२ तिमोथी 1 - डोटेलि1 मेरो प्यारो चेलो तिमोथि, परमेस्वरका इछ्याले ख्रिस्ट इसुमि भया कभइ नमद्या जिबनको प्रतिग्या अन्सार ख्रिस्टले छान्या मु प्रेरित पावलका तर्फबटहइ यो चिट्ठि पठाया हुँ। 2 परमेस्वर पिता रे हामरा प्रभु इसु ख्रिस्टको अनुग्रह, किर्पा रे सान्ति तुसित रइरउ। प्रसम्सा रे बिन्ति 3 मेरा प्रार्थनामि मु तुलाइ रात-दिन सम्जिनउ, रे परमेस्वरलाइ धन्यवाद दिनउ। जइको सेबा मेरा पिता-पुर्खाले अर्या जसेरि मु सुद्द मनले अद्दउ। 4 जबइ तु रोया मु सम्जिनउ, तबइ झिग छिटाइ तुलाइ भेट्टया मेरो इछ्या हुन्छ। तुलाइ भेट्यापाछा मेरो आनन्न पुरा हुनेइथ्यो। 5 मुलाइ तेरो त्यो साँचो बिस्वासको सम्जना हुन्छ, जो पइल्लि तेरि बजेइ लोइस रे तइपाछा तेरि इजा युनिसमि थ्यो। रे आब तुमि लइ तेइ बिस्वास छ भन्न्या कुरामि मु पक्का छु। 6 तबइलाइ मु तुलाइ अज याद दिलाउन चाहानउ, कि मुइले तुमि हात राखिबर तुइले परमेस्वरबटहइ पाया बर्दानलाइ चलाइ राखेइ। 7 क्यालाइकि परमेस्वरले हामुलाइ डरको आत्मा हइन, तर सक्ति, पिरिम रे आत्मा-संयमको आत्मा दिया छन्। 8 तबइलाइ हामरा प्रभुको गवाइ रे मु उनरो कइदिको लाज जनमानइ, तर परमेस्वरका सक्तिमि असल रइबारकि निउति मुसितइ दुःख भोगाइमि तु लइ सहभागि हो। 9 परमेस्वरले हामरो उद्दार अर्यो, रे उनरो पबित्तर मान्स हुनाइलाइ बोलायो। हामरा कामका हिसाबले हइन, तर उनरो आफनोइ इछ्या रे अनुग्रहका आधारमि हो, जो उनुले ख्रिस्ट इसुमि युग युग अगाडिबटहइ हामुलाइ दिया थ्यो, 10 यो अनुग्रह हामरा मुक्तिदाता इसु ख्रिस्टबटहइ धेकियो जइले मिरत्युलाइ नास अर्यो। रे असल रइबारबटहइ कभइ नमद्दया जिबन लेइबर आया। 11 परमेस्वरले मुलाइ यसइ असल रइबार सुनाउनाइलाइ प्रचारक, प्रेरित रे सिछ्यक हुनाइलाइ निउक्ति अर्यो। 12 तबइलाइ मु यिनु कुरामि दुःख भोग्दा छु। तर मुलाइ यइ कुरामि लाज लाग्दइन् क्यालाइकि मुइले कइमि बिस्वास राख्या छु, त्यो मुलाइ था छ। परमेस्वरले मेरा जिम्मामि लाया कुरालाइ उनइले तइ दिनसम्मखिलाइ जोगाइ राख्द्या छन्। यइमि मु ढुक्क छु। 13 जो मुइले तुलाइ सिकाया साँचो सिछ्या छ तइमि लइ ख्रिस्ट इसुमि भया बिस्वास रे पिरिममि रइबर लागिराख्। 14 हामु भितर बास अद्द्या पबित्तर आत्माका सक्तिले तुलाइ दिया सेबाको काम जो छ, तइको रखवालि अर्। 15 तुलाइलाइ थाइ छ, एसियामि मुसङ्ङ भयाहुन्या सप्पइ मुबटहइ तर्किबर गया, तिनुमध्ये फुगेलस रे हरमोगेनस हुन्। 16 प्रभुले ओनेसिफरसका घर परिवारमि किर्पा अरुन, क्यालाइकि मु झेलखानामि भयाबेला ओनेसिफरसले लाज नमाणिबर मुइलाइ भिट्ट आयो रे हउसला दियो। 17 तर तिनु रोममि आयापाछा तिनुले मुलाइ खोजि खोजि भिट्यो। 18 ख्रिस्टका आगमनका दिनमि प्रभुबटहइ तिनुले अनुग्रह पाउन सकुन्! तुलाइ थाइ छ, मु एफिससमि हुन्याबेला लइ तिनुले मेरो पुरा सेबा अर्या थ्यो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.