२ थेसलोनिकि 3 - डोटेलिप्रार्थनाकि निउति अनुरोध 1 अन्त्यमि भाइबिना हो, हामरि निउति प्रार्थना अरिदिय, यसो अद्दाले तमरा बिचमि फइलिया जसेरि प्रभुको असल रइबार चारइतिर छिट्टाइ फइलिबर यइको ठुलो आदर हउ। 2 पइ सप्पइ मान्सले बिस्वास नअद्द्या हुनाले खराब रे दुस्ट मान्सबटहइ परमेस्वरले हामुलाइ जोगाइबर राख्द्या छन्। 3 तर प्रभु त बिस्वासयोग्य छन्। उनुले तमुलाइ इस्तिर अराउन्या छन् रे दुस्टबटहइ सुरछित राख्द्या छन्। 4 हामु ज्या कुराको आग्या दिनाउ, तिनु कुरा तमुले अरिराख्या छउ रे अद्द्या छउ भन्न्या हामुले तमरा बारेमि प्रभुमि भरोसा राख्या छउ। 5 प्रभुले तमरा ह्रिदयलाइ परमेस्वरको पिरिम रे ख्रिस्टको धर्यतिर डोर्याउन्। अल्छेलाइ चेतावनि 6 भाइबिना हो, हामरा प्रभु इसु ख्रिस्टका नाउँमि हामु तमुलाइ आग्या दिनाउ, कि हामुबटहइ तमुले पाया सिछ्यामि नचल्या हरेक अल्छि भाइबिनाबटहइ अलग बस। 7 क्यालाइकि हामु तमुसित हुनतग अल्छि अरिबर बसेइन्। हामुले अर्या जसेरि तमुले लइ काम अद्दु पड्डछ भुन्न्या कुरा त तमुलाइ थाइ छ। 8 हामुले कसइको रोटो सित्तिमि खाएइन्। तर तमु कसइलाइ लइ भार जनहउ भनिबर हामुले रातदिन मिहिनत अरिबर काम अर्यउँ। 9 हामुलाइ तमुबटहइ साहेता पाउन्या अधिकार नभया हइन्, तर हामरो बानि ब्यबहार तमरि निउति एक आदर्स बनउ भनिबर हामुले यसो अर्या हुँ। 10 काम नअद्द्याले खानु नखाया लइ हुन्छ भनिबर हामुले तमुलाइ आग्या दिया थ्या। 11 क्यालाइकि हामुले सुन्या छउँ कि, कति जना अल्छि भयाछन् रे तिनु आफुइ केइ काम अद्दाइनन्, तर अउरका काममि हात हालिबर बाधा अद्दाछन् 12 आब यसा मान्सलाइ प्रभु इसु ख्रिस्टका नाउँमि हामु आग्या रे अर्ति दिनाउ, कि तिनुले चुपचाप आफना कामअरुन् रे अउरका रे आफनो गुजरा चलाउन्। 13 तर भाइबिना हो, तमु भन्या भलाइ अद्दाइलाइ जनथाक। 14 तमुमध्ये कसइले हामुले यइ चिट्ठिमि लेख्या सिछ्या मान्नइन भन्या तइ मान्सलाइ चिनिराख रे तइसित केइ सम्बन्ध जनराख, तसो अद्दाले त्यो लाजमि पड्डया छ। 15 तबइ लइ तइलाइ सत्तुर जसो जनसुच, तर भाइकि जसेरि तइलाइ चेतावनि दिय। अन्तिम अभिबादन 16 आब सान्ति दिन्या प्रभु आफुइले तमुलाइ सान्ति दिउन। प्रभु तमु सप्पइसित रहुन। 17 मु पावल, आफनाइ हातले यो अभिबादन लेख्दा छु। मेरा सप्पइ चिट्ठिको चिनारि यइ हो। यसेरि मु लेख्दउ। 18 हामरा प्रभु इसु ख्रिस्टको अनुग्रह तमु सप्पइसित रइरउ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.