२ थेसलोनिकि 2 - डोटेलिइसु दोसर्या आउनु भन्ना पइल्लिका कुरा 1 मेरा प्यारा भाइबिना हो, हामरा प्रभु इसु ख्रिस्ट दोसर्या आउन्या बिसयमि रे उनुलाइ भिट्ट हामु सप्पइ भेला हुन्या बिसयमि हामु तमुलाइ बिन्ति अद्दाउँ, 2 कि कसइ अगमबाणि, बचन या कसइ चिट्ठिले प्रभुको दिन आया छ भनि बतायो भुन्या, त्यो कुरा हामुबटहइ आया हो भनिबर तमरो मन बिचलित जनहउ, रे जनआत्तिय। 3 तर कसइले लइ तमुलाइ धोका जनदेउ। क्यालाइकि पइल्लि परमेस्वरको बिरोद नभयासम्म पाप अद्द्या मान्स या नास हुनु पड्डया मान्स नधेकियासम्म प्रभु आउन्या दिन आउन्या आथिन्। 4 तइले परमेस्वर भुनिया रे मान्सले आराधना अर्या सप्पइ कुराको बिरोद अद्द्या छ। रे तिनुभुन्ना आफुलाइ ठुलो बनाउन्या छ, याँसम्मकि आफुइलाइ परमेस्वरइ हुँ भुनि परमेस्वरका मन्धिरमि बस्या छ। 5 क्या तमुलाइ याद आथिन्? मु तमुसितइ हुन्याबेला मुइले यिनु कुरा तमुलाइ भुनिसक्या थ्या। 6 तइको बेला आयापाछा त्यो दुस्ट धेकिन्या छ। रे तइलाइ अइलसम्म क्या कुराले रोकिराख्या छ त्यो तमुलाइ थाइ छ। 7 क्यालाइकि पाप अद्द्याहुन्याले आफनो काम भित्र भितरइ सुरु अरिसक्या छ। जइले अइलसम्म तइलाइ रोकिराख्या छ त्यो नहटन्ज्यासम्म पाप अद्द्याहुन्याका काम बाइर धेकिन्या आथिन्। 8 तबइ त्यो पाप अद्द्या मान्स धेकिन्या छ, तइलाइ प्रभु इसुले आफना मुखका सासले रे उनु फर्कि आउन्या दिनका चमकले तइलाइ नास अद्द्याछन्। 9 तइ दुस्ट मान्सले सइतानको सक्ति लेइबर आया हुन्याछ। त्यो सप्पइ किसमका झुटा चिन्ह रे अचम्मका काम अद्द्या। 10 तइले नास हुन्यावालालाइ छलमि पाड्डाइलाइ सारा दुस्टतासहित आउन्या छ। क्यालाइकि तिनुले मुक्ति दिन्या सत्यलाइ सुइकार अरेइन्। 11 तबइलाइ तिनुले झुटा कुरामि बिस्वास अरुन भनिबर परमेस्वरले भरमाउन्या सक्तिलाइ पठाउन्या छन्। 12 ताकि सत्य कुरामि बिस्वास नअद्द्या तर दुस्ट काममि खुसि भइबर रमाउन्या जति सप्पइ जना दोसि ठहरिन्या छन्। इस्तिर होय 13 प्रभुले पिरिम अर्या भाइबिना हो, तमरि निउति हामुले परमेस्वरलाइ सदाइँ धन्यवाद दिनइ पडन्छ, क्यालाइकि परमेस्वरले तमुलाइ पबित्तर आत्माको पबित्तर पाड्डया कामले रे साँचा बिस्वासबटहइ मुक्ति पाउनाइलाइ सुरुबटहइ चुन्यो। 14 हामुले तमुलाइ असल रइबार सुनाउन्याबेला परमेस्वरले तमुलाइ मुक्तिकि निउति बोलायो। आब तमु हामरा प्रभु इसु ख्रिस्टका महिमामि सहभागि हुन् सकन्छउ। 15 तबइलाइ भाइबिना हो, तमुले बिस्वास अर्या कुरामि बलिया भइबर बस, रे हामुले भुन्या रे लेख्या सत्य सिछ्या तमुले निकेरि मान। 16 हामरा प्रभु इसु ख्रिस्ट रे पिता परमेस्वरले हामुलाइ पिरिम अर्यो रे उनरा अनुग्रहबटहइ अन्त नहुन्या उत्साह रे असल आसा दियो। 17 तमरा ह्रिदयलाइ सान्तोना दिउन् रे हरेक असल काम रे बचनमि तमुलाइ परमेस्वरले इस्तिर अराउन्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.