२ थेसलोनिकि 1 - डोटेलि1 मु पावल, सिलास रे तिमोथिका तर्फबटहइ परमेस्वर हामरा पिता रे प्रभु इसु ख्रिस्टमि बिस्वास अद्द्या थेसलोनिकेमि भया मण्डलिका बिस्वासिलाइ यो चिट्ठि लेखिबर पठाउन्ना छु। 2 तमुलाइ परमेस्वर पिता रे प्रभु इसु ख्रिस्टले अनुग्रह रे सान्ति दिउन्। धन्यबाद रे प्रार्थना 3 भाइबिना हो, हामुले तमरि निउति परमेस्वरलाइ सदाइँ धन्यबाद दिनइ पडन्छ। रे यो उच्चित छ, क्यालाइकि तमरो बिस्वास भउतइ बड्डइ गया छ। तमरो पिरिम लइ एक अर्खाकि निउति झिग झिग बड्डइ गया छ, 4 यसेरि तमरो सतावट रे दुःख सहन सक्द्या सक्ति, इस्तिरता रे बिस्वासकि निउति परमेस्वरका अउर मण्डलिका आगाडि हामु गर्भसित बोल्ल सक्दाउँ। 5 परमेस्वरले अद्द्या धार्मिक इन्साफको प्रमाण यइ हो, कि तमु परमेस्वरका राज्यको योग्य ठहरिन सक, जइकि निउति तमु दुःख भोग्दाछउ। 6 परमेस्वरले न्याय अद्द्या भया हुनाले जइले तमुलाइ दुःख दिन्छ, परमेस्वरले लइ उनुलाइ दुःख दिनाछन्, 7 रे तमु दुःख कस्ट पायाहुन्यालाइ हामुसितइ उनुले आराम दिन्या छन्। यो कुरा तइ दिन हुन्या छ, जबइ प्रभु इसु आफना सक्तिसालि स्वर्गदुतसङइ बल्लारया आगाका ज्वालासितइ स्वर्गबटहइ आउन्या छन्। 8 परमेस्वरलाइ नचिन्या रे हामरा प्रभु इसुको असल रइबारलाइ नमान्या जतिलाइ उनुले दण्ड दिन्या छन्। 9 तिनुले पाउन्या दण्ड भन्या प्रभुका सक्तिसालि महिमा रे उनरा उपस्तिथिबटहइ निकालिन्या छन्। पइ सदाइँकि निउति नास अरिन्या छन्। 10 जइ दिन यो कुरा हुन्या छ, तइ दिन उनुले आफना पबित्तर मान्सबटहइ महिमा पाउन्या छन् रे उनुलाइ बिस्वास अद्द्या अचम्म पड्डया छन्। तमु लइ ताँइ हुन्या छउ क्यालाइकि हामुले भुन्या कुरा तमुले बिस्वास अर्या छउ। 11 तबइलाइ हामु तमरि निउति निरन्तर प्रार्थना लइ अद्दाउँ, कि हामरा परमेस्वरले जइ बोलावटमि तमुलाइ बोलाया छन्। तइमि योग्य बनाउन्, रे हरेक निका उदेस्य रे बिस्वासको काम पुरा अद्द साहेता अरुन्। 12 यसेरि हामरा परमेस्वर रे प्रभु इसु ख्रिस्टको अनुग्रहअन्सार हामरा प्रभु इसुको नाउँको आदर हुन्याछ रे तमरो लइ उनुबटहइ आदर हुन्या छ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.