१ तिमोथी 6 - डोटेलि1 हरेक नउकरले आफना मालिकका सप्पइ कुराको आदर सम्मान अद्दु पडन्छ भन्न्या सम्ज। तसो भया मात्तरइ कसइले लइ परमेस्वरको नाउँ रे हामुले दिया सिछ्यालाइ दोस लाउन पाउन्या आथिन्। 2 बिस्वासि मालिकलाइ तिनरा कमाराले बिस्वासमि दाइभाइ भन्नाइमि तिनुलाइ अनादर जनअरुन। बरु तिनुले उनरो झिग बर्ता सेबा अरुन, क्यालाइकि तिनरा सेबाबटहइ फइदा हुनु भन्या आफनाइ बिस्वासि रे प्यारा दाइभाइकोइ फाइदा हुनु हो। झुटा सिछ्या रे पइसाका बिसयमि 3 यदि कसइले झुटा सिछ्या सिकाउछ भन्या हामरा प्रभु इसु ख्रिस्टका सत्य सिछ्या रे हामुले अद्दु पडड्या परमेस्वरको भक्ति अन्सारको सिछ्या मान्नइन भन्या, 4 त्यो घमण्डले फुल्या हुन्छ, रे तइले केइ जान्या हुनइन्। तइले खालिसारको बादबिबाद अरन्छ, रे एक-एक सब्द लिबर झगडा अद्द खोजन्छ। यिनु कुराले डाह, कलह, बदनामि रे खराब सङ्का उत्पन्न अराउछ। 5 यसा मान्सले बुद्दि भ्रस्ट भया रे सत्यबटहइ अलग भया मान्सका बिचमि झगडा उत्पन्न अद्दाछन्, रे परमेस्वरको भक्तिलाइ फइदा उठाउन्या उपाय हो भनि तिनु सोच्चाछन्। 6 तर परमेस्वरको भक्ति अद्द्या जिबन जिउनु भन्या, आफुसित भया कुरामि सन्तुस्टि हुनुइ सप्पइभन्ना ठुलि कुरडि हो। 7 क्यालाइकि जन्मन्याबेला हामुले न त यइ सन्सारमि केइ लेइबर आया न त याँबटहइ केइ लइजान् सक्दाउ। 8 तबइलाइ हामुसित खानु रे लाउनुसम्म छ भन्या त तसइमि सन्तुस्टि हुन् पडन्छ। 9 तर धनि हुन खोज्या मान्स पापका कुरामि फसन्छ। उ मुर्ख रे हानि अद्द्या इछ्याका पासामि पडन्छ, यिनु खराब इछ्याले उइलाइ डरलाग्दो नास अरि बरबादिमि पुर्याउँन्छ। 10 क्यालाइकि रुप्यापइसाइको मोह सप्पइ किसिमका खराबिको जड हो। पइसाका लोबमि पडिबर कोइ कोइ बिस्वासबटहइ कुमार्गतिर लाग्या छन्। रे भउत दुःख रे पिडले तिनरा मन छियाछिया भया छन्। पावलले तिमोथिलाइ दिया चेतावनि 11 तर परमेस्वरको जन तिमोथि, यिनु फुचेरा कुराबटहइ अलगइ बस्, रे धार्मिकता, परमेस्वर प्रतिको भक्ति, बिस्वास, पिरिम, स्थिरता रे नम्रताको लछ्य राख्। 12 कभइ नमद्या जिबन पाउनाइलाइ बिस्वासको उत्तम लडाइ लड्, यसइकि निउति परमेस्वरले तुलाइ बोलाया हो रे तुइले लइ भउत मान्सका अगाडि आफनो बिस्वासको साँचो साछि दिया थि। 13 सप्पइ थोकलाइ जिबन दिन्या परमेस्वर रे पन्तियस पिलातसका अगाडि साँचो साछि दिन्या ख्रिस्ट इसुका अगाडि, 14 मु तुलाइ यो आग्या दिन्नाछु, हामरा प्रभु इसु ख्रिस्ट नआउज्यासम्म तुइले पाया आग्या निकेरि मान रे कसइले दोस लाउन जनपाउ। 15 परमेस्वरले उनुलाइ ठिक समयमि अज पठाउन्याछन्। परमेस्वरइ सप्पइ सक्तिका मालिक, राजाका लइ राजा रे प्रभुका लइ प्रभु हुन्। 16 उनुइमि मात्तरइ अमरत्व छ, रे उनु तइ ज्योतिमि बास अद्दाछन्, तइ ज्योतिका नजिक कोइ जान सक्दइन। उनुलाइ कसइ मान्सले कभइ धेक्या आथिन् न धेक्द सकन्छ। सदाइँलाइ रन्या सक्ति रे आदर उनुइमि रउ। आमेन। 17 यइ सन्सारका धनिलाइ घमण्डि नहुन्या आग्या दे, रे तिनरा धन-सम्पति सदाइँ रन्या हइनन् तर हामरा सुखकि निउति प्रसस्त अरि सप्पइ कुरा दिन्या परमेस्वरइमि भरोसा राख भनिबर आग्या दे। 18 तिनुले असल काम अरुन, रे असल काममि धनि, उदार-चित्तका रे दानि हउन्। 19 यसेरि तिनुले भबिस्यका जिबनिखिलाइ चाइन्या बलियो जग बनाउनाइलाइ धन-सम्पति जम्मा अरुन्, तसो अर्यो भन्या साँचो जिबन बचाइराख्द सक्दया छन्। 20 तिमोथि, परमेस्वरले तुलाइ ज्या दिराइछ, त्यो सुरछित राख्। कतिपइ मान्सले सन्सारका मुर्ख कुरा रे ग्यान भनिमानिबर मान्या झुटा कुराबटहइ अलग होय। 21 क्यालाइकि कति जना यसा कुरामि लागिबर बिस्वासबटहइ पाछा हट्याछन् तमु सप्पइसित परमेस्वरको अनुग्रह रइरउ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.