१ तिमोथी 5 - डोटेलिबिधुवा, एल्डर रे कमाराका बिसयमि सिछ्या 1 बुडापाका मान्सलाइ जनहप्का, तर तिनुलाइ आफनाइ बाकि जसेरि आदर अरिबर सल्लाह दे। रे तु भुन्ना नानालाइ भाइका जसोइ ब्यबहार अर। 2 तसेरि बुडि स्वाइनिसित इजाकि जसेरि रे ज्वान दिदिबइनिलाइ चोखा मनले ब्यबहार अर। 3 जइ बिधुवाको साहारा कोइ आथिन् तइको साहेता अर। 4 तर चेला-चेलि रे नाति-नतिना हुन्या बिधुवालाइ तइका चेला-चेलि रे नाति-नतिनाले हेरबिचार अरुन्। पइल्लि आफना घरइको जिम्मेबारि पुरा अद्द सिकुन्। यसेरि आफना इजा-बाले लाया गुन तिर, तसो अर्यो भन्या परमेस्वर खुसि हुनाछन्। 5 तर आफनो कोइ नहुन्या बिधुवाले परमेस्वरमि मात्तरइ भरोसा राख्दिछन्, रे तिनुले रात-दिन परमेस्वरबटहइ साहेता पाउँ भनिबर प्रार्थना अद्दिछन्। 6 तर तिनुले आफनो जिबन सुख-बिलासमि मस्त होइबर बिताउछिन् भन्या, तिनु जिउनि होइबर लइ मर्या बराबर हुन्। 7 मण्डलिका बिस्वासिलाइ यो सिछ्या दे ताकि तिनुलाइ कसइले लइ दोस दिन नसकउ। 8 तर कसइले आफनाको रे बिसेस अरिबर आफना मउकपिलाको पालनपोसण अद्दइन् भन्या तइले बिस्वासलाइ इन्कार अरन्छ, रे बिस्वास नअद्या मान्स भन्ना लइ खराब हुन्छ। 9 साठि बर्सभन्ना मल्तिर पुगेइ बिधुवाको नाँउ मात्तरइ बिधुवा सुचिमि लेख, तइमि लइ तिनरो एकबर मात्तरइ ब्या भया हुन्पणन्छ। 10 तिनु निका काम अर्याकि, चेला-चलिलाइ हुर्कायकि, प्रदेसिको स्वागत सत्कार अर्याकि, ख्रिस्टका पबित्तर जनका खुट्टा धोइबर सेबा अर्याकि, दुःखमि पड्यालाइ साहेता अर्याकि, रे यसाइ निका काममि ध्यान दिएइ हुन् पड्न्छ। 11 तर ज्वान बिधुवाको नाउँ बिधुवा सुचिमि जनलेखइ, क्यालाइकि जबइ तिनरा सारिरिक इछ्याका कारणले ख्रिस्टबटहइ तिनुलाइ दुर लइजान्छ, तबइ तिनुले ब्या अद्द खोज्जिन्छन्। 12 यसेरि तिनुले ख्रिस्टमि पइल्लि अर्या प्रतिग्या बिसर्याहुनाले तिनु दोसि ठहरिनेइ छन्। 13 रे ज्वान बिधुवा त अउर मान्सका घरघरइ डुल्लेइ बानि होइबर बेकामइ हुन्छिन्। तति मात्तरइ हइन, कुराउटेइ, अउरका काममि हात हाल्लेइ, बोल्ल नहुन्या कुरा बोल्लेइ हुन्छिन्। 14 तबइलाइ मु ज्वान बिधुवाले ब्या अरुन भन्न्या सर-सल्लाहा दिनउ। यसेरि तिनुले चेला-चेलि जन्माउन्, घरबार बनाउन्, रे बिरोधिलाइ हामरो बदनाम अद्द्या मउका नदिउन् भन्न्या मु चाहानउ। 15 क्यालाइकि कोइ कोइ बिधुवा पइल्लि सइतानतिर ढल्किसकेइ छन्। 16 तर कसइ बिस्वासि स्वाइनि मान्सका आफनाइमि बिधुवा छन् भन्या, तिनुले उनरो हेरबिचार अरुन, तसो अर्यो भन्या मण्डलिले तिनरो बोझ बोक्दु पड्डया आथिन्। तबइलाइ कोइ नभएइ बिधुवाको मात्तरइ मण्डलिले हेरबिचार अरउ। एल्डरका बिसयमि 17 मण्डलिको निकेरि हेरबिचार अद्द्या एल्डर दोब्बर आदरका योग्य हुनाछन्, बिसेस अरिबर जइले बचन प्रचार अद्द्या रे सिछ्या दिन्या काममि परिस्रम अद्दाछन्। 18 क्यालाइकि धर्म- सास्त्तरमि लेखिया छ, “दाइँ अद्द्या बल्लका मुखमि मोहोलो जनलगा” रे “काम अद्द्याले आफनो ज्याला पाउनइ पडड्छ।” 19 दुइ या तिन जना साछिको गवाइबिना एल्डरलाइ दोस लाया कुरा सुइकार जनअरेइ। 20 पाप अरिरन्या एल्डरलाइ सप्पइका अगाडि हप्का, रे यसेरि अउर लइ डराउन्या छन्। 21 मु तुलाइ परमेस्वर, इसु ख्रिस्ट रे चुनिया स्वर्गदुतका अगाडि यो सिछ्या मान्नाइलाइ कडा आग्या दिनउ, कि भेदभाब बिना यिनु नियम पालन अर्। पछ्यपात अरिबर केइ लइ काम जनअरइ। 22 तुइले मण्डलिका अगुवा निउक्ति अद्याबेला मान्समि हात राख्द्या काममि हतार जनअरेइ। रे अउरका पापमि तु सहभागि जनहो, आफना जिबनलाइ सुद्द राख्। 23 तेरा पेटका समस्याले अद्दा तु बेला बेला बिमारि हुन्या भया हुनाले पानि मात्तरइ होइन् नम-नमाइ दाखमध्य खान्या अर्। 24 कसइ कसइ मान्सको पाप त छर्लङइ धेकिन्या हुनाछन् रे छिट्टाइ न्यायमि पुग्दाछन्, तर कति मान्सको पाप भन्या पाछा मात्तरइ धेकिनइ जान्छ। 25 तसोइ अरि कति असल काम पइल्लि छर्लङइ धेकिनाछन् रे छर्लङइ नधेकिया लइ लुकिबर रन्या आथिनन्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.