१ तिमोथी 4 - डोटेलिझुटा सिछ्या सिकाउन्याका बिसयमि 1 पबित्तर आत्मा प्रस्टइ भुन्नाछन्, कि पाछा आउन्या समयमि छलि आत्मा रे भुतप्रेतका सिछ्यातिर मन लाइबर कसइ कसइले बिस्वास अद्द छाड्डयाछन्। 2 यसा कुरा झुटा बोल्ल्या मान्सका छलबटहइ हुन्या छन्। तिनरो बिबेक ताता लुवाले डामिबर मर्या जसो हुन्छ। 3 ब्या अद्दु हुनइन् केइ केइ खान्या कुरा खानु हुनइन भनिबर तिनु सिकाउनाछन्। तर बिस्वास अद्द्या रे सत्यलाइ चिन्याहुन्याले धन्यबाद दिबर यिनु खान्या कुरा खायाहुन्छ क्यालाइकि परमेस्वरइले यिनु कुरा सिरिस्टि अर्या हुन्। 4 परमेस्वरले सिरिस्टि अर्या हरेक कुरा असल छ, रे धन्यबाद दिबर खायो भुन्या सप्पइ खान्या कुरा खाया लइ हुन्छ। 5 क्यालाइकि त्यो खान्या कुरा परमेस्वरको बचन रे प्रार्थनाले चोखो बनाइसक्याहुन्छ। परमेस्वरको असल सेबक 6 यदि तुइले बिस्वासि भाइबिनालाइ लइ यिनु सिछ्या सिकाइ भन्या तु असल सेबक हुन्या छइ। बिस्वासको बचन रे तुइले सिक्या असल सिछ्यामि बलियो हुनोइ जान्या छइ। 7 परमेस्वरलाइ आदर नअद्या रे अर्थनहिन कथाबटहइ एकदम अलगइ बस बरु परमेस्वरलाइ भक्ति अद्द्या जिबन जिउन्या बिसयमि तालिम दे। 8 क्यालाइकि सारिरिक तालिमले केइबेरसम्म मात्तरइ फाइदा हुन्छ, तर परमेस्वर प्रतिको भक्ति भुन्या हरकिसमले फाइदाको हुन्छ, क्यालाइकि यइमि त अइल रे पाछाका जिबनकि निउति प्रतिग्या अरिया छ। 9 यो कुरा साँचो रे सप्पइले ग्रहण अद्दु पड्डया योग्यको छ। 10 तबइलाइ हामु यइ उदेस्यले काम अद्दाउ, क्यालाइकि हामरो आसा जिउना परमेस्वरमि राखिया छ। उनु सप्पइ मान्सका मुक्तिदाता हुन्, खास अरिबर उनुमि बिस्वास अद्द्याहुन्याका मुक्तिदाता हुन्। 11 यिनुइ कुराको आग्या दे रे सिका। 12 ज्वान छइ भन्नाइमि कसइले लइ तुलाइ तुच्छ जनसोचउ, तर बिस्वासिका अगाडि बोलि-बचन, बानिबेहोरा, पिरिम, बिस्वास रे सुद्दतामि तु एक नमुना बन्न सक। 13 मु नआउन्ज्यासम्म तुइले मान्सलाइ धर्म-सास्त्तर पडिबर सुना, तिनुलाइ साहास दे रे सिछ्या दिन्या कुरामि लागिराख। 14 तुइले पाया बर्दानको अपमान जनअरेइ, जो बर्दान एल्डरले आफना हात तुमि राखि अगमबाणि अरिबर त्यो बर्दान तुइलाइ मिल्या थ्यो। 15 तुइले सिक्या यिनु कुरा निकेरि पालन अरिबर तसइमि लागिराखेइ, तसो अर्याले अउर मान्सले तेरो उन्नति धेक्द्या छन्। 16 आफना बिसयमि रे आफना सिछ्याका बिसयमि होसियार होइबर बस। यिनु कुरामि लागिराखि भन्या तु रे तेरा कुरा सुन्न्या दुएइले मुक्ति पाउन्याछउ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.