१ तिमोथी 3 - डोटेलिमण्डलिको बिसप 1 “यदि कसइले मण्डलिका अगुवा भइबर सेबा अद्द्या इछ्या अरन्छ भन्या तिनुले सम्मानित कामको इछ्या अद्दाछन्” यो भुनाइ बिस्वासयोग्य छ। 2 तबइलाइ मण्डलिका अगुवा कसइले लइ दोस लाउन नसक्द्या हुनुपड्डछ। तिनु एकइ मात्तरइ स्वाइनि भया हुन्पड्डछ, आफुलाइ बसमि राख्द्या, समज्दार असल बानिबेहोरा भया, पाउनाको स्वागत-सत्कार अद्द्या रे मान्सलाइ परमेस्वरको बचन सिकाउन सक्द्या, 3 तिनु सराप खाइबर मात्तिन्या रे रिसालु हुनुहुनइन्, तर बिनम्र, झगडा नअद्द्या, धनको लोभ नअद्द्या, 4 आफना मउकपिलाको निकेरि रेखदेख अद्द सक्द्या रे आफना चेला-चेलिलाइ अधिनमि राखि आदर-सम्मान अद्द सिकाउन्या हुनपड्डछ। 5 क्यालाइकि आफनाइ मउकपिलाको रेखदेख निकेरि अद्द नजान्न्याले कसेरि परमेस्वरका मण्डलिको रेखदेख अद्द सकलो? 6 तिनु नयाँ बिस्वासि लइ हुनुहुनइन्, नति घमण्डले फुलिबर सइतानकि जसेरि दण्डमि पड्डयाछन्। 7 मण्डलिको अगुवा मण्डलि भित्तर मात्तरइ हइन मण्डलिबाइर लइ मान-सम्मान पाया मान्स हुन्पड्डछ। नति तिनु सइतानका पासामि पड्डया छन्। डिकन 8 तसोइ अरिबर डिकन लइ आदर-सम्मानका योग्य हुनुपड्डछ। तिनु दुइ जिबण्या, सराप खाइबर मात्तिन्या रे अनइतिक तरिकाले धनको लोब अद्द्या हुनुहुनइन्। 9 तर तिनुले बिस्वास अरि पाया सत्य कुरालाइ सुद्द बिबेकले जोगाइ राख्द्या हुनुपड्डछ। 10 डिकन निउक्ति हुनु भन्ना अगाडि तिनरो निकेरि जाँच अद्दुपडन्छ। तइपाछा तिनु दोसरहित प्रमाणित भयो भन्या तिनुलाइ डिकनका सेबामि निउक्ति अद्द सकिन्छ। 11 तसोइ अरि तिनरि स्वाइनि लइ सप्पइले आदर अरेइ, अउरका कुरा नकाट्टेइ, तर आफुइलाइ अधिनमि राख्देइ रे बिस्वासयोग्य हुनुपड्डछ। 12 डिकनकि लइ एकइ स्वाइनि हुनुपड्डछ। रे तिनुले आफना चेला-चेलि रे आफना मउकपिलाको निकेरि रेखदेख अद्द्या हुनुपड्डछ। 13 क्यालाइकि डिकनले निकेरि सेबा अर्यो भन्या तिनुले आदर-सम्मान पाउन्या छन्। रे इसु ख्रिस्टमि भया तिनरो बिस्वासका बिसयमि अउरलाइ लइ साहाससित भुन्न सक्द्या छन्। माहान रहस्यकि कुरडि 14 मु तेरा वाँ छिट्टाइ आउन्या आसामि छु, तर लइ यो चिट्ठि लेख्दाछु। 15 केइ अरि मु आउन ढिला भयो भन्या परमेस्वरका घरानामि कसेरि चल्लु पड्डया हो, त्यो तुइले यइ चिट्ठिबटहइ जानिराखेइ। परमेस्वरको घराना भन्या जिउना परमेस्वरको मण्डलि, सत्यको खामो रे जग हो। 16 हामु सुइकार अद्दाउ, कि हामरो बिस्वासको रहस्य भउतइ माहान छ। उनु सरिलमि धेकिया, पबित्तर आत्माबटहइ सत्य साबित भया, उनुलाइ स्वर्ग दुतले धेक्यो, जाति जातिका बिचमि प्रचारिया, सन्सारमि मान्सले उनुलाइ बिस्वास अर्यो, रे परमेस्वरले उनुलाइ स्वर्ग लइग्या। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.