१ तिमोथी 2 - डोटेलिसप्पइकि निउति प्रार्थना अद्दु 1 मु अनुरोध अद्द चाहानउ कि सबभन्ना पइल्लि सप्पइ मान्सकि निउति प्रार्थना, नम्र-निबेदन, अन्तर्बिन्ति प्रार्थना रे धन्यबाद लइ चडाउन्या अर। 2 राजा रे सप्पइ उच्चा पदमि भया मान्सकि निउति लइ प्रार्थना अद्द्या अर। तसो भयो भन्या हामु निर्धक्क रे सान्तिसित धार्मिक रे आदरको जिबन जिउन सक्दाउ। 3 यसेरि सप्पइकि निउति प्रार्थना अद्दु असल कुरा हो रे हामरा मुक्तिदाता परमेस्वरका नजरमि यो निको छ। 4 सप्पइ मान्सले मुक्ति पाउन् रे तिनु सत्यका ग्यानमि आउन् भन्न्या परमेस्वरको इछ्या हो। 5 क्यालाइकि परमेस्वर एकइ छन्। परमेस्वर रे मान्सका बिचमि मिलाप अराउन्या ब्यक्ति लइ एकइ छन्। त्यो ब्यक्ति इसु ख्रिस्टइ हुन्। 6 उनु सप्पइ मान्सका पापका मोलकि निउति छुट्कारा दिनाइलाइ आफुइ बलिदान भया। यइ कुराको गवाइ परमेस्वरले ठिक्क समयमि दियो। 7 तबइलाइ परमेस्वरले मुलाइ प्रचारक रे प्रेरित निउक्ति अर्यो। ताकि अउरजातिका मान्सलाइ बिस्वास रे सत्यताको सन्देस प्रचार अद्द मु एक सिछ्यक बनाइया हुँ। मु साँच्चि भुन्ना छु झुटा हइन। 8 तबइलाइ मेरो इछ्या बइकान मान्सले जइ ठउँर लइ नरिसाइबर सङ्का नअरि आफना पबित्तर हात उठाइबर परमेस्वरमि प्रार्थना अरुन भन्न्या मु चाहानउ। 9 तसोइ अरि मु चाहानउ कि, स्वाइनि मान्सले साधारण रे आफुलाइ स्वाउन्या लत्ता लाउन्, रउको बर्ता सिङारपटार अरिबर सुन, मोति रे महङगा लत्ता लाइबर हइन, 10 तर परमेस्वरको भक्ति अद्देइ स्वाइनि मान्सले आफुलाइ स्वाउन्या किसिमका असल काम मात्तरइ अरुन। 11 रे स्वाइनि मान्सले मण्डलिमि सिकाउन्याका अधिनमि बसिबर चुपचापसित सिकुन्। 12 तर स्वाइनि मान्सले बइकान मान्सलाइ सिकाउन्या रे उनुमि अधिकार जमाउन्या काममि मु अनुमति दिनइन्। तर तिनु चुप्पइ रउन्। 13 क्यालाइकि पइल्लि आदम सिरिस्टि अरिया हुन्, तइपाछा मात्तरइ हब्बा सिरिस्टि अरियइ हुन्। 14 आदम सइतानका छलमि पड्या हइनन्, तर हब्बाइ छलमि पडिबर परमेस्वरको आग्या भङ्ङ अरेइ हुन्। 15 तबइलाइ स्वाइनि मान्स नम्र होइबर बिस्वास, पिरिम रे पबित्तरतामि रन सक्यो भन्या, बालख जन्माउनेइबेला तिनु बचाइनेइछन्। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.