१ तिमोथी 1 - डोटेलि1 बिस्वासमि मेरो साँचो चेलो तिमोथि, हामरा उद्दारकर्ता परमेस्वर रे हामुले आसा अर्या ख्रिस्ट इसुका आग्याअन्सार मु प्रेरित पावलका तर्फबटहइ यो चिट्ठि लेख्दाछु। 2 हामरा पिता परमेस्वर रे ख्रिस्ट प्रभु इसुले तुलाइ अनुग्रह, किर्पा रे सान्ति दिउन्। झुटा सिछ्याका बिरुद्दमि चेवानि 3 मु माकेडोनिया जान्याबेला तुलाइ भुन्या जसेरि तु एफिससइमि बस्, रे झुटा सिछ्या सिकाउन्या मान्सलाइ तसो झुटा सिछ्या जनसिका भनिबर कडा आग्या दे। 4 तुइले तिनुलाइ तिनु बनावटि कथा रे पिता-पुरखाका नसकिन्या बंसाबलितिर ध्यान लाउन जनदेइ। क्यालाइकि तिनु कुराले त बादबिबाद मात्तरइ ल्याउछ। रे परमेस्वरलाइ बिस्वास अरिबर जिउन्याहुन्यालाइ केइ साहेता अद्दइन्। 5 हामुले दिया आग्याको उदेस्य पिरिम हो, जो सुद्द मन, असल बिबेक रे साँचो बिस्वासबटहइ आउछ। 6 कतिपइ मान्स यिनु कुरालाइ भुलिबर ब्यर्थइका कुरामि अल्मलिरइछन्। 7 तिनु ब्यबस्थाका सिछ्यक हुन्या इछ्या त अद्दाछन्, तर आफुइले बोल्या कुरा या आफुइले किटान अरिबर भन्या कुरा आफुइ बुज्जाइनन्। 8 हामुलाइ थाइ छ, ब्यबस्थामि भया सप्पइ कुरा यदि कसइले निकेरि पालन अर्यो भन्या, ब्यबस्था भउतइ निको छ। 9 रे हामु यो लइ जान्नाउ कि ब्यबस्था त निका मान्सकि निउति हइन, तर ब्यबस्था भङ अद्द्याहुन्या रे अनाग्याकारिकि निउति, अधर्मि, पापि, अपबित्तर, असुद्द, इजा-बालाइ माद्दयाकि निउति, हत्याराकि निउति, 10 ब्यबिचारिकि निउति, बइकान मान्सले बइकान मान्ससित रे स्वाइनि मान्सले स्वाइनि मान्ससित ब्या अद्द्याकि निउति, मान्सलाइ अपरहण अरिबर कमरा कमारिका रुपमि किन-बेच अद्द्याकि निउति, झुटा बोल्ल्याकि निउति, झुटा गवाइ दिन्याकि निउति रे सत्य सिछ्याका बिरुद्दमि काम अद्द्याकि निउति बन्या हो। 11 यो मुलाइ दिइया सिछ्या आसिस दिन्या परमेस्वरको महिमित असल रइबार अन्सार छ। पावललाइ प्रभुको अनुग्रह 12 मुलाइ सक्ति दिन्या ख्रिस्ट इसु हामरा प्रभुलाइ मु धन्यबाद दिनउ, क्यालाइकि आफना सेबाका काममि निउक्ति अरिबर उनुले मुलाइ बिस्वासयोग्य ठान्यो। 13 पइल्लि मुइले उनरो निन्दा अर्या खेदो अर्या रे अपमान अर्या। तर मुइले यिनु सप्पइ कुरा अन्जान रे अबिस्वासमि अर्या हुनाले अनुग्रह पाया। 14 आब मुलाइ हामरा प्रभुले अनुग्रह प्रसस्तसित दियो। ख्रिस्ट इसुमि भया बिस्वास रे पिरिम मेरा जिबनमि उनइलेइ मुलाइ दियो। 15 यो बचन हरप्रकारले ग्रहणयोग्य छ, कि पापिलाइ उद्दार अद्द इसु ख्रिस्ट सन्सारमि आयाहुन्, रे पापिमध्ये मु सप्पइहइ बर्ता पापि हुँ। 16 तर उनुले मुलाइ दया अर्यो कि मु जसो सप्पइभन्ना बर्ता पापिलाइ आफनो धइर्य प्रकट अद्द उनुले मुलाइ नमुना बनायो। यो नमुना पाछा उनुमि बिस्वास अद्द्या रे कभइ नमद्दया जिबन पाउन्याकि निउति हो। 17 युग युगका राजा, अबिनासि रे नधेकिन्या एक मात्तरइ परमेस्वरलाइ आदर रे महिमा सदाइँलाइ होइरउ। आमेन तिमोथिलाइ पावलको आदेस 18 मेरा चेला तिमोथि, मु तुलाइ यो आग्या दिन्नाछु, कि तेरा बिसयमि आगाडि बोलिया अगमबाणिअन्सार तिनुबटहइ प्रेरणा पाइबर बिस्वास रे असल बिबेक जोगाइ राखिबर तु असल रइबारकि निउति लडाइ लड्ड सक। 19 तइबेला तुइले आफनो बिस्वास रे असल बिबेकलाइ बचाइराखेइ। कसइ कसइले आफना बिबेकले भन्या नमानिबर कति जना बिस्वासबटहइ पतन भया छन्। 20 तिनुमध्ये हुमेनियस रे अलेक्जेन्डर हुन्। परमेस्वरलाइ निन्दा अद्द छाडुन भनिबर मुइले तिनुलाइ सइतानका जिम्मा लाइदिया छु। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.